Свет
Израел денеска ќе ги прими телата на најмладите убиени заложници од Газа

Израел денеска се подготвува за враќањето на телата на најмладите заложници од нападот на Хамас на 7 октомври 2023 година, Кфир Бибас, кој немаше ниту една година, и неговиот тогаш четиригодишен брат Ариел, кои станаа едни од најмоќните симболи на траумата нанесена тој ден.
Палестинските милитантни групи соопштија дека телата на двете момчиња и нивната мајка Шири Бибас, заедно со телото на четвртиот заложник, Одед Лифшиц, ќе бидат предадени во четврток според договорот за прекин на огнот во Газа постигнат минатиот месец со поддршка на САД и посредство на Катар и Египет.
Премиерот Бенјамин Нетанјаху во кратка видео изјава рече дека четврток ќе биде „многу тежок ден за државата Израел“. „Вознемирувачки ден, ден на тага“. Стотици луѓе се собраа на зимскиот студ пред ослободувањето на телата.
Кфир Бибас имаше девет месеци кога семејството Бибас, вклучително и нивниот татко Јарден, беа киднапирани во Кибуц Нир Оз, една од низата заедници во близина на Газа кои беа прегазени од напаѓачите од Газа предводени од Хамас на 7 октомври.
Хамас во ноември 2023 година соопшти дека момчињата и нивната мајка биле убиени во израелски воздушен напад, но израелските власти никогаш не ја потврдиле нивната смрт, па дури и во последен момент, некои одбиле да прифатат дека се мртви.
„Шири и децата станаа симбол“, рече Јифтах Коен, жител на Нир Оз, кибуц кој изгуби околу четвртина од своите жители, убиени или киднапирани за време на нападот на 7 октомври. „Се уште се надевам дека се живи“.
Јарден Бибас беше вратен во претходната размена на заложници за затвореници овој месец. Но, семејството оваа недела изјави дека нивното „патување не е завршено“ додека не добијат конечна потврда за тоа што се случило со момчињата и нивната мајка.
Предавањето ќе биде прво враќање на мртвите тела според сегашниот договор, а Израел не се очекува да го потврди нивниот идентитет додека не се завршат целосните ДНК проверки.
И покрај обвинувањата од двете страни за прекршување на примирјето, кревката спогодба што стапи на сила на 19 јануари се одржува уште од првата во серијата размена на заложници за палестински затвореници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Белата куќа му се заблагодари на Илон Маск за неговата работа

Беелата куќа му се заблагодари на Илон Маск за неговата услуга, откако милијардерот објави дека ја прекинува својата вклученост во администрацијата на претседателот Доналд Трамп, изјави портпаролката на претседателот.
„Му благодариме за неговата работа. Му благодариме што го основаше DOGE (кратенка од неговиот Оддел за владина ефикасност), а напорите за намалување на измамите и злоупотребата ќе продолжат“, им рече на новинарите портпаролката на Белата куќа, Керолин Левит.
Таа одби дополнително да коментира за заминувањето на милијардерот кој оваа недела првпат го критикуваше неговиот близок сојузник Трамп.
Маск вчера потврди дека ја завршува својата мисија за намалување на федералните трошоци.
„Како што завршува мојот мандат како специјален вработен во владата, би сакал да му се заблагодарам на претседателот Доналд Трамп што ми даде можност да ги намалам непотребните трошоци“, напиша претприемачот во средата на својата платформа за социјалните медиуми „Икс“.
„Мисијата Doge ќе стане уште посилна во иднина и ќе стане начин на живот во владата“, рече шефот на „Тесла, „Слејс Икс“ и „Икс“.
Членовите на администрацијата на Трамп ќе работат со персоналот на DOGE во различни федерални агенции за да ги унапредат постоечките напори, објави во четвртокот Белата куќа.
Министрите тесно соработуваа со Илон Маск и ќе продолжат да соработуваат со вработените во DOGE кои им се приклучија на сите овие агенции откако беа назначени од претседателот, изјави Левит за новинарите.
Свет
Белата куќа: Се надеваме на директни преговори меѓу Русија и Украина следната недела

Белта куќа изрази надеж дека Русија и Украина ќе се сретнат следната недела во Истанбул и ќе продолжат со директни преговори со цел да се постигне напредок кон завршување на војната, пренесува агенцијата „Анадолија“.
„Колку што јас разбирам, а на тоа и се надеваме, дека Русија и Украина ќе учествуваат во директни разговори и преговори следната недела во Истанбул. Веруваме дека тој состанок ќе се одржи, а тоа е состанок што претседателот го поддржа и силно го застапуваше за двете страни да се сретнат и директно да преговараат“, изјави портпаролката на Белата куќа, Каролин Левит.
Таа додаде дека американскиот претседател, Доналд Трамп, од почетокот на војната јасно ставил до знаење дека сака решение на преговарачка маса, а не на бојното поле: „Тоа им го кажа и на двајцата лидери, и јавно и приватно. Значи, се надеваме дека следната недела ќе направиме чекор напред.“
Левит додаде дека нема планови претседателот да испрати американски претставник на преговорите, но не ја исклучи таа можност.
Втората рунда директни преговори меѓу Русија и Украина е предложена за 2 јуни во Истанбул, откако двете страни се сретнаа на 16 мај. Тогаш, меѓу другото, се договорија за размена на заробеници и за подготовка на нацрт-документи за понатамошни мировни чекори.
Додека Русија најавува дека ќе го претстави нацрт-документот на преговорите, Украина бара да го добие однапред, пред самата средба.
Кремљ го оцени ставот на Украина како неконструктивен.
Свет
Драма на најпрометниот аеродром во Лондон: луѓето во паника поради сомнителен пакет

Еден од терминалите на аеродромот Хитроу беше евакуиран поради „соменителен пакет“, оставајќи илјадници патници во неизвесност.
Патниците беа евакуирани од Терминалот 3 на најпрометниот британски аеродром по дојава за сомнителен предмет во зградата.
Метрополитенската полиција претходно соопшти дека е на терен и дека се справува со ситуацијата.
Портпарол на полицијата изјави за „Д Сан“: „Станува збор за сомнителен пакет и сме на лице место, постапуваме.“
На социјалните мрежи беа објавени бројни видеа и фотографии од луѓе кои сведочат дека биле евакуирани поради безбедносната закана.
Сепак, полицијата подоцна потврди дека станувало збор за „лажна тревога“ и дека повеќе нема закана.
Возовите на „Хитроу експрес“ исто така беа погодени од вонредната состојба – операторот објави на социјалните мрежи дека има доцнења на некои од нивните услуги.
Сè уште не е потврдено дали ќе има доцнења и кај летовите поради евакуацијата.
„Попладнево, нашите тимови реагираа на потенцијално сомнителен предмет во Терминал 3. Како претпазливост, еден мал дел од терминалот беше привремено евакуиран додека надлежните органи ги извршија потребните проверки. Проблемот сега е безбедно решен. Им се извинуваме на патниците за предизвиканата непријатност.“, беше соопштено.