Свет
Зеленски за нападот врз Украина: Русија не ги слуша повиците за мир, потребна е порешителна акција
Украинскиот претседател Володимир Зеленски реагираше на новиот руски напад со беспилотни летала, нагласувајќи дека, иако целиот свет повикува на мир, Русија не покажува подготвеност да го прифати и дека Украина мора да преземе порешителни акции во врска со купувањето беспилотни летала и оружје.
На својот Телеграм канал, Зеленски рече дека Украина синоќа била цел на напад од речиси 90 руски борбени беспилотни летала, од кои повеќето биле неутрализирани од украинскиот систем за противвоздушна одбрана, објави „Униан“.
Најголемите напади, рече тој, се регистрирани во регионите Донецк, Киев, Суми, Харков, Чернихив и Дњепарк, а биле нападнати и украинската инфраструктура и бизниси.
„Две лица се повредени во Павлоград, додека во Киев моментално се работи на отстранување на последиците од нападот, кој ја оштетил инфраструктурата на јавниот превоз“, рече Зеленски, пренесува Танјуг.
Тој додаде дека, и покрај глобалните повици за мир, вклучително и оние на американскиот претседател Доналд Трамп, Русија не реагира на дипломатските иницијативи.
Тој истакна дека Украина мора поактивно да спроведува сè што ги зајакнува нејзините одбранбени капацитети, вклучително и предложените договори за оружје и беспилотни летала со САД.
„На маса се големи договори за купување беспилотни летала и оружје, што Украина ѝ ги понуди на Америка. Потребна е решителна акција за Русија конечно да се согласи на дипломатија“, рече претседателот на Украина.
Зеленски, исто така, им се заблагодари на сите земји што ѝ помагаат на Украина, нагласувајќи ја важноста на односите со Соединетите Американски Држави за долгорочната безбедност на Украина.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Трамп го ограничи бројот на бегалци во САД на 7.500 за наредната година
Американскиот претседател Доналд Трамп го постави годишниот лимит за прием на бегалци на 7.500 лица за фискалната 2026 година, што претставува најниско ниво досега.
Одлуката е дел од поширока промена на политиката кон бегалците, при што Трамп најави дека приоритет ќе имаат Јужноафриканци од белата етничка заедница Африканери, тврдејќи дека се соочуваат со расен прогон — тврдење што властите во Јужна Африка го негираа.
Трамп претходно го паузираше приемот на бегалци, наведувајќи дека ќе продолжи само ако тоа е „во најдобар интерес на САД“. До септември годинава, во земјата пристигнале само 138 Јужноафриканци.
Во документот објавен денес, Белата куќа најави дека ќе се разгледува прием и на други жртви на „незаконска или неправедна дискриминација“, а интерен владин извештај сугерира дека приоритет би можел да се даде и на Европејци кои биле мета поради ставови против масовна миграција или поддршка на популистички партии.
Покрај тоа, администрацијата најави дека надзорот над програмите за бегалци ќе се префрли од Стејт департментот на Министерството за здравство и социјални услуги.
Свет
Маж од Флорида осуден за убиство на трудна девојка која одбила да абортира
Судoт во Флорида го прогласи 23-годишниот Донован Фејсон за виновен за убиство на неговата 18-годишна девојка Кајлин Фиенго, која одбила да абортира, пренесе „Унилад“.
Злосторството се случило во ноември 2022 година, кога Фејсон ја намамил Кајлин во парк и ја застрелал во глава. Нејзиното тело било пронајдено во автомобил од полициски службеник за време на рутинска патрола, а покрај неа била најдена и слика од ултразвук.
Истрагата открила пораки во кои Фејсон ја притискал да абортира. Во една од нив ѝ напишал: „Абортирај!!!“, а пред убиството му испратил порака на пријател: „Се колнам во гробот на брат ми, ќе се решам од неа.“
Тужителите навеле дека Фејсон бил лут и под притисок бидејќи живеел со друга жена која дознала за аферата.
Поротата го прогласи за виновен на 27 октомври, а му се заканува смртна казна. Семејството на жртвата изјави дека пресудата „не ја враќа Кајлин, но барем ќе спречи да им наштети на други“.
Свет
Хамас предаде тела, Израел порачува: „Борбата за нашите заложници не запира“
Израел ги презеде телата на двајца заложници кои ги држел Хамас во Газа, пренесе ЦНН. Посмртните останки биле предадени преку Црвениот крст и пренесени на идентификација во израелскиот форензички институт.
Од кабинетот на израелскиот премиер соопштија дека „напорите за враќање на сите заложници продолжуваат и нема да престанат додека не се вратат сите“.
Примопредавањето се случува два дена по израелските воздушни напади во Газа, во кои, според палестинското министерство за здравство, загинале повеќе од 100 лица. И покрај ескалацијата, и Израел и Хамас изјавиле дека остануваат посветени на прекинот на огнот посредуван од САД.
Американскиот претседател Доналд Трамп порача дека „ништо нема да го загрози примирјето“ и се закани дека ќе го „елиминира Хамас“.
Последното примопредавање, според медиумите, поминало без компликации, за разлика од претходните случаи кога Хамас ја повлекуваше одлуката за предавање поради израелски напади.

