Претседателот на Украина, Володимир Зеленски, пристигна на плоштадот Свети Петар во Ватикан само неколку минути пред почетокот на церемонијата на погребот на папата Франциско. Неговото присуство предизвика внимание, но уште поголема реакција предизвика неговиот избор на облека.

Имено, Зеленски повторно се појави без класично одело, што се смета за отстапување од строгите протоколарни норми на Католичката црква. Украинскиот претседател беше фотографиран во моментот на пристигнување, носејќи црни панталони, темна кошула и црна јакна – комплетно темна облека, но сепак далеку од официјалниот изглед што се очекува за ваков настан.

Според протоколот на Ватикан, на погребот на папата од мажите се очекува да носат темен костум, бела кошула и темна вратоврска. Иако технички се дозволени и други темни бои како сива или темно сина, светските функционери обично доследно го следат овој дрес-код. Зеленски, очигледно, направи отстапка која не остана незабележана.

Протоколот предвидува и други детали – чевлите, чорапите, капутите и чадорите мора да бидат црни. Допуштено е црно копче на левата јака како знак на жалост, а единствените дозволени украси се папските почести, кои можат дискретно да се прикажат на облеката. Сите други модни додатоци – прстени, нараквици, часовници – треба да бидат ненападни и речиси невидливи.

Жените, пак, според протоколот, мора да носат црн фустан или костум кој е под коленото. Препорачани се црни чевли со затворени пети, проѕирни црни гаќички, црни ракавици и мала црна чанта. Иако не е задолжително, дозволено е и носење на црн превез над главата, додека накитот мора да биде скромен – единствено е дозволено едноставно бисерно ланче.

Настапот на Зеленски, во контекст на ваков строго протоколарен настан, повторно ја отвори дебатата за тоа дали политичарите треба пофлексибилно да ги следат правилата, или пак токму нивниот пример е оној што ја одразува почитта кон институциите и традициите.