Европа
ЕУ ги одобри преговарачките рамки за Украина и Молдавија, преговорите почнуваат на 25 јуни

Земјите-членки на Европската унија ги одобрија преговарачките рамки за пристапување на Украина и Молдавија во тој блок, што го отвора патот за почеток на преговорите на 25 јуни во Луксембург, соопшти денеска белгиското претседателство со ЕУ.
„Советот на ЕУ ги усвои општите позиции на ЕУ, вклучително и преговарачките рамки за пристапните преговори со Украина и Молдавија. Ова го отвора патот за почеток на преговорите во вторник, 25 јуни во Луксембург“, се вели во објавата на социјалната мрежа Икс.
The #EU countries on Friday formally approved launching #membership talks with #Ukraine and #Moldova next week, a landmark event for the two countries at the start of their long path towards joining the bloc. pic.twitter.com/oHvwloC3Rz
— People's Daily, China (@PDChina) June 21, 2024
На 14 јуни, постојаните претставници на ЕУ постигнаа начелен договор за рамката за пристапните преговори меѓу Украина и Молдавија.
Претходно Европската комисија објави дека Украина и Молдавија ги исполнуваат сите критериуми неопходни за формален почеток на преговорите за членство во ЕУ.
Земјите од ЕУ на 14 декември одлучија да започнат преговори со Украина и Молдавија за пристапување во Европската унија, откако унгарскиот премиер Виктор Орбан ја напушти просторијата на почетокот на гласањето, дозволувајќи одлуката да се донесе едногласно.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски пристигнува на погребот на папата

Украинскиот претседател Володимир Зеленски ќе присуствува на погребот на папата Франциско, пренесе АФП повикувајќи се на извор од украинскиот претседателски кабинет.
Според истиот извор, канцеларијата на Зеленски ја подготвува неговата посета на Рим за Зеленски лично да се прости од поглаварот на Католичката црква.
Како што претходно беше најавено, погребот на папата Франциско ќе се изврши в сабота, 26 април, во 10 часот по локално време. Досега Трамп и Макрон потврдија дека ќе бидат на погребот, но се очекува да присуствуваат многубројни светски лидери и стотици илјади верници.
Европа
Украина: Русите го зголемуваат военото присуство во Мариупол

Руските сили продолжуваат да го зголемуваат своето воено присуство во привремено окупираниот град Мариупол. Како што соопшти денеска на „Телеграм“ градскиот совет на Мариупол, во градот веќе се формирани две воени бази.
„Руските окупатори го прошируваат своето воено присуство во Мариупол“, се вели во соопштението.
Според Центарот за проучување на окупацијата, во текот на март и април 2025 година се појавиле две нови воени бази: една во областа Калмиус на северозапад од градот и логистичка база во областа Ливобережњи, во станбената зона Шхидни. Втората база, како што се наведува, главно се користи за сместување персонал и воена опрема.
„На овој начин руските окупатори постепено го зголемуваат своето присуство во Мариупол. Центарот за проучување на окупацијата нагласува дека ова е план за трансформирање на градот во главна и полноправна логистичка и воена база не само за стоки туку и за опрема и персонал, со широка мрежа на паркинзи, бази за поправка и точки на трајно и привремено распоредување персонал. Ова е олеснето и со развојот на железничките и пристанишните врски што ги спроведуваат окупаторските власти“, се вели во соопштението на градскиот совет на Мариупол.
Европа
Знамиња со кукасти крстови се појавија во Стокхолм на роденденот на Хитлер, полицијата почна истрага

Три нацистички знамиња со кукасти крстови беа поставени на влезот на автопат во областа Есингеледен во Стокхолм, главниот град на Шведска, на 20 април, на роденденот на Адолф Хитлер.
Портпаролот на полицијата во Стокхолм, Матс Ериксон, изјави дека започнале истрага за злосторство од омраза.
Ериксон нагласи дека не е соодветно да се случуваат такви работи во Шведска. Тој посочи дека на влезовите на автопатите често се појавуваат транспаренти со политички пораки.
„Конкретно активистите споделуваат политички пораки бидејќи тука има густ сообраќај. Не е убаво да се споделуваат такви пораки“, рече Ериксон.
Тој додаде дека нацистичкото знаме најверојатно било поставено за да го одбележи роденденот на нацистичкиот диктатор Адолф Хитлер, кој е роден на 20 април.