Свет
Ердоган положи заклетва, вети дека ќе биде достоен лидер на сите граѓани на Турција
Ветувам дека ќе бидам достоен лидер на сите граѓани на Турција. Ќе се трудам да бидам достоен на довербата на 81-милионската нација, вклучително и на оние Турци кои не гласаа за мене. Денеска го означуваме почетокот на една нова Турција. Се надевам дека претседателскиот систем на управување ќе придонесе за идниот развој на земјата, порача турскиот претседател, Реџеп Таип Ердоган, на церемонијата на неговата инаугурација за новиот претседателски мандат што се одржа на плоштадот пред претседателската палата „Бештепе“ во Анкара.
Со почетокот на новиот мандат на Ердоган, стапија во сила уставните измени со кои Турција се трансформира од парламентарна во претседателска република. Според Еродган, првпат по распадот на Отоманската Империја, Турција направила „историски избор не под притисок или со воен удар, туку преку слободно изразување на волјата на турскиот народ“.
„Во новиот период на својот развој, земјата ќе оствари напредок во сите правци, од демократијата и почитувањето на човековите права, до економијата и крупните инвестиции“, рече тој, додавајќи дека Турција ќе ја засили својата моќ, ќе продолжи да ја развива одбранбената индустрија и ќе ги штити своите граници.
На церемонијата, на која присуствуваа над 50 шефови на држави или влади и претседатели на парламенти од целиот свет, требаше да има и свечен дел, но тој беше откажан поради синоќешната железничка несреќа во северозападниот дел на Турција, при која загинаа 24 лица, а 124 беа повредени. Наместо свеченоста, по обраќањето на Ердоган се одржа молитва за жртвите на несреќата. Претходно Ердоган пред пратениците во турскиот парламент положи свечена заклетва, со што официјално почна да тече неговиот нов претседателски мандат.
По полагањето на свечената заклетва во парламентот со која се обврза на почитување на Уставот, Ердоган го посети мавзолејот на основачот на Турската Репубика и прв претседател на Турција, Мустафа Кемал Ататурк. Според најавите, вечерва Ердоган ќе го објави и составот на неговата Влада. Според извори на претседателскиот кабинет, новата Влада ќе има 16 наместо досегашните 23 министри, како и девет високи комисии задолжени за различни сектори.
Со уставните измени, функцијата премиер се укинува и претседателот на државата е воедно и шеф на владата. Првата седница на новиот Кабинет треба да се одржи на 13 јули.
Долгогодишниот турски лидер Ердоган победи уште во првиот круг од претседателските избори одржани на 24 јуни и доби нов петгодишен мандат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Бакингемската палата ја објави здравствената состојба на кралот Чарлс: познато кога ќе се врати на должностите
Кралот Чарлс ќе продолжи со јавните ангажмани следната недела откако е постигнат охрабрувачки напредок во лекувањето на ракот, објави Бакингемската палата.
За кралот тоа нема да биде целосно враќање на официјалните ангажмани, но палатата испраќа позитивни сигнали, јавува Би-Би-Си.
Следниот вторник кралот ќе започне со симболично патување во центар за лекување рак, пренесува медиумот.
Неговите летни планови вклучуваат државна посета, каде што ќе биде домаќин на императорот и царицата на Јапонија.
Во наредните недели, соопштија од палатата, тој ќе преземе неколку надворешни ангажмани.
Свет
Стари книги обложени со отров отстранети од Француската национална библиотека
Властите отстранија четири книги од Француската национална библиотека поради можноста нивните корици да содржат отровен арсен. Имено, некои книги од 19 век, печатени во Британија, имаат смарагдно зелени корици. Арсенот често се користел за боење книги во тоа време.
Научниците од Универзитетот во Делавер во САД ги класифицираа отстранетите томови како потенцијално опасни, но библиотеката вели дека ракувањето со овие книги би предизвикало само мала штета на здравјето. „Ги ставивме во карантин овие дела. Ќе ги анализираме во лабораторија за да можеме да процениме колку арсен е присутен во секој том“, рече портпаролот на Француската национална библиотека, а пренесе Би-би-си.
Списокот на потенцијално опасни книги е составен од „Poison Book Proect“ , иницијатива покрената од научници од Универзитетот во Делавер во соработка со музејот Винтертур во Делавер. Од 2019 година, тимот тестираше стотици корици книги за тешки метали и состави листа на наслови кои се потенцијално опасни.
Издавачите од викторијанската ера користеле арсен за да ги обојат кориците. Светската здравствена организација (СЗО) предупреди на долгорочна изложеност на арсен во водата за пиење и храната, велејќи дека супстанцијата е многу токсична. Сепак, таа не дала никакви упатства за ракување со предмети што го содржат овој отров.
Во 2022 година, библиотекарите во Лидс, Англија открија ретка книга со арсен. Библиотекар ја открил потенцијално отровната книга додека ја споредувал збирката на библиотеката со базата на податоци на проектот „Poison Book“.
Свет
Мигранти плаќале 18.000 евра за превоз преку Ла Манш, биле сексуално експлоатирани
Виетнамска криминална мрежа беше пресечена со акција на полициите на Франција и Англија, со поддршка на Европол.
Оваа група шверцувала мигранти преку Ла Манш и организирала нивна сексуална и трудова експлоатација како и перење пари.
Главниот организатор, идентификуван како десна рака на водачот на оваа банда, го организирал шверцот, додека друг нивни соучесник бил задолжен за собирање пари и организирање на транспортот на мигрантите, кои плаќале од 15.000 до 18.000 евра за превоз преку каналот , соопшти Европол.
На пат од Полска за Франција, некои од мигрантите шверцувале метамфетамин во парискиот регион, снабдувајќи ги азиските групи за шверц на дрога со седиште во областа во замена за намалена цена на патувањето.
Уапсени се 16 членови на оваа група и одземени се разновидна луксузна стока, 100.000 евра во кеш и уште 298.000 евра на банкарски сметки.