Францускиот претседател Емануел Макрон изразил подготвеност за телефонски разговор со рускиот претседател Владимир Путин, под услов Владимир Зеленски и европските лидери да се договорат, пишува францускиот весник „Поан“.

– Подготвен сум да разговарам со претседателот Путин, кога претседателот Зеленски, нашите европски партнери и јас ќе оцениме дека е дојден вистинскиот момент – рече Макрон.

Претходно, францускиот претседател веќе изрази подготвеност да разговара со Путин кога ќе дојде соодветниот момент. Според Макрон, тоа би можело да се случи во текот на претстојниот циклус на преговори.

Портпаролот на Кремљ, Дмитриј Песков, коментирајќи ја претходно намерата на Макрон, рече дека нема барање за организирање телефонски разговор меѓу лидерите на двете земји, пренесува Спутник.

Американскиот Стејт департмент подготвил планови за затворање на десетина конзулати до ова лето, објави денеска „Њујорк Тајмс“, цитирајќи американски официјални претставници.

Стејт департментот размислува за затворање на повеќе мисии, пишува весникот, пренесе Ројтерс.

Меѓу десетте конзулати ќе бидат затворени главно оние во Западна Европа, велат тројца функционери кои се запознаени со меморандумот што кружи во Стејт департментот, се додава во извештајот, пренесува Танјуг.

Полската војска ги подигна своите воздухопловни сили и ги стави во состојба на готовност за да го заштити својот воздушен простор за време на руските напади врз западна Украина, соопшти Оперативната команда на полските вооружени сили.

„Поради интензивните активности на руската авијација со долг дострел, која врши напади врз цели во западна Украина, полските и сојузничките авиони почнаа со операции во нашиот воздушен простор“, се вели во соопштението на платформата Икс.

Оперативната команда соопшти дека „сите расположливи сили и ресурси се активирани. Дежурните борбени ескадрили се подигнати во воздух, а системите за противвоздушна одбрана и радарските единици се доведени на највисоко ниво на подготвеност“.

Целта на овие мерки, како што наведуваат полските власти, е „да се обезбеди безбедност во пограничните области“. Патем, полската војска редовно издава такви предупредувања кога западните делови на Украина се цел на руски напади.