Свет
ЕУ го предупредува Иран: Затворањето на теснецот низ кој минува нафтата би било исклучително опасно
Високaта претставничка на ЕУ за надворешна и безбедносна политика, Каја Калас, предупреди дека затворањето на Ормутскиот теснец би било исклучително опасно и нема да биде добро за никого.
„Постои голема загриженост за можноста за одмазда и ескалација на војната, особено ако Иран го затвори Ормутскиот теснец, што би било исклучително опасно и не би било добро за никого“, изјави Калас пред почетокот на состанокот на министрите за надворешни работи, на кој главна тема ќе биде ситуацијата на Блискиот Исток.
Ормутскиот теснец, кој го поврзува Персискиот залив со Индискиот Океан, е најважниот светски премин за транспорт на нафта. Низ него поминува околу 20 отсто од глобалната побарувачка за нафта и гас.
Министрите разговараа за Иран и пред официјалната средба за време на работниот појадок.
„Министрите се многу фокусирани на дипломатско решение и постои голема загриженост за можноста за одмазда и ескалација на војната“, рече високиот претставник.
На 13 јуни Израел изврши напади врз иранските нуклеарни постројки, на што Иран возврати со напади на израелска територија. Во конфликтот се вмешаа САД, кога пред два дена ги бомбардираа иранските нуклеарни постројки.
Министрите ќе разговараат и за извештајот на Европската служба за надворешни работи (ЕЕАС), која заклучи дека има индиции дека Израел го прекршува членот 2 од договорот со Европската унија. Тој член ги регулира трговските односи меѓу Израел и ЕУ и предвидува односите да се засноваат на почитување на човековите права и демократските вредности.
Во ЕУ нема единство што да се прави во врска со тој извештај. Војната меѓу Израел и Иран, во која се вклучија САД, го оттргна вниманието од однесувањето на Израел во Газа. Тие најверојатно ќе го забележат извештајот без да преземат конкретни мерки против Израел.
Министрите ќе разговараат и за натамошна поддршка за Украина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Русија успешно го тестираше нуклеарниот подводен дрон „Посејдон“
Русија спроведе успешен тест на подводниот дрон (торпедо) „Посејдон“ со нуклеарен погон, чија моќност ја надминува моќноста на интерконтиненталната ракета „Сармат“, објави денес претседателот на Руската Федерација Владимир Путин.
„Вчера спроведовме уште еден тест на нов перспективен комплекс, подводното беспилотно возило „Посејдон“, исто така со нуклеарна енергетска единица. За прв пат успеавме не само да го лансираме од подморница-носач со помош на стартер мотор, туку и да активираме нуклеарен реактор кој работеше одредено време“, рече Путин за време на посетата на Централната воена болница во Москва, пренесува РИА Новости.
Тој го оцени тестирањето како „огромен успех“, нагласувајќи дека „Посејдон“ нема пандан во светот ниту по длабочина ниту по брзина на движење.
„Моќта на „Посејдон“ значително го надминува „Сармат“. Нема начин да се пресретне, а веројатно нема ни да има во блиска иднина. Покрај сите предности, неговиот реактор е сто пати помал од оној на нуклеарна подморница, додека неговата моќ е поголема од моќта дури и на нашата најнапредна интерконтинентална ракета, „Сарма“. Такво оружје не постои во светот“, рече рускиот претседател.
„Посејдон“ е нуклеарно беспилотно возило развиено како дел од платформата за повеќенаменска одбрана на подморницата на Руската морнарица.
За прв пат беше претставено во 2018 година, кога тогашниот командант на Руската морнарица, Владимир Королев, изјави дека системот ќе овозможи извршување на широк спектар на задачи во оддалечени морски зони.
За време на посетата на болницата, Путин разговараше и со ранетите учесници во „Специјалната воена операција (СВО)“ и извести за напредокот на руската армија во регионите Купјанск и Красноармејск.
„Ситуацијата во зоната на „специјални операции“ се развива поволно во целина. „Противникот“ е блокиран во Купјанск и Красноармејск и е во близина“, рече Путин, додавајќи дека Украина треба да одлучи за судбината на своите војници во тие области.
