Свет
Израелците се повеќе го бомбардираат југот на Појасот Газа
Израелската армија нападна цели во близина на градот Кан Јунис на југот на Газа, објавија денеска израелските медиуми. Весникот „Тајмс оф Израел“ ги цитираше палестинските извештаи дека израелските сили започнале силно бомбардирање на цели во градот за кои велат дека се поврзани со Хамас.
Претходно, десетици израелски тенкови напредуваа кон јужниот дел на Појасот Газа и беа забележани во близина на Кан Јунис, објави израелски весник. Очевидци забележале и оклопни транспортери и булдожери. Израелската војска во неделата објави дека ја проширува својата копнена кампања на „сите области“ на Појасот Газа, што предизвика обновени повици до Израел да ги заштити палестинските цивили додека ги напаѓа милитантите на Хамас.
Хуманитарните организации зборуваат за „неподносливо“ страдање на цивилното население. Израел го обвинува Хамас дека извршува напади од станбени населби и болници и дека користи цивили како штит. Во раните утрински часови, се огласија сирени за воздушен напад во неколку градови и кибуци во близина на границата на Израел со Газа, соопшти израелската војска.
Според израелските медиуми, нема извештаи за проектили кои навистина ги погодиле тие области. Израелските копнени сили моментално напредуваат на југот на Појасот Газа, но повеќенеделната операција против Хамас на северот од крајбрежната област се уште не е завршена.
Последната војна во Газа беше предизвикана од бруталните и невидени напади врз јужен Израел на 7 октомври, во кои загинаа околу 1.200 луѓе. Околу 240 луѓе беа киднапирани и однесени во Газа. Привременото примирје, кое овозможи некои од заложниците да бидат разменети за Палестинци во израелските затвори, заврши во петокот.
Израел соопшти дека во Газа се уште има 137 заложници. Според Министерството за здравство под контрола на Хамас, повеќе од 15.800 луѓе се убиени во израелските копнени и воздушни напади насочени кон густо населената крајбрежна област, додека повеќе од 42.000 луѓе се исчезнати.
Бројот на загинати во овој момент не може да биде независно потврден, но Обединетите нации и другите набљудувачи истакнуваат дека владините бројки генерално се покажале веродостојни во минатото. Израелската армија исто така објави дека повторно ги нападнала позициите на Хезболах во Либан, откако шиитската проиранска милиција го гранатирала Израел.
Воените авиони на израелските воздухопловни сили „нападнаа точка за лансирање на Хезболах, терористичка инфраструктура и воен комплекс“ како одговор на вчерашното „лансирање од Либан кон Израел“, соопшти израелската војска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Загинаа две лица, а пет се водат како исчезнати по судар на чамец и крузер во Дунав кај Будимпешта
Две лица го загубија животот доцна синоќа, а пет се водат за исчезнати во судар на мал моторен чамец и крузер на реката Дунав северно од Будимпешта, соопшти денеска унгарската полиција.
Телата на возрасен маж и жена се пронајдени северно од главниот град, а властите се уште трагаат по пет исчезнати лица.
Сома Чечи, портпарол на полицијата во Будимпешта, на прес-конференција рече дека, според досегашните сознанија, во чамецот имало вкупно осум возрасни лица и потврди дека две лица загинале, а пет се водат како исчезнати. Тројца мажи и две жени моментално се бараат со глисери и дронови, јавуваат унгарските медиуми.
Полицијата соопшти и дека во градот Комаром бил запрен поголем брод, а од увидот било откриено дека му е оштетен страничниот дел. Се врши увид и во тек е истрага за опасноста по водениот пат и смртта на неколку лица.
Регион
По обидот за атентат словачкиот премиер Фицо е надвор од животна опасност
Словачкиот премиер Роберт Фицо е надвор од животна опасност по обидот за атентат, изјави денеска министерот за одбрана и вицепремиер Роберт Калинак за словачката новинска агенција ТАСР.
Состојбата на Фицо се подобрува, а лекарската комисија утре треба да одлучи дали тој ќе биде префрлен. Фицо моментално се опоравува во универзитетската болница во Банска Бистрица.
Фицо беше тешко повреден на 15 мај, по седницата на Владата во градот Хандлова, кога 71-годишниот писател Јурај Цинтула, од непосредна близина неколку пати пукаше со пиштол во него. Специјалниот кривичен суд во словачкиот град Пезинок, со силно полициско обезбедување вчера му одреди притвор на Цинтула.
Свет
Девојка од Чикаго на 17 години стана доктор на науки
Дороти Џин Тилман од Чикаго стана најмладата личност, на 17 години, што успеа да се здобие со докторска диплома за интегрирано бихевиорално здравје во Аризона.
„Ова е прекрасна прослава и се надеваме дека Дороти Џин ќе инспирира повеќе студенти. Но, ова е нешто многу ретко и уникатно“, вели вонредниот професор Лесли Менсон.
Кога повеќето ученици се обидуваат да се адаптираат во средно училиште, Дороти веќе беше запишана на колеџот во Лејк Каунти во северен Илиноис, каде што дипломира психологија.
Во 2018 година таа дипломира на отсекот хуманитарни науки на колеџот „Екселсиор“ во Њујорк. Две години подоцна, магистрира на колеџот „Јунити“ во Мејн пред да биде примена на Програмата за бихевиорално управување.
Поголемиот дел од нејзиното образование го реализира на далечина, преку онлајн настава.
Како што вели таа, најголема заслуга за целото нејзино образование има нејзината баба, како и нејзината мајка, на која е благодарна за помошта и насочувањето. Секако, целиот образовен процес не бил без жртва.
„Немав секојдневна училишна работа, немав училишно фотографирање или работи кои создаваат единство меѓу врсниците “, вели таа.