Европа
Зеленски и Макрон разговараа за практични чекори за испраќање европски сили во Украина

Украинскиот претседател Володимир Зеленски и францускиот претседател Емануел Макрон вчера телефонски разговараа за ситуацијата на фронтот и можноста за испраќање европски мировни сили во Украина.
Идејата за распоредување европски мировни сили на теренот во Украина сѐ повеќе се поставува во последните месеци додека европските нации се подготвуваат да одиграат позначајна улога во Украина откога новоизбраниот американски претседател Доналд Трамп ќе ја преземе функцијата на 20 јануари.
„Разговаравме за француската иницијатива за распоредување воени контингенти во Украина“, рече Зеленски по повикот додавајќи: „Разгледавме практични чекори за нејзино спроведување, можно проширување и вклучување други земји во овој процес“.
Идејата за испраќање европски трупи во Украина, Макрон ја изнесе уште во февруари минатата година. Зеленски и Макрон претходно разговараа за можноста за мировни сили на состанокот на 18 декември. На нивната трилатерална средба со Трамп во Париз на 7 декември Трамп наводно рекол дека сака европските сили да го следат потенцијалниот прекин на огнот во Украина.
Британскиот премиер Кир Стармер исто така планира да ја посети Украина во следните недели за да разговара за потенцијалното распоредување на меѓународните мировни сили, објави „Блумберг“ на 10 јануари.
Зеленски и Макрон се согласија да се сретнат во блиска иднина за дополнително да разговараат за плановите за постигнување безбедносни гаранции, вклучително и можното распоредување мировници во случај на прекин на огнот.
Двајцата лидери разговараа и за ситуацијата во регионот Курск по обновената офанзива на украинските сили во регионот. Зеленски ги истакна актуелните приоритети на украинската воздушна одбрана и тековната потреба за оружје со долг дострел и висока прецизност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Мелони застана во одбрана на Ле Пен: „Им се одземаат правата на милиони граѓани“

Италијанската премиерка Џорџа Мелони денеска ја критикува одлуката на францускиот суд со која ѝ се забранува на лидерката на екстремната десница, Марин Ле Пен, да се кандидира на претседателските избори во 2027 година.
„Не ги знам деталите за обвиненијата против Марин Ле Пен, ниту причините за ваквата сурова одлука, но мислам дека никој што се грижи за демократијата не може да се радува на пресуда што ќе влијае на лидерот на голема партија и ќе ги лиши правата на милиони граѓани“, рече Мелони во интервју за италијанскиот весник „Ил Месаџеро“.
Мелони, која важи за најмоќниот десничарски лидер во Европа, со оваа изјава застана во одбрана на француската политичарка, која во понеделникот од парискиот суд беше прогласена за виновна за проневера на средства на Европската Унија.
Ле Пен е осудена на четири години затвор, од кои две ќе поминат под електронски мониторинг во домашен притвор, а две години се условни. Покрај тоа, таа е казнета со 100.000 евра и забрана за учество на избори во следните пет години.
Европа
Земјотрес ја погоди Италија

Земјотрес со јачина од 3,8 степени според Рихтеровата скала е регистриран денес, вторник, 1 април 2025 година, во 3.30 часот во Италија.
Хипоцентарот на земјотресот, според податоците на Европско-медитеранскиот сеизмолошки центар, се наоѓа на длабочина од приближно 6 километри под површината на земјата.
Засега нема извештаи за материјална штета или повредени, а надлежните служби ја следат состојбата.
Европа
Од утре нови правила за Европејците за влез во Обединетото Кралство

На европските граѓани кои патуваат во Обединетото Кралство од утре ќе им треба дигитална пропусница за да влезат во земјата, што според британската влада ќе ја зајакне безбедноста на границите.
Електронското овластување за патување (ЕТА) може да се купи онлајн за 10 фунти (12 евра) во наредните денови, а од 9 април цената ќе се зголеми на 16 фунти (19 евра).
Дозволата ќе биде задолжителна за сите Европејци кои сакаат да ја посетат Велика Британија од 2 април, откако истата пропусница беше воведена во јануари за граѓаните на САД, Канада и други земји на кои не им е потребна виза.
Слична дозвола за влез во земјата имаат и САД.
„Со дигитализирање на системот за имиграција, го отвораме патот за бесконтактни гранични премини во ОК“, рече министерката за миграција Сема Малхотра претходно овој месец, кога беше отворена веб-страницата за првите апликации.
Таа додаде дека проширувањето на ЕТА во земјите ширум светот „ја зајакнува посветеноста за подобрување на безбедноста преку технологија и иновации“.
Документот дозволува посети до шест месеци и важи две години. Тоа е задолжително за сите патници, вклучително и малолетни и новороденчиња.
Пропусницата може да се добие од апликација за паметни телефони или од владината веб-страница, а на Европејците им е достапна од почетокот на март.
Почнувајќи од среда, граѓаните на околу триесет европски земји, вклучително и целата ЕУ со исклучок на Ирска, ќе треба да имаат електронска дозвола за влез во Обединетото Кралство, кое ја напушти ЕУ во 2020 година. Апликантот мора да приложи фотографија од пасош и од лицето. Процесот трае околу десет минути, информираат од британското Министерство за внатрешни работи.
Во повеќето случаи, одлуката за апликацијата се носи во рок од неколку минути, но можно е да се чека и до три работни дена, велат од Владата.
Доколку апликацијата се обработи успешно, ЕТА е дигитално поврзана со пасошот на апликантот.
Патниците кои претстојуваат на аеродроми без да ја поминат границата со ОК се ослободени од оваа програма. Ова беше направено по притисокот од Хитроу, најпрометниот аеродром во Европа, кој стравуваше од губење на бројот на патници.