Свет
Ердоган му испрати порака на Асад: Војната во Сирија дојде во нова фаза
Турскиот претседател Реџеп Таип Ердоган денеска го повика својот сириски колега Башар ал Асад итно да најде политичко решение и да се помири со својот народ.
„Сирискиот режим мора итно да соработува со својот народ во корист на сеопфатно политичко решение“, рече шефот на турската држава за време на телефонскиот разговор со генералниот секретар на ОН, Антонио Гутереш, се наведува во соопштението на турското претседателство.
„Претседателот Ердоган рече дека Турција работи на намалување на тензиите, заштита на цивилите и трасирање на патот за политичкиот процес и ќе продолжи да го прави тоа“, соопшти турското претседателство, нагласувајќи дека „сирискиот конфликт достигна нова фаза“. „Режимот мора да се помири со сопствениот народ и со легитимната опозиција“, инсистираше Ердоган по долгиот состанок со неговиот Совет за национална безбедност.
Тој, исто така, ја потврди својата цврста поддршка за заштита на територијалниот интегритет и единство на Сирија, велејќи дека е подготвен да ги даде сите потребни придонеси во овој поглед.
„Најголемата желба на Турција е Сирија да не потоне во поголема нестабилност и да не претрпи повеќе цивилни жртви“, увери Ердоган за време на средбата со Гутереш.
Турција, која дели повеќе од 900 километри долга граница со Сирија, прифаќа речиси три милиони сириски бегалци на своја територија, според светските агенции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Русија потврди дека извршила напад врз украински воени и енергетски објекти
Руското Министерство за одбрана соопшти денеска дека Москва синоќа извршила напад врз украинските воено-индустриски и енергетски објекти како одговор на тоа што го нарече „терористички напади“, објавија светските агенции.
„Како одговор на терористичките напади на Украина врз цивилни објекти на руска територија, синоќа вооружените сили на Руската Федерација извршија напад со високопрецизно оружје и беспилотни летала врз претпријатија од воено-индустрискиот комплекс на Украина и енергетски објекти кои го обезбедуваат нивното работење. Целите на нападот се исполнети. Сите целни објекти се погодени“, се вели во соопштението на министерството.
Во меѓувреме, Каспискиот козорциум за гасовод (КТК) денеска соопшти дека ги прекинал своите операции откако неговото пристаниште во Русија на брегот на Црното Море било сериозно оштетено во напад од украински воени беспилотни летала.
Свет
162 лица загинаа во поплавите во јужен Тајланд
Портпаролот на тајландската Влада, Сирипонг Ангкасакулкиат денеска изјави дека 162 лица го загубиле животот во поплавите во јужен Тајланд, пренесуваат агенциите.
Околу еден милион домаќинства и повеќе од три милиони луѓе се погодени во поплавите во 12 провинции во јужен Тајланд предизвикани од обилните дождови во последните неколку дена.
Тајландскиот премиер Анутин Чарнвиракул претходно прогласи вонредна состојба во провинцијата Сонгкла. Поплавите го погодија и најголемиот град во јужен Тајланд, Хат Јаи.
Свет
Без струја останаа повеќе од 600.000 луѓе по руските напади во Украина
Повеќе од 600.000 луѓе останаа без електрична енергија во Украина по руските напади со ракети и беспилотни летала, соопшти украинското Министерство за енергетика.
„Како резултат на нападите, повеќе од 500.000 потрошувачи во Киев и повеќе од 100.000 потрошувачи во неговиот регион останаа утринава без електрична енергија“, наведе Министерството.
Како што беше додадено, речиси 8.000 луѓе во регионот на Харков останаа без електрична енергија. Нападите започнаа синоќа и продолжија утрово.

