Свет
Избувнување на Еширихија коли во САД поради плескавица од Мекдоналдс: „Изворот може да биде кромид“
Едно лице почина, а десетици се разболеа од труење со храна поврзано со плескавиците од Мекдоналдс „Квартер Паундер“ во неколку американски држави, соопштија федералните здравствени власти. Утврдено е дека хамбургерите на Мекдоналдс се поврзани со појава на ешерихија коли.
Избувнувањето, кое започна во септември, се прошири во 10 западни држави со најмалку 49 пријавени инфекции, соопшти американскиот Центар за контрола на болести (ЦДЦ).
„Епидемиолошките податоци покажуваат дека хамбургерите „Квартер Паундер“ кои се служат во Мекдоналдс се контаминирани со ешерихија коли и предизвикуваат гадење“, велат од ЦДЦ.
Најголем број случаи се концентрирани во Колорадо и Небраска. Други држави со случаи вклучуваат Ајова, Канзас, Мисури, Монтана, Орегон, Јута, Висконсин и Вајоминг. Според ЦДЦ, 10 лица биле хоспитализирани — вклучително и едно дете со сериозни бубрежни компликации.
Сите интервјуирани луѓе за инфекциите рекоа дека јаделе во Мекдоналдс пред да се разболат. Повеќето од нив спомнаа јадење на популарниот хамбургер „Квартер Паундер“, соопшти ЦДЦ.
Бактерискиот вид за кој станува збор, Escherichia coli O157:H7, може да предизвика сериозни болести. Тоа беше и извор на епидемија во 1993 година кога четири деца починаа откако јадеа недоволно варени хамбургери во рестораните „Џек ин д Бокс“.
„Првичните информации од Администрацијата за храна и лекови (ФДА) укажуваат дека кромидот може да биде изворот на оваа епидемија. Истражителите од сите агенции работат брзо за да ја идентификуваат контаминираната состојка“, соопшти ЦДЦ.
Акциите на Мекдоналдс паднаа за повеќе од 6 отсто во продолженото тргување, откако најголемиот синџир на храна во светот беше поврзан со појава на ешерихија коли.
„Безбедноста на храната е многу важна за мене и за сите во Мекдоналдс“, изјави извршниот директор на Мекдоналдс во САД, Џо Ерлингер.
Компанијата ја прекина дистрибуцијата на сецкан кромид и привремено го отстрани „Квартер Паундер“ од менито во погодените региони. Покрај тоа, „Квартер Паундер“ исто така, привремено е отстранет од менито во делови на Ајдахо, Невада, Ново Мексико и Оклахома.
„Презедовме чекори за проактивно отстранување на исечениот кромид, кој се користи во Quarter Pounders во одредени држави“, рече Ерлингер.
„Исто така, донесовме одлука привремено да го отстраниме „Квартер Паундер“ од рестораните во одредени држави“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Претседателските избори во Белорусија закажани за 26 јануари 2025 година
Претседателските избори во Белорусија се закажани за 26 јануари 2025 година, пренесува белоруската државна агенција „Белта“.
Оваа одлука е донесена на седница на Претставничкиот дом, се наведува во извештајот.
На последните избори во Белорусија на 9 август 2020 година, актуелниот претседател, Александар Лукашенко, доби 80,1 отсто од гласовите.
Неговата главна противкандидатка Светлана Тихановска освои 10,12 отсто, по што ја напушти Белорусија.
Свет
Тригодишно дете од САД случајно застрела бебе со пиштол
Огромна трагедија се случи во понеделникот во САД кога тригодишно дете уби 10-месечно бебе откако пукаше од наполнет пиштол.
„Бебето беше застрелано и убиено од мало дете кое грабнало наполнет пиштол додека биле во паркиран автомобил и го повлекло чкрапалото“, соопшти полицијата, според „Еј-би-си“.
Пукањето се случило на паркинг во близина на медицински центар во Сан Антонио, Тексас.
Началникот на полицијата на Сан Антонио, Вилијам Мекманус изјави дека во возилото имало жена и три деца. Деца на возраст од 3 и 2 години и 10-месечно бебе биле во задниот дел на возилото, рече тој.
„Едно од постарите деца се фатило за наполнет пиштол кој бил во задниот дел од возилото и случајно го повлекло чкрапалото. Најмалото дете беше застрелано. Ова е страшна трагедија“, рече Мекманус.
Во тек е полициска истрага.
Свет
Скандал во САД: Поранешен директор на модна компанија уапсен поради проституција
Поранешниот извршен директор на модната компанија „Аберкромби и Фич“, Мајк Џефрис, заедно со уште двајца мажи, е уапсен под обвинение за трговија со луѓе и меѓународна проституција.
Обвинението со 16 точки беше објавено утринава, десет години откако Џефрис ја напушти фирмата што ја водеше 22 години, објави „Би-Би-Си“.
Според истрагата, која беше покрената по анализа на „Би-Би-Си“ и колективна тужба, Џефрис и неговите соработници намамиле млади мажи со лажни ветувања за работа во моделирање за да ги однесат на патувања за време на кои сексуално ги злоставувале.
Американскиот обвинител Брион Пис истакна дека обвинетите во подолг временски период сексуално злоставувале млади луѓе во потрага по кариера во областа на модата и забавата.
„Овој случај треба да послужи како предупредување за секој кој мисли дека може да ги искористува другите“, рече Пис на прес-конференција.
Покрај Џефрис (80), обвинети се и неговите партнери Метју Смит (61) и Џејмс Џејкобсон (71), а сите тројца се соочуваат со обвиненија за сексуална трговија и меѓународна проституција, во кои се вклучени 15 неименувани жртви меѓу 2008 и 2015 година.
Доколку бидат прогласени за виновни, може да се соочат со доживотна затворска казна.
Според обвинението, Џефрис и Смит им платиле на десетици мажи за секс во нивните домови во Менхетен и Хемптонс, како и во хотели низ Европа. Исто така, беше наведено дека Џејкобсон имал „проба“ со младите луѓе пред да ги запознае со Џефрис и Смит.
Компанијата изрази шокираност и вознемиреност од обвинувањата против Џефрис, велејќи дека е тешко да се поверува дека компанијата има некаква врска со тоа.
Џефрис ја водеше компанијата од 1992 до 2014 година, кога поднесе оставка поради критиките дека не е во чекор со променливите вкусови на тинејџерите.