Свет
Зеленски: Во третата рунда директни преговори со Русија ќе инсистирме на три точки

Претседателот на Украина, Володимир Зеленски, изјави дека во третата рунда директни мировни преговори со Русија во Истанбул, Украина ќе инсистира на три клучни точки: враќање на воените заробеници, враќање на децата киднапирани од Русија и подготовка на самит.
„Нашата агенда е јасна: враќање на воените заробеници, враќање на децата киднапирани од Русија и подготовка на состанокот на лидерите“, напиша Зеленски на платформата „Икс“.
„На сите им е јасно дека навистина ефикасни преговори можат да се водат само на ниво на национални лидери“, додаде тој.
Изјавите на Зеленски доаѓаат откако тој пред три дена објави дека Украина предложила продолжување на директните преговори. Новиот секретар на Советот за национална безбедност и одбрана, Рустем Умеров, ѝ понуди на Русија нова средба.
Портпаролот на Кремљ, Дмитриј Песков, денес потврди дека Москва го поддржува одржувањето на третата рунда разговори, но нагласи дека сè уште не е договорен датум.
„Од руска страна, нема промени во преговарачката група“, рече Песков.
Руската делегација сè уште ја предводи претседателскиот советник Владимир Медински. Високи функционери како што е шефот на дипломатијата Сергеј Лавров сè уште не учествуваат во преговорите.
Последните директни преговори се одржаа на 2 јуни во Истанбул, по претходната средба на 16 мај. Пред тоа, директните контакти беа замрзнати со години.
Украина предлага безусловно 30-дневно примирје од март – иницијатива поддржана од Соединетите Американски Држави. Во двата претходни круга во Турција, Русија го отфрли предлогот, нудејќи само „прекин на огнот“ од 2 до 3 дена со цел да се соберат телата на загинатите. Не беше постигнат договор.
Со месеци, Зеленски повикува на средба со рускиот претседател Владимир Путин, кој систематски избегнува директно учество во преговорите.
Турција останува една од ретките земји што одржува отворени канали и со Москва и со Киев. Турскиот претседател Реџеп Таип Ердоган на 26 јуни изјави дека Анкара работи на организирање средба меѓу Зеленски и Путин, со евентуално учество на американскиот претседател Доналд Трамп.
Еден ден претходно, Песков повтори дека воените цели на Русија „не се променети“ и дека тие ќе бидат постигнати „на бојното поле“, и покрај предупредувањето на Трамп дека ќе воведе „строги“ царини ако Русија не се согласи да ја заврши војната во рок од 50 дена.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Проститутка бришела мртов маж со влажни марамчиња, го облекла, па побегнала, умрел од природна смрт

56-годишен маж починал од природна смрт во гарсониера во градот Л’Аквила, Италија, каде престојувала 58-годишна проститутка. По неговата смрт, жената се обидела да го „постави“ телото, го избришала со влажни марамчиња и го облекла, а потоа замолила случаен минувач да повика брза помош и избегала.
Инцидентот се случил околу полноќ, пред две ноќи, на улицата Виа Стринела. Полицијата брзо ја лоцирала жената и ја реконструирала целата ситуација. Првичните наоди од истрагата покажуваат дека мажот починал од болест, без знаци на насилство.
Полицијата откри дека 24-годишен млад маж од Гвинеја повикал брза помош по барањето на жената, но тој нема никаква врска со смртта. Лекарите од итната помош можеле да ја потврдат смртта само по пристигнувањето на местото.
Иако првично се сомневаше на насилна смрт поради бегството на жената, обдукцијата потврди дека причината за смртта била природна. Во станот не се пронајдени дрога или други супстанции кои би предизвикале смрт. Телото му беше предадено на семејството за погреб.
Заменик-обвинителката Роберта Д’Аволио потврди дека жената нема да биде под истрага, бидејќи нејзините постапки немале влијание врз исходот. Сепак, можни се дополнителни проверки во врска со легалноста на активностите во станот.
Регион
Поевтини цени на околу 25 видови производи ќе има во Србија во следните шест месеци