Тој изјави дека руските вооружени сили се подготвени да обезбедат пристап на медиумите, вклучително и на украинските и странските новинари, до зоните на опколување, и дека борбените операции би можеле привремено да бидат прекинати во тој период.
Фото:
Свет
Сијарто: Европа е зафатена од воена треска, се подготвува за конфликт со Русија
Европа е зафатена од воена треска и сè поотворено се подготвува за војна, предупреди унгарскиот министер за надворешни работи, Петер Сијарто, коментирајќи ја намерата на Европската Унија да му испрати на Киев речиси 200 милијарди евра за оружје и функционирање на државата.
„Кога зборуваме за мобилизација на 60 милијарди евра европски пари за вооружување на украинската армија или за испраќање 130 милијарди евра во Украина, тешко е да се нарече тоа поинаку, освен подготовка за војна“, рече Сијарто во емисијата „Борбен час“.
Според него, наместо да придонесува за мирот, Европската Унија сè подлабоко тоне во политиката на конфронтација, што може да има далекосежни последици за безбедноста на континентот.
Сијарто истакна дека единствениот пат до стабилност е евроазискиот дијалог бидејќи без Русија, како што рече, не е можно да се создаде реална и одржлива безбедносна архитектура во Европа.
„Нереално е да се мисли дека Европа ќе биде безбедна ако Русија остане изолирана. Безбедноста е можна само преку соработка, а не преку санкции и конфронтација“, рече шефот на унгарската дипломатија.
Фото: принтскрин
Свет
Порака од Првата светска војна пронајдена на австралиска плажа
Пораки во шише напишани од двајца австралиски војници неколку дена по заминувањето со брод на фронтот во Франција за време на Првата светска војна се пронајдени повеќе од еден век подоцна на брегот на Австралија.
Шишето од брендот „Швепс“ е пронајдено веднаш над линијата на водата на плажата Вартон во близина на Есперанс во државата Западна Австралија од страна на Питер Браун, кој со ќерка си Фелисити бил на една од редовните семејни експедиции со квадбајк за чистење на плажата од ѓубре, потврди неговата сопруга Деб Браун, пренесува АП.
„Многу чистиме на нашите плажи за никогаш да не поминеме покрај парче ѓубре. Значи, ова мало шише само стоеше таму чекајќи нè да го собереме“, рече Деб Браун.
Внатре во проѕирното дебело стакло се наоѓале весели писма напишани со молив од војниците Малколм Невил (27) и Вилијам Харли (37), датирани на 15 август 1916 година. Нивниот воен брод тргнал од Аделаида, главниот град на Јужна Австралија, на 12 август истата година, на долго патување до другата страна на светот, каде што австралиските војници требало да го зајакнат 48. австралиски пешадиски баталјон на Западниот фронт во Европа. Невил бил убиен во акција една година подоцна, а Харли бил ранет двапати, но ја преживеал војната, за да умре во Аделаида во 1934 година.
Војникот Невил го замолил оној што ќе го најде шишето да го достави писмото до мајка му Робертина Невил во Вилкават, сега практично град на духови во Јужна Австралија, а Харли, чија мајка починала до 1916 година, напишал дека ќе биде среќен ако оној што ќе го најде шишето ја зачува неговата порака.
Внуката на Харли, Ен Тарнер, рекла дека нејзиното семејство било апсолутно вџашено кога ја пронашле пораката на дедо ѝ во шише. „Едноставно, не можеме да веруваме. Навистина изгледа како чудо и навистина се чувствуваме како дедо да ни се обратил од гробот“, изјави Тарнер за Австралиската радиодифузна корпорација.
Праправкукот на Невил, Херби Невил, рече дека неговото семејство било обединето од неверојатното откритие. „Звучи како да бил доста среќен што отишол во војна. Толку е тажно што се случило. Толку е тажно што го загуби животот. Каков човек беше“, рече Невил.
Фото: принтскрин

