Свет
Зеленски пред Генералното собрание на ОН рече дека Путин бара начини да го скрши духот на Украина

Украинскиот претседател, Володимир Зеленски во своето обраќање пред Генералното собрание на ОН во Њујорк рече дека нуклеарната безбедност игра клучен дел од „формулата за мир“ што тој ја претстави.
Според него, рускиот лидер Владимир Путин бара начини да го „скрши духот на Украина“, вклучително и таргетирање на енергетската инфраструктура на неговата земја со намерни руски напади врз украинските електрани и целата енергетска мрежа.
„Русија ги уништи сите наши термоцентрали и голем дел од нашите хидроцентрали. Вака Путин се подготвува за зимата, надевајќи се дека ќе измачува милиони Украинци… Путин сака да ги остави во мрак и да ја (натера) Украина да страда и да се предаде“, рече тој.
Претседателот на Украина вели дека неодамна добил извештај дека Путин планира да ги нападне нуклеарните централи и инфраструктурата во земјата. Зеленски предупредува дека секој напад со проектили или беспилотни летала или кој било критичен инцидент во енергетскиот систем на Украина може да доведе до „нуклеарна катастрофа“, додавајќи: „Таков ден никогаш не смее да дојде… Тоа се нуклеарни централи. Тие мора да бидат безбедни“.
Тој додава дека ако „не дај Боже, Русија предизвика нуклеарна катастрофа во една од нашите нуклеарни централи, радијацијата нема да ги почитува државните граници“.
Зеленски вели дека украинскиот народ е тој што ги трпи последиците од руската војна – украинските деца се тие кои „учат да ги разликуваат звуците на различни видови артилерија и беспилотни летала“.
„Украинскиот народ е тој што беше разделен со сила затоа што Владимир Путин одлучи дека може да прави што сака“, рече украинскиот лидер.
Тој вели дека секој светски лидер кој ја поддржува Украина разбира дека Русија сака повеќе територија што е лудо и работи на заземање повеќе земја.
Зеленски рече и дека секоја соседна земја на Русија во Европа и Централна Азија знае дека „војната ќе дојде и до нив“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Објавени последните зборови на папата

Последните зборови на папата Франциско беа благодарност до неговиот здравствен асистент кој му помогна да ги поздрави верниците на плоштадот Свети Петар на Велигден, соопшти Ватикан.
„Ви благодарам што ме доведовте на плоштадот“, му рекол Франциско на Масимилијано Страпети, кој во изминатиот период му обезбедуваше 24-часовна нега на папата.
Папата Франциско (88) почина вчера по мозочен удар и срцева слабост. Претходно оваа година, тој помина пет недели во болница со двојно воспаление на белите дробови, но се врати во Ватикан пред речиси еден месец и оттогаш се чинеше дека се опоравува.
Последните денови ги поминал работејќи, спротивно на советите на лекарите кои го советувале да мирува најмалку два месеци за да му овозможи на телото да закрепне.
Погребот на папата ќе се одржи в сабота.
Свет
Голем број верници се собраа во Рим за да му оддадат почит на папата: „Тој беше посебен, на сите христијани ќе им недостига“

Голем број граѓани на Италија и од други земји се собраа во базиликата „Света Марија Велика“ во Рим, каде што ќе бидат положени посмртните останки на папата Франциско, за да му оддадат почит на починатиот поглавар на Римокатоличката црква.
На тоа место се собраа голем број медиуми од целиот свет, а има и такви на плоштадот пред базиликата „Свети Петар“, каде што ќе се одржи погребот на папата Франциско в сабота, 26 април.
Меѓу собраните е и Евертон Коелјо од Бразил, кој моментно живее во Германија.
„Вчераутро пристигнавме во Рим. Кога вчера шетавме во градот, ја слушнавме многу тажната вест дека папата Франциско починал. Бевме изненадени и многу тажни. Тој беше харизматичен папа. Беше од Аргентина, Јужна Америка. И ние доаѓаме од Јужна Америка, па затоа чувствуваме дека е уште поблизок до нас. Беше приземен, многу близок до луѓето. Не живееше во замок, живееше едноставен живот“, изјави Коелјо за „Танјуг“.
Коелјо понатаму наведува дека ова е најголемата порака што папата Франциско ја остава зад себе.
„На христијаните многу ќе им недостига. Пред да дојдеме се обидовме да присуствуваме на мисата. За жал, минатата недела добивме порака дека папата нема да може да присуствува и дека ја откажале. А сега кога слушнавме дека нè напушта, многу е тажно“, рече Коелјо.
Друг Бразилец, кој денес беше во Рим, за „Танјуг“ вели дека го памети папата Франциско како едноставна личност, но и како некој што го сака фудбалот.
„Се сеќавам дека папата беше навивач на ‘Сан Лоренцо’ во Аргентина. Папата беше одлична личност за мене“, рече соговорникот.
Жителка од Рим за „Танјуг“ вели дека се сеќава на многу од она што го кажал папата Франциско оценувајќи го како неверојатно.
„Мислам дека ќе биде тешко да се најде замена за него“, рече тој.
Погребот на папата Франциско ќе се одржи в сабота, 26 април, во 10 часот наутро на плоштадот пред базиликата „Свети Петар“.
Претходно денес, беше објавено дека телото на починатиот папа ќе биде однесено во базиликата „Свети Петар“ в среда во 9 часот наутро.
Свет
ММФ: Светската економија значително ќе забави, на САД драстично

Меѓународниот монетарен фонд (ММФ) ги намали своите прогнози за економски раст за 2025 година велејќи дека зголемувањето на царините и општата неизвесност ќе доведат до значително забавување.
Во својата најнова глобална прогноза,ММФ предвидува дека светската економија ќе порасне за 2,8 процента оваа година, што е намалување во однос на претходната проценка од 3,3 проценти.
Најголем пад меѓу развиените економии забележаа Соединетите Американски Држави – сега се очекува раст од 1,8 процент во споредба со претходната процена од 2,7 процента.
Прогнозата за раст за Обединетото Кралство е исто така намалена – од претходните 1,6 процент на 1,1 процент во 2025 година.