Свет
Израелски министер: Не треба да се грижиме за гладот во Газа, светот нека се грижи за нив

Израелскиот министер за наследство, Амихај Елијаху, изјави дека Израел не треба да се грижи за гладот во Газа предизвикувајќи осуда од целиот политички спектар.
Според „Тајмс оф Израел“, десничарскиот политичар од партијата Оцма Јехудит ги отфрли обновените предупредувања на ОН за глад во опколената енклава тврдејќи дека израелската влада „брза кон уништување на Газа“.
„Фала му на Бога што го бришеме тоа зло. Цела Газа ќе биде еврејска“, изјави Елијаху за Радио Кол Барама во четвртокот, според Ynet.
„Не треба да се грижиме за гладот во Газа – светот нека се грижи за нив. Ниедна нација не ги храни своите непријатели. Дали целосно сме се изгубиле од умот? Дали треба да се грижиме за нивната вечера?“, додаде тој.
Израелскиот премиер Бенјамин Нетанјаху се дистанцира од забелешките велејќи дека Елијаху не е член на Советот за национална безбедност, кој одлучува за водењето на војната.
„Политиката на оваа влада е јасна и единствена. Неговите изјави не ја претставуваат владата“, рече Нетанјаху.
Израелскиот амбасадор во САД, Јехиел Лајтер, исто така ги осуди коментарите на Елијаху нарекувајќи ги „погрешни, глупави и целосно нерепрезентативни за владата и за народот на Израел“. Во објава на X тој истакна дека Израел е посветен на создавање механизам за доставување хуманитарна помош до цивилите во Газа, „но не преку Хамас“.
Според локалните здравствени власти, повеќе од 59.000 Палестинци се убиени во Газа од октомври 2023 година, вклучувајќи најмалку 113 лица кои починале од глад. Шефот на Светската здравствена организација, Тедрос Аданом Гебрејсус, во средата изјави дека израелската блокада ја довела Газа на работ на масовен глад.
Филип Лазарини, шеф на агенцијата на ОН за палестинските бегалци (UNRWA), го повика Израел да дозволи влез на 6.000 камиони со помош блокирани во Египет и во Јордан.
Во меѓувреме, израелските власти ги обвинуваат Хамас и другите вооружени групи за складирање резерви и напаѓање цивили на местата за дистрибуција на помош.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Трамп и Меланија снимени во напнат дијалог: таа одмавнува со главата, тој го впери прстот

Камерите забележале наизглед напната расправија меѓу Доналд и Меланија Трамп додека со хеликоптерот се враќале во Белата куќа по посетата на Обединетите нации во Њујорк.
Снимката, објавена од „Скај њуз Арабија“, го прикажува претседателскиот пар како седат еден спроти друг додека хеликоптерот слетува на тревникот на Белата куќа. На видеото се гледа како 55-годишната Меланија одмавнува со глава и гестикулира кон својот 79-годишен сопруг, кој ѝ возвраќа со вперен прст кон неа.
@skynewsarabia جدال حاد بين ترامب وميلانيا داخل مروحيتهما #سوشال_سكاي ♬ original sound – SkyNewsArabia
Посетата на Њујорк беше обележана и со неколку непријатни моменти. Пред обраќањето на Трамп во седиштето на ОН подвижните скали на кои стоеле тој и Меланија ненадејно застанале.
This is insane…
As Trump arrived to the UN, the escalator stopped working the moment he stepped on it.
Then the teleprompter stopped working the moment he got up to the podium to speak. pic.twitter.com/XBTgfr6zJ8
— Geiger Capital (@Geiger_Capital) September 23, 2025
Конзервативните медиуми веднаш го нарекоа инцидентот саботажа, а Џеси Вотерс од „Фокс њуз“ дури предложи зградата на ОН да се урне. Портпаролот на ОН подоцна појасни дека камeрман од американската делегација случајно го активирал механизмот за стопирање.
Набргу потоа, додека се подготвувал за говор пред светските лидери, Трамп се соочил со дефект на телепромптерот (т.н. идиот – уред што прикажува текст, најчесто говори или скрипти, на екрани поставени пред говорникот или камерата), па морал да направи пауза од 15-ина секунди.
„Можам само да кажам дека оној што управува со ова е во големи проблеми“, изјавил Трамп.
Во интервју за „Фокс њуз“, портпаролката на Белата куќа, Каролин Левит, се закани со последици:
„Ако откриеме дека вработени во ОН намерно се обиделе да му подметнат сопки – буквално да им подметнат сопки на претседателот и на првата дама на САД – тогаш подобро да одговараат за тоа. Јас лично ќе се погрижам“, изјави таа.
Својата порака ја повтори и на социјалните мрежи: „Ако некој во ОН намерно ги стопирал подвижните скали… треба веднаш да биде отпуштен и истражен“.
Левит потсети и на напис од „Тајмс оф Лондон“, во кој се наведува дека вработени во ОН се шегувале дека ќе ги исклучат скалите и ќе кажат „немаме пари“ алудирајќи на американското намалување на финансирањето за организацијата.
Свет
Полска до своите граѓани: Итно напуштете ја Белорусија, користете ги сите средства

