Свет
Изборот на новиот папа чини околу 2,5 милиони евра: секој ден чекање чини 75.000 евра, велат експертите

Додека светот се свртува кон Ватикан за да одлучи кој ќе биде новиот папа, зад затворените врати на Сикстинската капела се одвива процес познат како конклава – долг, таен и, како што се испостави, доста скап настан, според светските медиуми.
Кога кардиналите не успеваат брзо да се договорат за избор на нов поглавар на Католичката црква, трошоците растат од ден на ден. Овој процес, според написите, вклучува сместување за над 100 кардинали во Домот на Света Марта во Ватикан,
– Обезбедување на приватност и безбедност (вклучувајќи блокирање на сигналот, техничка заштита, дополнителен персонал),
– Оброци и логистика (кујна, чистачи, транспорт),
– Церемонијални и технички трошоци во Сикстинската капела (на пр. познатата печка за чад).
Проценките за трошоците дневно варираат, но експертите веруваат дека износот од 50.000 до 75.000 евра дневно е реален. Значи, ако конклавата трае 10 дена, вкупните трошоци можат да надминат 700.000 евра. Ако е потребно еден месец, што не е невозможно – бројката се зголемува на 2 до 2,5 милиони евра, според анализите.
Најдолгиот папски избор се одржал од 1268 до 1271 година во Витербо, кога на Црквата ѝ беа потребни 2 години и 9 месеци за да го избере папата Григориј X. Ситуацијата беше толку екстремна што локалните власти ги затворија кардиналите, им ги намалија оброците, па дури и го отстранија покривот од просторијата за да ги принудат да се договорат.
Иако конклавата симболично делува како аскетски чин, зад сцената се ангажирани десетици луѓе и голема организација. Сикстинската капела е технички подготвена месеци пред конклавата: инсталирани се електронски блокирачи, безбедносни системи, печки за чад, уреди за гласање и стерилни комуникациски системи.
Проценките велат дека целата организација на конклавата може да чини помеѓу 1,5 и 3 милиони евра, во зависност од времетраењето.
Ватикан можеби не плаќа даноци, но цената за избор на нов поглавар на Црквата воопшто не е симболична. Секој ден без папа во денешниот свет ја чини Црквата и финансиски и политички. И додека милиони верници чекаат бел чад, милиони евра полека исчезнуваат во сенката на куполата на Свети Петар, пишуваат свестките медиуми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Аракчи: Иран ќе одговори на повторното воведување на санкции

Министерот за надворешни работи на Иран, Абас Аракчи, денес изјави дека земјата ќе одговори на „нелегалниот потег“ на Велика Британија, Франција и Германија (Е3), кои го иницираа механизмот за повторно воведување на санкциите на ОН врз Техеран поради неговата нуклеарна програма. Според агенцијата Тасним, шефовите на дипломатиите на Е3 го информирале Аракчи за одлуката за покренување на овој механизам и изразиле подготвеност наскоро да најдат решение што ќе спречи понатамошни чекори кон воведување санкции.
Аракчи изјавил дека оваа одлука на европските земји е „неоправдана, нелегална и нема правна основа“, велејќи дека Иран ќе одговори на овој потег за да ги заштити и обезбеди своите национални права и интереси во согласност со нуклеарниот договор од 2015 година и меѓународното право.
Иранскиот дипломат ја повика Е3 да усвои „одговорен пристап“ кон ситуацијата и да го исправи овој „погрешен потег“.
Земјите од Е3 претходно денес соопштија дека одлучиле да го активираат таканаречениот механизам за повлекување на санкциите пред да ја изгубат можноста да ги обноват санкциите врз Техеран кон средината на октомври, кои беа укинати според нуклеарниот договор од 2015 година.
Овие три земји понудија да ги одложат санкциите за период до шест месеци со цел да се овозможат сериозни преговори, доколку Иран продолжи со целосни инспекции на ОН и започне разговори со САД, пренесува Танјуг.
Фото: принтскрин
Свет
Ердоган ја претстави турската „Челична купола“

Турскиот претседател Реџеп Таип Ердоган вчера официјално го отвори интегрираниот систем за воздушна одбрана на Турција, познат како „Челична купола“, кој го опиша како пресвртница за земјата и нејзината одбранбена индустрија.
„Ова е знак на сила за Турција. Воведуваме нова ера за нашата сакана Турција во воздушната одбрана“, рече Ердоган на настан во објектите на одбранбената компанија Аселсан во Анкара. Владата на Ердоган го објави почетокот на развојот на Челичната купола, кој интегрира платформи за воздушна одбрана и сензори од морето и копното во мрежа за заштита на турското небо, во август минатата година.
Ердоган истакна дека најновата фаза од проектот се состои од 47 возила во вредност од речиси 400 милиони евра кои ќе „влеат доверба кај пријателите и страв кај непријателите“. Турската влада не прецизираше кога системот ќе биде целосно оперативен.
„Ниту една земја која нема способност да развива сопствени радарски и воздушни одбранбени системи не може да гледа кон иднината со доверба во однос на актуелните безбедносни предизвици, особено во нашиот регион“, рече Ердоган.
Турција претходно се обидуваше да ја зајакне својата воздушна одбрана со купување на ракетниот систем С-400 од Русија во 2019 година. Сепак, овој потег доведе до тоа Американците да ја суспендираат продажбата на невидливи авиони Ф-35 на Турција, поткопувајќи ги одбранбените цели на Анкара, пишуваат медиумите.
Конфликтите во Сирија и Украина, како и неодамнешните израелски напади врз Иран, ја интензивираа потребата на Турција да развива подобра воздушна одбрана.
Ердоган, исто така, ги претстави новите производствени капацитети на Аселсан, кои треба да се отворат во 2026 година. „Во следните 50 години, Турција ќе биде земја која не само што ги задоволува сопствените потреби, туку и ќе биде лидер во светот во својата технологија“, рече тој.
Фото: принтскрин
Свет
Зеленски: Очекуваме почеток на преговорите за пристапување во ЕУ

Украинскиот претседател Володимир Зеленски денес објави дека имал телефонски разговор со претседателката на Европската комисија, Урсула фон дер Лајен, и дека ѝ се заблагодарил за нејзината солидарност со Украинците по нападот на Русија врз Украина.
Зеленски потсети дека главна цел на нападот бил Киев, како и дека се во тек операции за пребарување и спасување.
Тој изјави дека разговарал со претседателот на ЕК за дипломатска работа за „запирање на убиствата и руската агресија воопшто“, како и за гарантирање на вистинска безбедност за Украинците.
„Разговаравме и за нашиот пат кон европска интеграција, за истовременото отворање на преговарачкиот кластер за Украина и Молдавија. Очекуваме позитивна одлука во блиска иднина“, нагласи Зеленски, пренесува порталот РБК Украина.
Зеленски нагласи дека сè додека Русија не преземе вистински чекори кон мирот, притисокот врз неа мора да се зголеми.
Како што изјави, фон дер Лајен го информирала за подготовката на нов пакет санкции и координацијата со другите партнери.
Фото: принтскрин