Европа
Естонската премиерка: Итно треба да развиеме европска одбрана и лидер што ќе го направи тоа

Естонската премиерка Каја Калас ја поддржа идејата за именување европски комесар посветен на одбранбената индустрија бидејќи Европската Унија се обидува да стане посилен играч во областа.
Во интервју за „Ројтерс“, Калас рече дека има итна потреба да се развие европската одбранбена индустрија.
Претседателката на Европската комисија, Урсула фон дер Лајен, ја поттикна дебатата кога вети дека комисијата ќе има комесар за одбрана доколку добие втор мандат подоцна оваа година.
Идејата покажува како одбраната стана важно прашање на европската политичка агенда. Лидерите на ЕУ ветија дека ќе ги зголемат трошоците за одбрана и производството на оружје поради стравувањата од руската инвазија на Украина и идните безбедносни обврски на САД кон Европа.
Некои политичари и дипломати сметаат дека идејата на Фон дер Лајен е знак дека Европа станува посериозна во однос на одбраната. Други тврдат дека одбранбената политика е домен на членките на ЕУ и дека предлогот ризикува опасно удвојување со НАТО.
Калас рече дека таквата позиција би имала смисла доколку портфолиото е фокусирано на индустријата.
„Ако идејата е за одбранбената индустрија и нејзиниот понатамошен развој, тогаш има итна потреба и тогаш би можеле да имаме лидер што се занимава само со тоа прашање“, рече таа во средата во Брисел по пристигнувањето на самитот на ЕУ.
„Не сакаме да ги замаглиме границите меѓу НАТО и Европската Унија“, додаде таа.
„Во однос на воената криза, важно е кој кому наредува, како навистина функционира синџирот на команда. Тоа е НАТО, воено. Но, зајакнувањето на одбранбената индустрија – Европската Унија и овде има што да каже“, рече Калас.
Калас предложи заедничко задолжување на ЕУ за финансирање поголеми инвестиции во одбраната, предлог поддржан од францускиот претседател, Емануел Макрон. Сепак, фискално претпазливите земји, како Германија, Австрија и Шведска, се скептични.
Калас смета дека ваквото задолжување е итно потребно, дури и ако земјите преземат други мерки за зголемување на трошоците за одбрана на среден и долг рок.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски пристигнува на погребот на папата

Украинскиот претседател Володимир Зеленски ќе присуствува на погребот на папата Франциско, пренесе АФП повикувајќи се на извор од украинскиот претседателски кабинет.
Според истиот извор, канцеларијата на Зеленски ја подготвува неговата посета на Рим за Зеленски лично да се прости од поглаварот на Католичката црква.
Како што претходно беше најавено, погребот на папата Франциско ќе се изврши в сабота, 26 април, во 10 часот по локално време. Досега Трамп и Макрон потврдија дека ќе бидат на погребот, но се очекува да присуствуваат многубројни светски лидери и стотици илјади верници.
Европа
Украина: Русите го зголемуваат военото присуство во Мариупол

Руските сили продолжуваат да го зголемуваат своето воено присуство во привремено окупираниот град Мариупол. Како што соопшти денеска на „Телеграм“ градскиот совет на Мариупол, во градот веќе се формирани две воени бази.
„Руските окупатори го прошируваат своето воено присуство во Мариупол“, се вели во соопштението.
Според Центарот за проучување на окупацијата, во текот на март и април 2025 година се појавиле две нови воени бази: една во областа Калмиус на северозапад од градот и логистичка база во областа Ливобережњи, во станбената зона Шхидни. Втората база, како што се наведува, главно се користи за сместување персонал и воена опрема.
„На овој начин руските окупатори постепено го зголемуваат своето присуство во Мариупол. Центарот за проучување на окупацијата нагласува дека ова е план за трансформирање на градот во главна и полноправна логистичка и воена база не само за стоки туку и за опрема и персонал, со широка мрежа на паркинзи, бази за поправка и точки на трајно и привремено распоредување персонал. Ова е олеснето и со развојот на железничките и пристанишните врски што ги спроведуваат окупаторските власти“, се вели во соопштението на градскиот совет на Мариупол.
Европа
Знамиња со кукасти крстови се појавија во Стокхолм на роденденот на Хитлер, полицијата почна истрага

Три нацистички знамиња со кукасти крстови беа поставени на влезот на автопат во областа Есингеледен во Стокхолм, главниот град на Шведска, на 20 април, на роденденот на Адолф Хитлер.
Портпаролот на полицијата во Стокхолм, Матс Ериксон, изјави дека започнале истрага за злосторство од омраза.
Ериксон нагласи дека не е соодветно да се случуваат такви работи во Шведска. Тој посочи дека на влезовите на автопатите често се појавуваат транспаренти со политички пораки.
„Конкретно активистите споделуваат политички пораки бидејќи тука има густ сообраќај. Не е убаво да се споделуваат такви пораки“, рече Ериксон.
Тој додаде дека нацистичкото знаме најверојатно било поставено за да го одбележи роденденот на нацистичкиот диктатор Адолф Хитлер, кој е роден на 20 април.