Полската амбасада во Минск упати драматичен апел до своите граѓани во Белорусија веднаш да ја напуштат земјата користејќи ги сите расположиви комерцијални и приватни средства.
Дипломатите издадоа предупредување поради можно затворање на границите и други непредвидени околности, пишува полскиот портал warszawawpigulce.pl.
„Препорачуваме граѓаните на Република Полска, кои остануваат на територијата на Република Белорусија, да ја напуштат нејзината територија користејќи ги расположивите комерцијални и приватни средства“, се вели во официјалното соопштение објавено на веб-страницата на владата.
Апелот доаѓа само еден ден откога полско-белоруската граница беше повторно отворена за сообраќај по речиси две недели затворање. Иако границата е отворена од вчера, полските претставници, вклучувајќи го и премиерот Доналд Туск, предупредија дека таа може повторно да се затвори ако ситуацијата ескалира.
Алармантната изјава од Амбасадата е директна последица на напнатите настани од последните недели. Министерството за надворешни работи веќе го издаде своето прво предупредување на 5 септември откога белорускиот КГБ го уапси полскиот монах Гжегож Гавл кого режимот на Александар Лукашенко го обвинува за шпионажа.
27-годишниот кармелит од Краков беше уапсен во градот Лепел под обвинение за собирање информации за руско-белоруските воени вежби „Запад 2025“. Белоруската пропаганда тврди дека кај него е пронајден таен воен документ, тврдење што полската влада категорично го отфрла како провокација.
„Полските специјални служби не користат монаси за собирање информации за воени маневри“, истакна Јацек Добжински, портпарол на координаторот за специјални служби, а премиерот Туск најави одмазднички мерки против Белорусија.
Амбасадата предупредува дека во случај на понатамошно влошување на безбедносната состојба евакуацијата може да биде значително потешка или дури и невозможна.
„Ситуацијата во регионот е напната, војната е во тек, а има и случаи на произволни апсења полски граѓани“, се вели во соопштението. За Полјаците што сакаат да ја напуштат Белорусија во случај границата повторно да се затвори, се препорачуваат алтернативни патишта преку граничните премини со Литванија или Латвија, како и летови од меѓународниот аеродром во Минск.
Апсењето на монахот Гавло е само најновото во низата инциденти насочени против полските граѓани. Белоруските организации за човекови права веќе го прогласија за политички затвореник.
Тој е едно од 15-те лица неодамна додадени на списокот на политички затвореници, чиј вкупен број во Белорусија, според организацијата „Вијасна“, моментно изнесува 1.193. Кармелитскиот ред издаде соопштение во кое бара молитви за притворениот брат: „Со жалење ве известуваме дека нашиот брат Гжегож Гавел О. Карм е уапсен во Белорусија“.
Воени вежби како заднина на тензиите
Тензиите дополнително се засилија со неодамнешните руско-белоруски воени вежби „Запад 2025“, кои се одржаа од 12 до 16 септември и беа првите вакви вежби од почетокот на војната во Украина.
Иако официјално беше најавено учество на речиси 13.000 војници, германските воени извори проценуваат дека вистинскиот број би можел да биде и до 30.000. Токму поради зголемениот број провокации Полска привремено ја затвори границата на 12 септември, која беше повторно отворена дури вчера.
Фото: ЕПА
Свет
Кина го губи „Тик-ток“ во САД, „Бајт денс“ останува со мал удел

Американскиот претседател Доналд Трамп потпиша уредба со која се потврдува договорот за одвојување на „Тик-ток“ од кинеската компанија „Бајт денс“ и пренос на мнозинскиот удел во рацете на американски инвеститори.
Според планот, конзорциум предводен од софтверскиот гигант „Оракл“ ќе управува со американските операции на „Тик-ток“, ќе ги чува податоците во домашни сервери и ќе добие лиценца за алгоритмот што препорачува содржини. Очекувањата се американските инвеститори да држат околу 80 отсто од уделите, додека „Бајт денс“ ќе остане со минорен дел.
„Тик-ток“ во САД има околу 180 милиони корисници, а со овој договор платформата ќе продолжи да биде достапна под американска контрола и построг надзор. Од администрацијата на Трамп велат дека целта е заштита на националната безбедност и податоците на корисниците.