Свет
„Ердоган е силен и полн со енергија“ – турскиот претседател продолжува со кампањата и претседателските должности
Турскиот лидер Реџеп Таип Ердоган е „исклучително силен“ и ќе продолжи да ја води земјата, изјави денеска шефот на Канцеларијата за комуникации на турскиот претседател, Фахртин Алтун.
„Целта на гласините и дезинформациите за здравјето на нашиот претседател е да ја свртат политичката ситуација. Нашиот претседател е исклучително силен и полн со енергија и ќе ја води државата долго време“, рече Алтун.
Тој додаде дека Ердоган продолжува активно да ги извршува своите претседателски должности, пренесува „ТАСС“.
Турскиот министер за здравство, Фахретин Коџа изјави дека Ердоган се чувствува подобро откако се лекува од недамнешна инфекција и наскоро ќе ја продолжи изборната кампања.
„Претседателот е во одлична здравствена состојба. Ефектите од инфекцијата врз неговото тело се намалија. Се сретнав со него и тој испраќа поздрав до сите. Наскоро ќе продолжи со работа во рамките на предизборната кампања“, рече тој.
Ердоган беше хоспитализиран вчера откако се чувствуваше лошо за време на телевизиско интервју. Подоцна беше објавено дека се работи само за стомачен грип. „ТАСС“ јавува дека болеста на Ердоган поттикна гласини дека тој страда од сериозни здравствени проблеми, но турските власти ги отфрлија таквите наводи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Русија има сила повторно да го нападне Киев, изјави Зеленски за АФП
Претседателот на Украина, Володимир Зеленски во интервју за Агенцијата Франс прес (АФП) изјави дека не верува оти Русија има сила повторно да го нападне Киев.
Тие немаат сила за голема офанзива против главниот град, како што имаа на почетокот на инвазијата, посочи Зеленски додавајќи оти главни цели на Кремљ се Харков и Донбас.
Тој ги обвини западните земји што му забраниле да ја нападне Русија со нивното оружје.
„Русите можат да не нападнат на наша територија, тоа е најголемата предност што ја има Русија, но ние не можеме да направиме ништо со западното оружје на нивните вооружени системи лоцирани на руска територија. Немаме право“, вели Зеленски.
Според него, Западот се плаши и од руски и од украински пораз и оваа ситуација ја нарече апсурдна.
„Ние сме во апсурдна ситуација кога Западот се плаши дека Русија ќе ја изгуби војната. А во исто време тие не сакаат Украина да ја изгуби. Затоа што конечната победа на Украина ќе доведе до пораз на Русија и конечна победата на Русија ќе доведе до пораз на Украина“, истакна Зеленски.
Регион
Пленковиќ, хрватскиот премиер кој доби трет мандат најави прва седница за понеделник
Откако хрватскиот Сабор вчера ја поддржа 16. Влада на Република Хрватска, а третата предводена од лидерот на Хрватската демократска заедница (ХДЗ) Андреј Пленковиќ, тој во изјава за медиумите рече дека првата седница на новата Влада ќе биде во понеделник и најави продолжување на посветената работа во интерес на хрватскиот народ.
„Благодарам на мнозинството во хрватскиот Сабор што ни ја укажа довербата да станеме Влада на Република Хрватска по трет пат и ние, како што правевме претходните осум години, посветено ќе работиме во интерес на хрватскиот народ, сите наши сограѓани, економијата, врската меѓу татковината и иселениците Хрвати и да спроведеме програма врз основа на која ја добивме довербата на хрватските гласачи“, рече Пленковиќ откако Собранието гласаше за неговата трета Влада
Тој им се заблагодари на сите партнери кои ја поддржаа Владата.
Пратениците во хрватскиот Сабор вчера гласаа за доверба на новата влада на премиерот Андреј Пленковиќ.
За доверба на Владата гласаа 79 пратеници, против беа 61 пратеник, а еден беше воздржан.
Свет
Убиени тројца странски туристи и еден Авганистанец
Вчера од вооружени лица во централен Авганистан се убиени тројца странски туристи и еден Авганистанец, а четворица странски државјани и тројца Авганистанци се ранети, соопшти талибанското Министерство за внатрешни работи.
Според светските агенции не е позната националноста на туристите, ниту кој го извршил нападот за кој што се уапсени четири лица.