Специјалниот прeтставник на Доналд Трамп за Украина, Кит Келог, изјави дека Европа ќе биде консултирана, но на крајот исклучена од мировните преговори меѓу Русија, Украина и САД.

На прашањето дали Европа ќе учествува во овие мировни преговори, Келог одговори: „Доаѓам од школата на реализмот и тоа нема да се случи. И на моите европски пријатели би им рекол: приклучете се на дискусијата, не со жалење дали ќе бидете или не на масата, туку со нудење конкретни предлози, идеи и зголемување на инвестициите во одбраната“.

Украинскиот претседател, Володимир Зеленски претходно рече дека Европа веројатно ќе биде исклучена од преговорите.

Зеленски повика на формирање европска војска во која Украина би имала централна улога. Тој денес потврди и дека Украина не го потпишала договорот што го предложи САД. Трамп, кој ја критикуваше американската помош за Украина од почетокот на руската инвазија, неодамна рече дека сака договор за пристап до украинските минерални ресурси како услов за континуирана поддршка од САД.

Украинскиот претседател, Володимир Зеленски, изјави дека билатералниот договор за клучните минерали за кој се разговара со Соединетите држави се уште не е готов и не содржи одредби со кои Киев сака да ги заштити своите интереси.

Договорот е од клучно значење за напорите на Киев да ја добие поддршката од Доналд Трамп бидејќи американскиот претседател бара брз крај на војната со Русија, а Киев безбедносни гаранции за да се заштити од нова инвазија во случај да се постигне мир.

„Не им дозволив на министрите да го потпишат договорот бидејќи, според мене, тој не е подготвен да не заштити нас, нашите интереси“, рече Зеленски на прес-конференција на маргините на годишната Минхенска безбедносна конференција, на која се собраа глобалните политички и воени лидери.

Зеленски го претстави договорот во интервју за „Ројтерс“ минатата недела, разоткривајќи мапа на која се прикажани бројни наоѓалишта на минерали и велејќи дека станува збор за заемно корисно партнерство за заеднички развој, а не за нивно подарување.

Предметните минерали ќе вклучуваат ретки метали како што се титаниум, ураниум и литиум.

Трамп, кој не се обврза да продолжи со воената помош за Украина, рече дека сака 500 милијарди долари во минерали од Киев и дека поддршката на Вашингтон треба да биде обезбедена.

„Ен-би-си“ повикувајќи се на четворица американски претставници објави дека дминистрацијата на Доналд Трамп и предложила на Украина САД да добијат 50 отсто од украинските минерали. Според двајцата функционери, наместо САД да плаќа за минералите, овој договор ќе биде начин Украина да возврати за оружјето и пакетите со помош од повеќе милијарди долари што САД ги обезбедија од руската инвазија во 2022 година.

Ен-Би-Си понатаму известува дека, според осум американски претставници, американскиот министер за финансии Скот Бенсент му го претставил предлогот на Володимир Зеленски во нацрт-договор за време на нивниот состанок во Киев во средата. Според официјалниот претставник, Зеленски не го потпишал документот и рекол дека треба дополнително да го проучи и да се консултира.

Соединетите Држави побараа од европските земји да предложат какви безбедносни гаранции можат да придонесат за Украина, изјавија четири европски извори.

Изворите рекоа дека САД испратиле документ во кој се поставуваат прашања за можните придонеси од војниците, додека два извори велат дека документот бил испратен претходно оваа недела.

„Фајненшл тајмс“ најпрвин објави дека Вашингтон побарал од европските сојузници информации за оружјето, мировните сили и безбедносните ангажмани за Украина.

„Планот очигледно е да се види како европските сојузници гледаат на можната рамка за преговори за ставање крај на конфликтот и можно ангажирање на Европа и САД“, изјави европски дипломат запознаен со документот.

Документот вклучува шест прашања за сите членки на ЕУ, од кои едно се однесува конкретно за членката што го прима документот, рече дипломатот.

Украинскиот претседател, Володимир Зеленски, претходно денеска повика на создавање на европска армија, велејќи дека континентот повеќе не може да се потпира на заштитата на САД.

„Американците посегнуваат до европските земји и прашуваат колку војници се подготвени да испратат“, рече трет дипломат.

Американскиот Стејт департмент се уште не одговорил на барањето за коментар.