Свет
„Жив и здрав со семејството“ – новинарка објави фотографија од рускиот генерал Суровикин за првпат во јавноста по бунтот „Вагнер“
Руската новинарка Ксенија Собчак на својот профил на „Телеграм“ ја објави првата фотографија, на која што тврди дека е поранешниот генерал Сергеј Суровикин кој „исчезна од јавноста“ по бунтот на групата Вагнер.
„Генералот Сергеј Суровикин е надвор. Жив, здрав, дома, со семејството, во Москва. Фотографијата е направена денес“, напиша Собчак откако објави фотографија на која се гледа маж кој носи очила за сонце и капа додека оди покрај жена која личи на сопругата на Суровикин, Ана.
Сергеј Суровикин беше врховен командант на Воздухопловните сили на Руската Федерација и исто така ја водеше руската инвазија на Украина од октомври 2022 до јануари 2023 година. Под него, руската војска почна да ја бомбардира енергетската инфраструктура на Украина и го напушти Херсон.
По обидот за државен удар на Евгениј Пригожин, основач на групата „Вагнер“, се појавија извештаи дека Суровикин, заедно со голем број други високи руски офицери, биле отстранети од служба и приведени. Официјално оваа информација не беше потврдена, но Суровикин не се појави во јавноста.
Според руските медиуми, денес по прес-конференцијата на претседателите на Русија и Турција во Сочи, новинарите го прашале рускиот министер за одбрана Сергеј Шојгу што се случува со Суровикин и дали е во тек истрага против него. Министерот не одговори, се додава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски се обрати до нацијата: Се браниме кај Харков, во Доњецк е исклучително тешко
Украинските сили продолжуваат со одбранбените операции околу северните погранични населби во регионот Харков, изјави украинскиот претседател, Володимир Зеленски во вечерното обраќање до нацијата.
„Нашите сили извршуваат контранапади и ја штитат украинската територија веќе втор ден“, рече Зеленски.
Украинската војска претходно соопшти дека руските сили се задржани во пограничните села во „сивата зона“, додека Русија објави дека зазела пет локални населби.
Ситуацијата, рече Зеленски, е особено напната во регионот на Доњецк, поточно во правец на Покровское, кај селата Семенивка и Нетаилова.
Зеленски додаде дека попречувањето на руските офанзивни акции сега е задача број еден.
Свет
Макрон: Се надевам дека Французите нема да мора да се борат во Украина
Францускиот претседател Емануел Макрон уште еднаш не ја исклучи можноста за интервенција на француската армија во Украина, но истовремено изрази надеж дека неговата земја нема да мора да војува и да испраќа свои војници во војна.
Како што пренесува „Украинска правда“, Емануел Макрон рече дека во одреден момент Европејците треба да бидат подготвени да ја спречат Русија да напредува понатаму во Украина, но тој најискрено се надева дека нема да мора да се борат.
„Ако сакаме мир, мораме да го заштитиме. Затоа треба да се вооружиме и затоа треба да бидеме средство за одвраќање и убедување. Ако одите предалеку и ги загрозувате нашите интереси и нашата безбедност, тогаш јас не исклучувам интервенци во конфликтот“, рече Макрон.
Тој нагласи дека украинскиот суверенитет и територијалниот интегритет се под закана, но истовремено владеењето на правото и општите правила се под закана.
„И ако оставиме сè како што е во Украина, тогаш ќе победи правото на посилниот. И не можеме да бидеме сигурни бидејќи тоа се случува на 1.500 километри. Значи, во Украина нашата иднина и нашата безбедност се во прашање“, заклучи францускиот претседател.
Свет
Големи пропалестински протести во Малме пред евровизиското финале, се бара исклучување на Израел од натпреварот
Денеска во центарот на Малме, Шведска се одржува масовен пропалестински протест поради учеството на Израел на овогодинешното натпреварување.
Голем број луѓе почнаа да се собираат на главниот плоштад во Малме од 16 часот.
Протестот почна на главниот плоштад во Малме, а насобраните од ова место се упатија кон арената Малме, каде што се одржува Евровизија.
Во четвртокот, кога претставничката на Израел настапи во втората полуфинална вечер, на улиците на Малме протестираа повеќе од 30.000 луѓе, според проценките на шведската полиција.
Барањата се исти – бојкот на Евровизија и исклучување на Израел од натпреварувањето.