Европа
Ерменскиот премиер: Сакаме мир и воспоставување дипломатски односи со Азербејџан

Ерменија се надева дека ќе склучи мировен договор и ќе воспостави дипломатски односи со Азербејџан во наредните месеци, изјави денеска ерменскиот премиер, Никол Пашинјан. По децении непријателства меѓу Баку и Ереван, Азербејџан минатиот месец ја презеде контролата врз Нагорно-Карабах со молскавична офанзива предизвикувајќи масовен егзодус на повеќето од 120.000 етнички Ерменци во регионот во соседна Ерменија.
Оттогаш двете земји ја изразија својата подготвеност да потпишат мировен договор иако напредокот е бавен и продолжува да има редовни гранични престрелки.
„Во следните месеци (се надеваме) ќе потпишеме договор со Азербејџан за мир и воспоставување дипломатски односи“, рече Пашинјан на форумот во Тбилиси, на кој присуствуваа премиерите на Азербејџан и Грузија.
Азербејџанскиот премиер, Али Асадов, изјави на форумот дека Баку е посветен на мирот и обновувањето на транспортните врски со Ерменија од 2020 година, но напредокот зависи од Ереван. Карабах, кој меѓународната заедница го смета за дел од Азербејџан, е под контрола на етничките Ерменци од распадот на Советскиот Сојуз во 90-тите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски пристигнува на погребот на папата

Украинскиот претседател Володимир Зеленски ќе присуствува на погребот на папата Франциско, пренесе АФП повикувајќи се на извор од украинскиот претседателски кабинет.
Според истиот извор, канцеларијата на Зеленски ја подготвува неговата посета на Рим за Зеленски лично да се прости од поглаварот на Католичката црква.
Како што претходно беше најавено, погребот на папата Франциско ќе се изврши в сабота, 26 април, во 10 часот по локално време. Досега Трамп и Макрон потврдија дека ќе бидат на погребот, но се очекува да присуствуваат многубројни светски лидери и стотици илјади верници.
Европа
Украина: Русите го зголемуваат военото присуство во Мариупол

Руските сили продолжуваат да го зголемуваат своето воено присуство во привремено окупираниот град Мариупол. Како што соопшти денеска на „Телеграм“ градскиот совет на Мариупол, во градот веќе се формирани две воени бази.
„Руските окупатори го прошируваат своето воено присуство во Мариупол“, се вели во соопштението.
Според Центарот за проучување на окупацијата, во текот на март и април 2025 година се појавиле две нови воени бази: една во областа Калмиус на северозапад од градот и логистичка база во областа Ливобережњи, во станбената зона Шхидни. Втората база, како што се наведува, главно се користи за сместување персонал и воена опрема.
„На овој начин руските окупатори постепено го зголемуваат своето присуство во Мариупол. Центарот за проучување на окупацијата нагласува дека ова е план за трансформирање на градот во главна и полноправна логистичка и воена база не само за стоки туку и за опрема и персонал, со широка мрежа на паркинзи, бази за поправка и точки на трајно и привремено распоредување персонал. Ова е олеснето и со развојот на железничките и пристанишните врски што ги спроведуваат окупаторските власти“, се вели во соопштението на градскиот совет на Мариупол.
Европа
Знамиња со кукасти крстови се појавија во Стокхолм на роденденот на Хитлер, полицијата почна истрага

Три нацистички знамиња со кукасти крстови беа поставени на влезот на автопат во областа Есингеледен во Стокхолм, главниот град на Шведска, на 20 април, на роденденот на Адолф Хитлер.
Портпаролот на полицијата во Стокхолм, Матс Ериксон, изјави дека започнале истрага за злосторство од омраза.
Ериксон нагласи дека не е соодветно да се случуваат такви работи во Шведска. Тој посочи дека на влезовите на автопатите често се појавуваат транспаренти со политички пораки.
„Конкретно активистите споделуваат политички пораки бидејќи тука има густ сообраќај. Не е убаво да се споделуваат такви пораки“, рече Ериксон.
Тој додаде дека нацистичкото знаме најверојатно било поставено за да го одбележи роденденот на нацистичкиот диктатор Адолф Хитлер, кој е роден на 20 април.