Европа
ЕУ го објави соодносот на процентот на вакцинација и бројот на починати од коронавирус

Земјите со најмал процент на вакцинирана популација се соочуваат со најголем број смртни случаи од последиците од коронавирусот на милион жители, покажуваат најновите податоци на Европскиот центар за превенција и контрола на болести, објавени од Европската комисија (ЕК).
Соодносот меѓу земјите со најмногу вакцинирани лица кои починатите во Европската Унија (ЕУ) е претставен во графикон, на кој бројот на умрени на милион жители се однесува на период од 14 дена.
„Податоците покажуваат дека колку е поголем опфатот со вакцинација, толку е помала смртноста“, напиша Европската комисија во описот на графиконот.
Data shows us that the higher the vaccination rate, the lower the death rate. #COVID19 #VaccinesWork pic.twitter.com/mORrrQOPsj
— European Commission ?? (@EU_Commission) November 23, 2021
На врвот на листата е Ирска, каде што се вакцинирани 93 отсто од возрасната популација. Во претходниот 14-дневен период има 15 смртни случаи на милион жители.
На второ место е Португалија со 92 отсто од вакцинираните кај населението над 18 години и десет смртни случаи на милион жители, додека Малта со истиот процент на вакцинирани бележи нула смртни случаи на милион жители во претходните две недели.
Четврта на листата е Данска со 89 отсто од вакцинираните и десет смртни случаи на милион жители, додека Белгија на петтото место е мал исклучок во односот меѓу вакцинирани и починати – двете дози од вакцината ги примиле 87 отсто од возрасните Белгијци и бројот на починати на милион во претходните 14 дена е 29.
Земјите на дното на листата имаат значително поголем број смртни случаи, па така Полска има 62 проценти вакцинирани и 49 смртни случаи на милион жители во период од 14 дена. Во Хрватска вакцинирано е 55 отсто од населението, а во истиот период има 168 смртни случаи од коронавирус.
Една од ретките земји членки на ЕУ во која процентот на вакцинирани не е обратно пропорционален со бројот на смртни случаи е Словачка, која има 54 проценти од вакцинираната возрасна популација, со 29 смртни случаи на милион, што е значително помалку од другите земји на дното на листата.
Романија и Бугарија се на дното на листата. Романците вакцинирале 43 отсто од возрасните и имаат 267 смртни случаи на милион жители. Бугарите го држат последното место според бројот на вакцинирани (29 отсто), со најголем број смртни случаи во последните две недели во целата Европска Унија – дури 325 на милион жители.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Фото+видео) Опасна бура во Словенија: паѓаше град со големина на јајце, издадено портокалово предупредување

Словенија е погодена од силни бури придружени со силни налети на ветер, поројни дождови и град.
Сообраќајот во земјата е забавен, а Агенцијата за заштита на животната средина издаде портокалово предупредување за целата територија.
Од агенцијата посочуваат дека поради дождот може да дојде до задржување на вода и зголемување на реките.
На објавите на социјалните мрежи се гледа дека паѓал град со големина на јајце.
Според објавите и коментарите, најлошото било околу Шемпетер во долината Савиња.
Како што јавува ТВ Словенија, во текот на вечерта бурата постепено ќе ослабне , најдоцна на истокот од земјата.
Бура пристигнува и во Хрватска
Силна бурна ќелија, која пристигна преку брегот од Италија, се движи кон внатрешноста на Хрватска, придружена со врнежи од дожд, силни налети на ветер и локален град.
Водна пијавица е снимена над морето во близина на Умаг. Се очекува активноста на бурата дополнително да се интензивира во наредните часови.
Управата за заштита на животната средина издаде портокалова тревога за регионите Риека, Карловац и Загреб поради локално можни грмотевици со привремено силни до бурони ветрови, а можна е и појава на град.
Европа
Колона долга околу 700 километри забележана на автопат во Франција

Колона долга речиси 700 километри е забележана денеска на автопат во Франција, додека вкупната должина на сите колони на патиштата во земјата изнесуваше 1.051,6 километри во време на зголемен сообраќаен интензитет поради летните одмори и смената на туристи, што колоквијално се нарекува „Црна сабота“.
Како што извести BFM TV, сообраќајот на патиштата во Франција дополнително бил забавен поради две сообраќајни несреќи на автопатот кон Медитеранот и Атлантскиот Океан.
Според податоците на Bizon Futé, француската агенција за следење на состојбата на патиштата, до 7 часот утрово колоните биле подолги од 200 километри, а до 10 часот веќе надминале 570 километри.
Како што беше соопштено, гужвите се во согласност со прогнозите на агенцијата, која предупреди на „исклучително тешки сообраќајни услови“ за оваа сабота, а врвот на метежот се очекува околу пладне.
Сообраќајот во правец кон Алпите исто така е интензивен и загушен, со задржувања од час и 45 минути во тунелот Мон Блан во правец кон Италија
Европа
Финска, Норвешка и Шведска под жештина невидена од 1961 година

Земјите од Северна Европа, познати по својата студена клима, се соочуваат со интензивни топлотни бранови, со температури над 30 степени Целзиусови во подолг временски период.
Во норвешкиот дел од Арктичкиот круг, метеоролошките станици регистрирале температури над 30 степени Целзиусови дури 13 дена во јули, додека Финска имала три последователни недели со температури од 30 степени, пишува денес британскиот „Гардијан“.
Според научниците, тоа е најдолгиот период според историските податоци од 1961 година, а трае 50 проценти подолго од претходниот рекорд.
„Топлотниот бран е сè уште во полн ек, со максимални температури денес околу 32-33 степени. Дури и арктичките региони забележаа три недели со температури над 25 степени и може да ги соборат своите августовски температурни рекорди утре“, изјави Мика Рантанен, климатолог во Финскиот метеоролошки институт, во објава на социјалните мрежи.
Норвешкиот метеоролошки институт соопшти дека температури над 30 степени се регистрирани 12 дена во јули во најмалку една станица во трите најсеверни покраини на Норвешка.
Во Шведска, метеоролозите, исто така, регистрираа продолжени топлотни бранови во неколку северни градови, при што метеоролошката станица во Хапаранда регистрираше температури од 25 степени или повеќе 14 дена по ред.
Овие топлотни бранови, кои ја погодија северна Европа кон средината на јули, беа предизвикани од топлите води покрај северниот брег на Норвешка, кои ги покачија температурите во нордиските земји за осум до 10 степени над сезонските норми.
Поради интензивен топлотен бран, лизгалиште на мраз во северна Финска ги отвори вратите за луѓе кои бараат засолниште од жештината, откако локалните болници беа преполни, а сточарите предупредија дека нивните ирваси се на работ на смртта од жештината.