Свет
„Епл“ силно погоден од царините; Аналитичар: Во Америка „ајфон“ може да чини 3.500 долари

Иако американскиот претседател Доналд Трамп најави 90-дневен прекин на многу од неговите царини, што им донесе пауза на некои компании и инвеститори, најголемата американска компанија „Епл“ нема толку среќа.
Технолошкиот гигант од Купертино е во голема мера зависен од синџирите на снабдување во Кина, а царините таму продолжуваат да растат. Кумулативната американска царинска стапка на кинески стоки сега изнесува дури 145 %.
Затоа, и покрај знаците за подобрување на американската трговска политика во глобален контекст, експертите посочуваат дека преговорите меѓу САД и Кина остануваат клучен фактор за „Епл“.
„Епл“ би можел да ја зголеми цената на телефоните „ајфон“ од Кина за 85 отсто
„’Епл’ може да биде уназаден со години со овие царини“, изјави Ден Ајвс, глобален шеф за технолошки истражувања во Wedbush Securities, за Си-ен-би-си. Тој додаде дека „Епл“ сега е „во ситуација кога нејзиниот брод се превртел среде океан, без чамци за спасување“.
„Епл“ со години се обидува да го диверзифицира својот синџир на снабдување надвор од Кина, но според истражувачката компанија „Омдија“, од 77 милиони „ајфони“ испорачани во САД минатата година, речиси 80 отсто се произведени во Кина.
Истата куќа проценува дека „Епл“, сакајќи да ги задржи профитните маржи, би морал да ги зголеми цените на „Ајфон“ телефоните од Кина за околу 85 отсто доколку важат сегашните царини.
„Кога првичните кинески царини беа 54 отсто, влијанието беше силно, но управливо… Но, сега, под овие услови, повеќе не се исплати ‘Епл’ да ги зголемува цените“, рече Ле Ксуан Чиу, менаџер за истражување во „Омдија“.
„Епл“ има многу малку опции на масата
Според „Ројтерс“ и индискиот весник „Тајмс оф Индија“, „Епл“ наводно успеал да испорача 600 тони „ајфони“ или околу 1,5 милиона уреди од Индија во САД пред да почнат новите царини. „Епл“ и неговите два производитела на „ајфон“ не одговорија на барањето на Си-ен-би-си.
Чиу посочува дека, иако оваа информација не е официјално потврдена, складирањето резерви би било најдобро краткорочно решение за ублажување на ефектите од царините и купување време.
Сепак, не е јасно колку долго би можеле да траат тие резерви, особено ако купувачите брзаат да го добијат „ајфон“ пред најавеното зголемување на цената, додава тој.
Поставувањето на производството во Индија може да трае со години
Според „Омдија“, среднорочната стратегија на „Епл“ е да ја намали изложеноста на геополитички ризици и тарифи, при што сè повеќе се потпира на производството и извозот на „ајфон“ од Индија.
Привремената пауза на Трамп, веројатно, ќе ја задржи основната царина на Индија на 10 проценти, барем засега, што на земјата ќе ѝ даде поповолна влезна точка на американскиот пазар.
Но, изградбата на производствен капацитет во Индија трае со години. Индиските партнери дури минатата година почнаа да ги произведуваат најскапите модели на „ајфон“ – „про“ и „про макс“.
Според Чиу, ќе бидат потребни најмалку уште една или две години за индиското производство навистина да се зголеми и да ја задоволи побарувачката, а тоа доаѓа со свои царински ризици.
Дали „Епл“ може да добие ослободување?
Аналитичарите веруваат дека најдобрата опција на „Епл“ би била да бара ослободување од царините за увоз од Кина додека не го консолидира својот синџир на снабдување надвор од земјата.
Компанијата делумно доби вакво ослободување за време на првиот мандат на Трамп, а некои аналитичари веруваат дека тоа би можело да се повтори.
„Сè уште гледам простор за олеснување преку отстапки за ‘Епл’, со оглед на нивната инвестициска посветеност од 500 милијарди долари во САД“, рече Даниел Њуман, директор на компанијата за анализа The Futurum Group. „Сè уште не се зборува многу за тоа – но јас сум оптимист дека компаниите што се обврзуваат да се прошират во САД би можеле да добијат некакво олеснување“.
„Епл“ во февруари објави дека планира да инвестира 500 милијарди долари во САД и да отвори 20.000 работни места.
Сепак, Трамп постојано изјавува дека верува оти „Епл“ може да произведува „ајфон“ во САД иако аналитичарите се сомневаат во изводливоста на овојплан. Аналитичарот на Wedbush, Ден Ајвс, проценува дека цената на еден „ајфон“ произведен во САД би била околу 3.500 долари во споредба со вообичаените 1.000 долари.
Во меѓувреме, некои аналитичари предупредуваат дека ниту трговскиот договор ниту евентуалното ослободување од тарифи може да биде доволно за „Епл“ да избегне негативни последици.
„Да претпоставиме дека има отстапка – или преку намалување на царините за Кина или преку специјално ослободување за ‘Епл’“, вели Крег Мофет, коосновач и висок аналитичар во истражувачката компанија MoffettNathanson.
„И тоа не би го решило проблемот. Дури и основната тарифа од 10 проценти е огромен предизвик за ‘Епл’“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Затворската казна за Саркози ја подели земјата околу тоа како судиите се справуваат со случаите на политички криминал

Затворската казна изречена на поранешниот француски претседател Никола Саркози ја подели земјата околу тоа како судиите се справуваат со случаите на политички криминал, додека лидерката на крајната десница Марин Ле Пен се подготвува да се обиде да ја поништи пресудата за проневера и да се кандидира за претседател во 2027 година, објави Ројтерс.
Парискиот суд ја шокираше политичката сцена во четвртокот кога на Саркози му изрече казна затвор од пет години затвор за криминален заговор во врска со обидот за собирање средства за кампања во Либија, објави агенцијата.
Саркози ќе биде и првиот претседател на Франција по Втората светска војна, кој ќе биде затворен.
Свет
Зеленски ќе возврати ако Москва предизвика прекин на електричната енергија во Украина

Претставници на украинската Влада ќе ги посетат Соединетите Американски Држави кон крајот на септември или октомври за разговори за прашања, како што се економијата и оружјето, изјави денеска украинскиот претседател Володимир Зеленски.
Украинскиот претседател беше во САД оваа недела, каде учествуваше на Генералното собрание на Обединетите нации и се сретна со американскиот претседател Доналд Трамп.
Тој рече дека споделил со Трамп „одредена визија за тоа што може да се направи“ како одговор на руските дејствија. Зеленски вети дека ќе возврати доколку Москва предизвика прекин на електричната енергија во Украина.
Свет
Најголемата воена база во Данска ја надлетуваат неидентификувани беспилотни летала

Неидентификувани беспилотни летала синоќа се регистрирани над најголемата воена база во Данска, соопшти данската полиција.
– Можам да потврдам дека во петокот околу 20 часот и 15 минути имавме мал инцидент што траеше неколку часа. Еден или два дрона се забележани пред и над воздухопловната база во Каруп. Не ги соборивме, изјави претставник на данската полиција.
Изминатите денови дронови надлетуваа над цивилни и воени објекти, поради што привремено беше затворен воздушниот простор на Данска.
Премиерката на Данска, Мете Фредериксен претходните инциденти со нарушувањето на воздушниот простор ги поврза со наводни руски активности со дронови низ Европа, но не понуди докази. Москва ги негираше обвинувањата.