Свет
Едно од шест деца во светот живее во конфликтнa зонa, објави УНИЦЕФ

Повеќе деца од кога било досега живеат во конфликтни зони или биле насилно раселени од своите домови поради борби, објави Детскиот фонд на Обединетите нации (УНИЦЕФ).
Се проценува дека 473 милиони деца живеат во конфликтни области – повеќе од едно од шест деца во светот, се вели во извештајот на организацијата објавен денеска.
Процентот на такви деца е речиси двојно зголемен: од околу 10 отсто во 1990-тите на речиси 19 отсто денес, според УНИЦЕФ. Тие се убиени и ранети, принудени да го напуштат училиштето, немаат основни вакцини или страдаат од тешка неухранетост.
„Според секоја мерка, 2024 година беше една од најлошите години за децата во конфликт во историјата на УНИЦЕФ, како во однос на бројот на погодени деца, така и во однос на нивото на влијание врз нивните животи“, рече шефот на организацијата, Кетрин Расел.
„Детето кое расте во зона на конфликт е многу поверојатно да биде надвор од училиште, неухрането или избркано од својот дом. Ова не смее да биде новото нормално. Не смееме да дозволиме генерација на деца да стане колатерална штета од неконтролираните светски војни“, додаде.
Според УНИЦЕФ, 47,2 милиони деца биле раселени поради конфликти и насилство до крајот на 2023 година. Трендовите за 2024 година укажуваат на дополнително зголемување на раселувањето поради интензивирањето на различни конфликти, вклучително и во Хаити, Либан, Мјанмар, Палестина и Судан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Кина го губи „Тик-ток“ во САД, „Бајт денс“ останува со мал удел

Американскиот претседател Доналд Трамп потпиша уредба со која се потврдува договорот за одвојување на „Тик-ток“ од кинеската компанија „Бајт денс“ и пренос на мнозинскиот удел во рацете на американски инвеститори.
Според планот, конзорциум предводен од софтверскиот гигант „Оракл“ ќе управува со американските операции на „Тик-ток“, ќе ги чува податоците во домашни сервери и ќе добие лиценца за алгоритмот што препорачува содржини. Очекувањата се американските инвеститори да држат околу 80 отсто од уделите, додека „Бајт денс“ ќе остане со минорен дел.
„Тик-ток“ во САД има околу 180 милиони корисници, а со овој договор платформата ќе продолжи да биде достапна под американска контрола и построг надзор. Од администрацијата на Трамп велат дека целта е заштита на националната безбедност и податоците на корисниците.
Свет
Трамп: Нема да дозволам Израел да го анектира Западниот Брег

Американскиот претседател Доналд Трамп изјави дека нема да дозволи Израел да го анектира Западен Брег, одбивајќи ги барањата на дел од крајно десните израелски политичари за проширување на израелскиот суверенитет врз оваа територија.
„Не, нема да дозволам. Тоа нема да се случи. Доста е, време е ова да запре“, рече Трамп во Белата куќа, објаснувајќи дека темата ја покренал по телефонскиот разговор со премиерот Бенјамин Нетанјаху за состојбата во Појасот Газа.
Притисокот за анексија доаѓа од дел од десното крило на коалицијата на Нетанјаху, кое бара формално воведување на израелскиот суверенитет врз Западен Брег. Овие барања предизвикуваат силна загриженост кај арапските лидери, од кои дел се сретнаа со Трамп на маргините на Генералното собрание на Обединетите нации во Њујорк.
Западен Брег е освоен од Израел во војната во 1967 година. Палестинците со децении го бараат како дел од својата идна држава, заедно со Источен Ерусалим и Појасот Газа. На оваа територија денес живеат околу 2,7 милиони Палестинци и околу 700.000 израелски доселеници. Повеќето земји во светот не ги признаваат израелските населби таму и ги сметаат за нелегални според меѓународното право.
Изјавата на Трамп доаѓа во чувствителен момент на засилени судири во Газа и зголемен дипломатски притисок за изнаоѓање долгорочно решение за израелско-палестинскиот конфликт.
Свет
Трамп најави нови царини на лекови, камиони и мебел

Американскиот претседател Доналд Трамп објави дека од 1 октомври ќе стапат на сила нови царини: 100 отсто на увоз на брендирани лекови, 25 на тешки камиони, 50 на кујнски ормари и 30 проценти на тапациран мебел.
Трамп изјави дека целта е заштита на домашното производство и националната безбедност, додека Американската стопанска комора и повеќе сојузници предупредија дека мерките ќе ги погодат блиските трговски партнери и голем дел од индустријата.