Свет
ЕУ ги блокира пратките со вакцини против Ковид-19 за Австралија

Австралискиот премиер Скот Морисон ја обвини Европската Унија за бавното вакцинирање во Австралија тврдејќи дека нејзиното блокирање на пратките со вакцини до Канбера е причина земјата да заостане далеку од планираната стапка на вакцинација, пренесува РТ.
Иако Австралија успеа да се справи со Ковид-19 преку строги ограничувања и внатрешни целосни затворања, досега успеа да администрира само 670.000 дози вакцини против Ковид-19, далеку под целта на владата за 4 милиони вакцинирани до 31 март.
Зборувајќи за неисполнетата цел, Морисон рече дека владата го напуштила првичниот план пред неколку месеци кога станало јасно дека одлуката на ЕУ да ги блокира пратките очигледно ќе влијае на планираните цели.
Во моментот ЕУ блокира повеќе од милион дози вакцини против Ковид-19, кои требаше да помогнат во ситуацијата во Папуа Нова Гвинеја и најмалку четвртина милион вакцини што требаше да пристигнат во Австралија.
Иако Канбера првично ја сфаќаше одлуката на ЕУ поради зголемувањето на бројот на случаи во цела Европа, континуираните ограничувања на извозот на вакцини предизвикаа фрустрација, а австралискиот министер за финансии, Сајмон Бирмингем, го нападна Брисел поради неговата одлука да не ги почитува правилата.
Морисон се соочува со сè посилни критики во Австралија. Критичарите ги цитираат неговите коментари дадени на почетокот од пандемијата кога тврдеше дека Канбера е на почетокот од редицата за вакцини, а неговата цел е целосно да ги вакцинира сите возрасни до октомври, што сега изгледа сè поневеројатно.
Австралискиот премиер се бранеше од овие напади, дури и од членовите на сопствената партија, тврдејќи дека тоа не е трка и ги отфрла критиките на оние што, како што вели, сакаат да си играат политика со вакцините и нивната дистрибуција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Пожар во затвор во Сплит, неколку затвореници хоспитализирани

Неколку затвореници се повредени во пожарот во сплитскиот затвор Билице, кој е изгаснат, соопшти денес Сплитскиот противпожарен оперативен центар.
Како што е наведено, затворскиот персонал го изгаснал пожарот што избувнал синоќа, а пожарникарите ги евакуирале затворениците, од кои неколку побарале медицинска помош поради вдишување чад и биле пренесени во сплитската болница.
„Добивме дојава за пожар во една од ќелиите на затворот околу 21:30 часот, а по пристигнувањето на пожарникарите затворскиот персонал веќе го изгаснал пожарот во најголем дел, а пожарникарите веднаш ги евакуирале затворениците“, изјавиле за Хина од Противпожарниот центар.
Свет
Фицо: Не повикувам на укинување на демократијата, но ЕУ треба да размисли за промена на системот

За време на вчерашната посета на Узбекистан, словачкиот премиер Роберт Фицо посочи дека авторитарните држави можат да бидат економски поефикасни од демократиите и повика на преиспитување на европскиот демократски модел.
Фицо рече дека Европа треба да размисли за реформирање на својот систем на управување базиран на слободни избори за да остане глобално конкурентна. Тој ги пофали земјите како Узбекистан, Кина и Виетнам за нивната способност да дејствуваат порешително по економските прашања.
Кога новинарите го прашаа, Фицо појасни дека не повикува на крај на демократијата, но тврдеше дека вклучувањето премногу политички партии во донесувањето одлуки ја ослабува способноста на државата да дејствува.
„Ако имате сто политички партии, не можете да се натпреварувате“, рече тој.
„Ако владата се состои од четири политички субјекти, не можете да се натпреварувате“, додаде тој.
Фицо, кој се врати на власт во 2023 година за да го преземе својот четврти мандат, се соочи со масовни протести во последните месеци, а критичарите го обвинуваат за авторитарни аспирации и водење проруска надворешна политика.
Свет
Орбан: Дипломатите мора да ја преземат контролата од генералите, оваа војна не може да се добие

Унгарскиот премиер Виктор Орбан изјави дека на Украина ѝ е потребно примирје, преговори и мир, како и дека „дипломатите треба да ја преземат контролата од генералите“. На состанокот на парламентарната група „Патриоти за Европа“ во Европскиот парламент, рече дека политичарите кои се залагаат за војна сакаат луѓето да веруваат дека војната мора да продолжи, објави унгарската агенција МТИ.
„Ве уверувам дека оваа војна не може да се добие, нема решение на бојното поле, само мртви, страдање и уништување“, истакна тој. Унгарскиот премиер, исто така, рече дека неговата земја е „црна овца“ на Европската Унија и кошмар за Брисел, додека претставува надеж за европските патриоти.
„Не сакаме Брисел да воведе воена економија под изговор на војна, не сакаме да зема огромни кредити, да ги федерализира парите на земјите-членки и да ги вовлекува нашите земји во трка во вооружување. Ве молам да ги запрете“, им рече Орбан на учесниците на состанокот.
Според него, Брисел ѝ се заканува и ја уценува Унгарија со финансиски санкции затоа што не ги пушта мигрантите во земјата, но Будимпешта попрво ќе им плати отколку да им дозволи на мигрантите да ја уништат безбедноста на унгарските градови и улици. „Се бориме за нашите семејства и татковина, дури и ако треба да се соочиме со целата бирократија на Брисел“, заклучи унгарскиот премиер, пренесува Танјуг.