Свет
Една од најсмртоносните операции од почетокот на војната, Израелците упаднаа во крвава замка
Двајца високи израелски команданти и уште седум други војници беа убиени од Хамас во заседа на периферијата на градот Газа, каде што во последните денови имаше интензивни борби во урбаната област. Инцидентот се случи во време кога се стравува од натамошна ескалација на хуманитарната криза во Газа поради обилните дождови во регионот.
Потполковник Томер Гринберг, командант во бригадата Голани, која се бореше против Хамас за време на нападот врз пограничните заедници во јужен Израел на 7 октомври, беше убиен за време на неуспешниот обид да се спасат четворица повредени војници, пишува Гардијан.
Во еден од најсмртоносните инциденти досега за израелските војници во двомесечната војна во Газа, загинаа Гринберг и неколку негови високи офицери. Меѓу загинатите, објавени од израелските одбранбени сили (ИДФ) во средата, има уште еден полковник, тројца мајори и неколку членови на борбените спасувачки сили.
Известување издадено од бригадата Голани, ја опишува заседата што се случила во близина на пазарот Шеџаија.

„Додека вршеа претрес за расчистување на згради во срцето на стариот дел на градот, кој се смета за пренатрупана област преплавена со терористички цели, во една од зградите се случи голема експлозија, а неколку војници од 13-тиот баталјон беа ранети“, се вели.
Според извештаите, војниците се приближувале до зградата кога првпат биле под оган од горниот кат. Следеше експлозија, при што беа тешко ранети четворица војници кои беа отсечени од останатите нивни соборци. Останатите војници се собраа и отидоа да и помогнат на првата група од страв да не бидат одвлечени во тунелот, но се случи уште една експлозија.
Потоа трета група израелски војници се обиделе да се приближат за да ги евакуираат ранетите, но експлозијата повторно одекнала. Заседата дојде и покрај секојдневните тврдења на ИДФ дека е блиску до оперативна контрола на клучните упоришта на Хамас во северниот дел на Газа.
Потполковник Гринберг стана познат по нападот на 7 октомври, опишувајќи во интервју како спасил две близнаци чии родители биле убиени од Хамас во Кфар Аз. Зборувајќи за војниците кои беа убиени во вторникот, израелскиот министер Бени Ганц рече дека Израел плаќа „болна и тешка цена“.
Заседата дојде во време на непотврдени медиумски извештаи дека Израел почнал да пумпа морска вода во некои од тунелите на Хамас. Запрашан за тврдењата изнесени во Волстрит Журнал, американскиот претседател Џо Бајден одби директно да одговори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Италијанската полиција конфискува 1,4 тони наркотици и уапси 384 луѓе
Во голема операција против илегалната трговија со дрога италијанската полиција откри и конфискува 1,4 тони наркотици и уапси 384 лица.
Во операцијата 655 лица се ставени под истрага, од кои 39 малолетни, а конфискувани се 35 килограми кокаин и повеќе од 40 парчиња огнено оружје.
Полицијата изврши контроли и во 312 продавници за канабис, при што привремено се затворени пет продавници во три града откако биле извршени 312 контроли. Конфискувани се 296 килограми производи од канабис.
Италија во јуни одобри безбедносен декрет со кој се забранува така наречениот „легален“ канабис и трговијата со „лесен канабис“ или коноп се прогласува за нелегална трговијата, кој, за разлика од марихуаната, нема психоактивни ефекти.
Свет
Во САД заврши првата рунда разговори меѓу украинската и американската делегација, соопшти Зеленски
Украинскиот претседател Володимир Зеленски изјави дека во САД веќе е завршена првата рунда разговори меѓу украинската и американската делегација и оти очекува извештај од шефот на украинската делегација Рустем Умеров пред следната рунда преговори.
Зеленски го изјави тоа за време на заедничкото обраќање до медиумите со премиерот на Португалија Луис Монтенегро.
– Нашиот тим ќе ме контактира, така се договоривме, и ќе ми ги изнесе резултатите од првиот блок на дијалогот, по што ќе одлучиме како да продолжиме, рече Зеленски.
Тој додаде дека во САД се наоѓаат и претставници на Русија и Европа, истакнувајќи дека ќе може да зборува за деталите од разговорите откако ќе го добие извештајот од Умеров.
Свет
Американски напад врз Сирија, загинаа припадници на Исламска држава
Најмалку пет припадници на Исламска држава загинаа во синоќешните американски напади врз цели на ИД во Сирија, соопшти Сирискиот центар за набљудување на човековите права, со седиште во Лондон.
– Помеѓу загинатите е и „водачот на ќелија“, задолжен за беспилотни летала. Тие се убиени во покраината Деир ез Зор, изјави претставникот на Сирискиот центар, Рами Абдел Рахман.
САД синоќа соопштија дека погодиле повеќе од 70 цели во неколку области на Сирија. Според неименуван безбедносен извор нападите биле насочени кон ќелиите на ИД во покраините Хомс, Деир ез Зор и Рака.
Претседателот на САД, Доналд Трап на сопствената платформа „Трут соушл“ (Truth Social), откако Пентагон соопшти за операцијата против Исламска држава, објави – „Напаѓаме многу силно против бастионите на ИД“.
Американската армија изврши „масовен напад“ врз цели поврзани со ИД во Сирија, како одговор на смртоносниот напад врз американските сили. На 13 декември во пустинска област во централната сириска покраина Хомс загинаа двајца американски војници и еден цивилен преведувач. Вашингтон за нападот ја обвини џихадистичката група, но ИД не презеде одговорноста за нападот.
Целта на операцијата, според Вашингтон, е да се ослабат капацитетите на ИД за понатамошно дејствување и да се спречат напади врз американскиот персонал во Сирија. Во Сирија распоредени се околу 1.000 американски војници.
Американскиот секретар за одбрана Пит Хегсет изјави дека операцијата „Хајкај страјк“ (Hawkeye Strike) е насочена кон елиминација на „борци, инфраструктура и локации со оружје“ на ИД. Тој посочи дека метите се избрани за да се погодат клучните ресурси на ИД, вклучително и оперативните капацитети и логистичка поддршка.
– Ова не е почеток на војна – ова е декларација за одмазда. Денеска ги гоневме и убивме нашите непријатели. Многу од нив. И ќе продолжиме да го правиме тоа, наведе Хегсет на социјалните мрежи.
Изминатите месеци Коалицијата предводена од САД против ИД изврши неколку воздушни напади и копнени операции во Сирија, насочени кон осомничени членови на терористичката организација. Во операциите беа вклучени и припадници на сириските безбедносни сили.