Во Србија од утре и во следните шест месеци, цените на околу 25 видови производи треба да бидат пониски, бидејќи Владата, со усвојување на Уредбата за посебни услови за вршење трговија за одредени видови стоки, ги ограничи маржите на до 20 проценти. Новите правила ќе важат за сите трговски субјекти кои во 2024 година оствариле приходи од над 4,5 милијарди динари или околу 38 милиони евра, што значи дека сите трговски синџири ќе мора да ги применуваат, а некои од нив лани имале повеќе од една милијарда евра профит.
Министерот за финансии на србија, Синиша Мали, изјави дека од утре, цените на 20.000 производи од 23 категории ќе бидат намалени на полиците на сите малопродажни синџири, како што е предвидено со уредбата на Владата за ограничување на маржите.
„Очекуваме намалување на цената од 10-15-20 проценти во просек, во зависност од тоа колку била маржата на одреден производ претходно. Важно е да не станува збор само за неколку производи, туку за целиот асортиман на храна што сите ја купуваме секој ден“, рече Мали во интервју.
Тој изјави дека анализата утврдила дека цените на прехранбените производи, безалкохолните пијалоци и сличните производи во голема мера го диктираат нивото на инфлација и дека тоа мора да се ограничи.
Српскиот претседател Александар Вучиќ и министерката за трговија на Србија, Јагода Лазаревиќ, објавија дека морала да се дополнува Уредбата бидејќи одредени трговски синџири се обиделе да најдат начин да ги заобиколат новите правила.
„Прерано почнаа со трикови. Мислат дека се доволно мудри за да ја измамат државата“, рече Вучиќ, коментирајќи ги реакциите на малопродажните синџири на ограничените маржи.
Како што објасни Вучиќ, трговците барале од добавувачите да ги зголемат цените за 14 до 20 проценти пред да стапи во сила Уредбата, а разликата подоцна да ја вратат преку попусти. На тој начин, трговците би ја пресметале маржата на новата, вештачки зголемена цена и би ги избегнале потенцијалните загуби што можат да настанат поради Уредбата. Во исто време, на тој начин формално би ги исполниле барањата, но со иста заработка како и претходно.
Попустот, патем, е попуст што добавувачите или производителите му го даваат на трговецот, најчесто при купување одредена количина стока.
Вучиќ додаде дека трговците на мало им кажуваат на добавувачите дека ќе ја повлечат својата стока од полиците ако не го исполнат овој услов. Иако не прецизираше за кои пазари станува збор, тој ги замоли луѓето од „трите најголеми малопродажни синџири“ доколку се одговорни, „да не се обидуваат да ја поразат државата“ и „да не мислат дека се многу паметни, а ние сме многу глупави“.
Вучиќ додаде дека на трговците им е дозволено да имаат маржа од 20 проценти, но сепак, според него, трговците сега сакаат да ги пресметуваат логистичките трошоци по стапка од 10 проценти. Тие логистички трошоци, патем, ги претставуваат сите трошоци направени при набавка на стоки, како што се транспорт или складирање во магацин.
Министерката Лазаревиќ рече дека сите во Министерството „биле шокирани“ што на денот на усвојувањето на Уредбата за посебни услови за вршење трговија за одреден вид стока, некои трговски синџири „започнале со сериозен притисок врз своите добавувачи“, инсистирајќи на склучување анекс на договорот, за да направат одредени корекции, и тоа пред да стапи во сила Уредбата.
Токму поради тие притисоци, е изменета и Уредбата.
Како што објави Министерството за трговија по вонредната седница на Владата на Србија, промените го ограничија попустот за логистика и другите надоместоци. Така, Уредбата за посебни услови за вршење трговија за одреден вид стока сега содржи одредби со кои се ограничува „логистичкиот рабат“ и „надоместокот за недостиг на стока и отпис на стока“ на три и еден процент, соодветно.
Уредбата за посебни услови за вршење трговија за одреден вид стока предвидува дека ограничувањето на маржите до максимум 20 проценти се однесува на околу 25 видови производи кои треба да имаат пониски цени во продавниците почнувајќи од утре.
Свет
Близу 100 лица се повредени откако патнички воз излета од шините во западен Египет, има и загинати

Најмалку три лица загинаа, а 94 се повредени денес во западен Египет кога патнички воз излета од шините, соопштија властите.
Ова е најновата во низата железнички несреќи во земјата во последните години.
Возот излета од шините додека патуваше кон Каиро од западната медитеранска покраина Матрух, на северниот брег на земјата, соопштија властите. Седум вагони излетаа од шините, од кои два се превртеа.