Свет
Ердоган ќе побара од парламентот дозвола за испраќање трупи во Либија
Претседателот на Турција, Реџеп Таип Ердоган, рече дека кога парламентот ќе се врати на работа во јануари, ќе побара од законодавците дозвола да испратат воен персонал во Либија, пренесува турскиот телевизиски канал НТВ.
„Штом парламентот се врати на работа по одморот, ќе поднесеме барање за испраќање трупи во Либија. Ако добиеме соодветна покана од Либија за испраќање војници, ќе ја прифатиме“, рече тој додавајќи дека турските трупи не би оделе никаде без барање од Триполи.
„Ќе обезбедиме секаква поддршка за властите во Триполи, кои се борат против бунтовничкиот генерал поддржан од некои европски и арапски земји. Тие му помагаат додека ние сме на страната на легитимната влада на Либија“, рече Ердоган.
Исто така, тој го спомена меморандумот за разбирање за разграничување на поморските зони, потпишан меѓу Турција и Либија во Триполи на 28 ноември, што предизвика остри критики од Грција.
„Овој документ стапи во сила. Нашата цел не е да се одземат нечии права на Медитеранот, туку да се спречи узурпација на нашите права. Некои би сакале да ги ограничат нашите интереси на нашето крајбрежје. Договорот е целосно легитимен“, рече тој.
Во Либија постојат две паралелни тела на извршната власт – меѓународно признатата влада на национален договор на Фајез Сараџ и кабинетот на привремената влада предводена од Абдула Ал-Тани на истокот на земјата.
Ал-Тани е поддржан од Либиската национална армија предводена од маршалот Калифа Хафтар. Хафтар на 12 декември изјави дека неговите сили почнуваат решавачка битка за главниот град. Командата на ЛНА во повеќе наврати рече дека ќе се спротивстави на каква било странска интервенција во внатрешните работи во Либија и предупреди дека ќе потопува бродови и ќе соборува авиони што носат воена помош од Турција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Бакингемската палата ја објави здравствената состојба на кралот Чарлс: познато кога ќе се врати на должностите
Кралот Чарлс ќе продолжи со јавните ангажмани следната недела откако е постигнат охрабрувачки напредок во лекувањето на ракот, објави Бакингемската палата.
За кралот тоа нема да биде целосно враќање на официјалните ангажмани, но палатата испраќа позитивни сигнали, јавува Би-Би-Си.
Следниот вторник кралот ќе започне со симболично патување во центар за лекување рак, пренесува медиумот.
Неговите летни планови вклучуваат државна посета, каде што ќе биде домаќин на императорот и царицата на Јапонија.
Во наредните недели, соопштија од палатата, тој ќе преземе неколку надворешни ангажмани.
Свет
Стари книги обложени со отров отстранети од Француската национална библиотека
Властите отстранија четири книги од Француската национална библиотека поради можноста нивните корици да содржат отровен арсен. Имено, некои книги од 19 век, печатени во Британија, имаат смарагдно зелени корици. Арсенот често се користел за боење книги во тоа време.
Научниците од Универзитетот во Делавер во САД ги класифицираа отстранетите томови како потенцијално опасни, но библиотеката вели дека ракувањето со овие книги би предизвикало само мала штета на здравјето. „Ги ставивме во карантин овие дела. Ќе ги анализираме во лабораторија за да можеме да процениме колку арсен е присутен во секој том“, рече портпаролот на Француската национална библиотека, а пренесе Би-би-си.
Списокот на потенцијално опасни книги е составен од „Poison Book Proect“ , иницијатива покрената од научници од Универзитетот во Делавер во соработка со музејот Винтертур во Делавер. Од 2019 година, тимот тестираше стотици корици книги за тешки метали и состави листа на наслови кои се потенцијално опасни.
Издавачите од викторијанската ера користеле арсен за да ги обојат кориците. Светската здравствена организација (СЗО) предупреди на долгорочна изложеност на арсен во водата за пиење и храната, велејќи дека супстанцијата е многу токсична. Сепак, таа не дала никакви упатства за ракување со предмети што го содржат овој отров.
Во 2022 година, библиотекарите во Лидс, Англија открија ретка книга со арсен. Библиотекар ја открил потенцијално отровната книга додека ја споредувал збирката на библиотеката со базата на податоци на проектот „Poison Book“.
Свет
Мигранти плаќале 18.000 евра за превоз преку Ла Манш, биле сексуално експлоатирани
Виетнамска криминална мрежа беше пресечена со акција на полициите на Франција и Англија, со поддршка на Европол.
Оваа група шверцувала мигранти преку Ла Манш и организирала нивна сексуална и трудова експлоатација како и перење пари.
Главниот организатор, идентификуван како десна рака на водачот на оваа банда, го организирал шверцот, додека друг нивни соучесник бил задолжен за собирање пари и организирање на транспортот на мигрантите, кои плаќале од 15.000 до 18.000 евра за превоз преку каналот , соопшти Европол.
На пат од Полска за Франција, некои од мигрантите шверцувале метамфетамин во парискиот регион, снабдувајќи ги азиските групи за шверц на дрога со седиште во областа во замена за намалена цена на патувањето.
Уапсени се 16 членови на оваа група и одземени се разновидна луксузна стока, 100.000 евра во кеш и уште 298.000 евра на банкарски сметки.