Свет
Зеленски: Ова е еколошка бомба на масовно уништување

Уништувањето на браната „Нова Каховка“ во јужна Украина предизвика страв од еколошка катастрофа. Украинскиот претседател Володимир Зеленски ја опишува ситуацијата како „еколошка бомба за масовно уништување“.
Toj рече дека стотици илјади луѓе останале без нормален пристап до вода за пиење.
Нивото на водата продолжи да расте и денеска откако вчера беа уништени браната и хидроцентралата. Илјадници луѓе беа принудени да ги напуштат своите домови. Водата ги поплавува градовите, селата и земјоделските површини и ги загрозува клучните извори на вода.
Киев и Москва меѓусебно се обвинуваат за уништување на браната, без да дадат конкретни докази дека другата страна е виновна. Сè уште не е јасно дали браната е намерно уништена или дали има структурни оштетувања.
Зеленски рече дека Русија сноси кривична одговорност, украинските обвинители го истражуваат инцидентот со браната како случај на екоцид, а слично барање упати и Кремљ.
Последиците од трагедијата ќе бидат познати за една недела, кога водата ќе исчезне, ќе стане јасно што остана и што ќе биде понатаму“, рече Зеленски.
Вниманието сега се фокусира на опасноста за луѓето, животните, земјоделските површини, населбите и изворите на вода. Можна е контаминација со индустриски хемикалии и моторно масло, кое истече од хидроцентралата во реката Днепар.
Претседателот на украинската државна хидроенергетска компанија за Си-ен-ен изјави дека еколошките последици од прекинот ќе бидат значајни и дека од оштетената опрема во централата може да истече моторно масло.
„Прво и најважно, акумулацијата ‘Каховка’, веројатно, ќе се испразни на нула и разбираме дека бројот на риби постепено ќе се намалува“, изјави Ихор Сирота, шеф на „Укрхидроенерго“.
„Сè зависи од степенот на уништување на опремата… Ако штетата е голема, тогаш целото масло ќе истече“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Србија им препорачува на граѓаните да не патуваат во Хрватска на почетокот на август

Министерството за надворешни работи на Србија им препорача на граѓаните на Србија да се воздржат од патување во Хрватска во периодот од 1 до 10 август.
Во соопштението Министерството им советува на граѓаните што ќе бидат на територијата на Хрватска во тој период да избегнуваат собири и други јавни собири, кои може да носат ризик од инцидентни ситуации.
Во тој период – на 5 август, Хрватска ја одбележува годишнината од воено-полициската операција „Бура“. Прославата се одржува на денот кога завршила акцијата. Во Србија годишнината од „Бура“ е на 4 август, денот кога почнала, како ден на сеќавање на жртвите и протераните Срби.
Свет
Откриен можниот мотив на убиецот од Њујорк – оставил проштално писмо

Шејн Девон Тамура (27), напаѓачот кој вчера уби четири лица во деловна зграда во Њујорк, пред да си го одземе животот, оставил проштално писмо во кое тврдел дека боледува од хронична трауматска енцефалопатија (ЦTE) и побарал неговиот мозок да биде анализиран по смртта, јавува „Си-ен-ен“.
Во краткото писмо од три страници, пронајдено во неговиот џеб по пукањето, Тамура напишал: „Тери Лонг и американскиот фудбал ми ја донесоа ЦTE, поради што испив литри антифриз. Не можете да се борите против NFL – ќе ве згази.“ Тери Лонг, поранешен играч на Pittsburgh Steelers, беше дијагностициран со ЦTE и изврши самоубиство во 2005 година.
Тамура во пораката додал: „Ве молам, проучете ми го мозокот. Жал ми е. Кажете им дека ми е жал за сè.“
Според извори на „Си-ен-ен“, Тамура во младоста играл американски фудбал, што дополнително го поддржува неговото тврдење дека страдал од ЦTE – болест што најчесто се поврзува со повторувачки удари во глава кај спортисти, дури и без забележани потреси на мозокот.
Според досегашните сознанија, Тамура бил незадоволен од начинот на кој Националната лига за американски фудбал (NFL) со години го игнорира проблемот со ЦTE, кој е потврден кај бројни поранешни играчи по нивната смрт, а многумина имаат проблеми и додека се живи. Полицијата претходно објави дека Тамура имал „историја на ментални нарушувања“.
Тој влегол со пушка во зградата каде се наоѓа седиштето на NFL и почнал да пука во фоајето, а потоа и на 33. кат, пред да си го одземе животот. Еден вработен во NFL е тешко повреден, додека останатите биле навреме евакуирани.
Пријател од училишните денови, Калеб Кларк, го опишал Тамура како „најголемиот шегаџија во одделението, полн со енергија“. „Никогаш не би помислил дека би можел да биде поврзан со насилство. Луѓето му велеа дека е талентиран и посебен, но тој никогаш не кажуваше дека ќе игра во NFL,“ изјавил Кларк.
Во 2015 година, Тамура се преселил во Гранада Хилс и работел во казино во Лас Вегас, каде што поседувал дозвола за носење оружје.
Свет
Кремљ: Путин му се јави на Нетанјаху, разговараа за Сирија и за Иран

Претседателот на Русија, Владимир Путин, разговараше по телефон со израелскиот премиер Бенјамин Нетанјаху, објави прес-службата на Кремљ. Според руските власти, лидерите на двете земји разговарале за напнатата ситуација на Блискиот Исток.
„Руската страна ја потврди својата цврста позиција во корист на исклучиво мирно решавање на проблемите и конфликтите што постојат во регионот“, вели Кремљ. Путин ја нагласи важноста од поддршка на единството, суверенитетот и територијалниот интегритет на Сирија.
Рускиот претседател исто така ја изрази подготвеноста на Русија да помогне во наоѓањето преговарачки решенија поврзани со нуклеарната програма на Иран.