Свет
„Зеленски е виновен за ескалацијата“; Лукашенко: Конфликтот немаше да се случи доколку Западот не го пумпаше Киев со оружје

Постапките на Владимир Зеленски доведоа до ескалација на конфликтот во Украина, изјави белорускиот лидер Александар Лукашенко во интервју со американскиот блогер Марио Нуфол, објавено на социјалната мрежа Икс.
– Тој даде многу ветувања, од кои најважно беше за прекин на конфликтот, но, всушност, само ја влоши ситуацијата. Зеленски го доведе конфликтот во Украина на невидено ниво – оцени Лукашенко.
Наместо да се стреми кон мир, шефот на режимот во Киев само го продлабочи конфликтот, посочи тој.
Белорускиот лидер нагласи и дека Зеленски поради своето неискуство дозволил неколку грешки кои можеле да се избегнат доколку ги слушал советите на искусни експерти.
Лукашенко исто така изјави дека украинскиот конфликт немаше да се случи доколку Западот не го „напумпа“ Киев со оружје.
Дополнително, тој оцени дека Русија никогаш нема да се согласи на испраќање „мировни сили“ од Европската унија во Украина, чие раководство зазема многу агресивен однос кон Москва.
Прашањето кој е одговорен за конфликтот во Украина во моментов не е на дневен ред, но тоа ќе стане јасно со текот на времето, рече белорускиот лидер.
Лукашенко заклучи дека војната треба да се прекине и дека решавањето на конфликтот доби важност благодарение на новата администрација на американскиот претседател Доналд Трамп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Нетанјаху: Германија го наградува тероризмот на Хамас

Израелскиот премиер, Бенјамин Нетанјаху, денес му рече на германскиот канцелар Фридрих Мерц дека е разочаран од неговата одлука да воведе ембарго за извоз на оружје за Израел, оценувајќи дека оваа одлука ќе ја награди палестинската милитантна група Хамас.
„Наместо да ја поддржува праведната војна на Израел против Хамас, кој го изврши најстрашниот напад врз еврејскиот народ од Холокаустот, Германија го наградува тероризмот на Хамас со воведување ембарго за извоз на оружје за Израел“, рече Нетанјаху, соопшти неговиот кабинет, објави The Times of Israel.
Нетанјаху, исто така, изјави „дека целта на Израел не е да ја преземе Газа, туку да ја ослободи Газа од Хамас“.
Свет
Германија го запира извозот на оружје во Израел

Германскиот канцелар Фридрих Мерц објави дека неговата влада ќе го запре целиот извоз на оружје и воена опрема во Израел што може да се користи во Појасот Газа, како одговор на планот на Израел да го заземе градот Газа и следствено целата енклава.
„Германија нема да одобри извоз на воена опрема во Израел до понатамошно известување доколку постои можност таа да се користи во Газа“, рече Мерц во изјава дадена неколку моменти по објавувањето на израелските планови.
Тој нагласи дека е „сè потешко да се разбере“ како воената стратегија на Израел може да придонесе за постигнување на легитимни цели.
„Во овие околности, германската влада нема да одобри извоз на воена опрема што може да се користи во Појасот Газа“, додаде канцеларот.
Германија традиционално е еден од најголемите извозници на оружје во Израел и еден од неговите најблиски сојузници. Според Стокхолмскиот меѓународен институт за истражување на мирот (SIPRI), САД биле најголемиот снабдувач на воена опрема за Израел од 2020 до 2024 година, додека Германија била втора на листата.
Сепак, и покрај поддршката, во последните месеци новиот канцелар Мерц дава сè порезервирани изјави во светлината на катастрофалната ситуација во Газа предизвикана од Израел, па затоа оваа одлука не е толку неочекувана.
Фото: ЕПА
Свет
ОН: Планот на Израел за преземање на Газа мора веднаш да се запре

Планот на израелската влада за воено заземање на Газа ќе предизвика повеќе смртни случаи и страдања и мора веднаш да се запре, изјави шефот на Советот за човекови права на ОН, Фолкер Турк.
„Планот е во спротивност со пресудата на Меѓународниот суд на правдата дека Израел мора што поскоро да ја прекине окупацијата за да постигне решение за две држави и да го оствари правото на самоопределување на Палестинците“, вели Турк во соопштението.
Безбедносниот кабинет на Израел рано утрово одобри план за преземање на контролата врз градот Газа, додека земјата ги проширува своите воени операции и покрај растечките критики дома и во странство за разорната, речиси двегодишна војна.
„Врз основа на сè што видовме досега, понатамошната ескалација ќе резултира со поголемо присилно раселување, повеќе убиства, повеќе страдања, бесмислено уништување и криминал“, предупреди Турк.
„Наместо да ја ескалира војната, израелската влада треба да направи сè што може за да ги спаси животите на цивилите во Газа, дозволувајќи влез на хуманитарна помош. Палестинските вооружени групи треба веднаш и безусловно да ги ослободат заложниците“, додаде тој.
Фото: ЕПА