Свет
Израел формираше влада на национално единство и воен кабинет: собрана војската на границата

Израел формираше влада на национално единство додека ја напаѓа Газа за да го искорени Хамас и распоредува сили северно од густо населената палестинска енклава, пренесуваат медиумите во светот.
Премиерот Бенјамин Нетанјаху се согласи да формира влада за време на војната со поранешниот министер за одбрана и лидер на центристичката опозициска партија Бени Ганц и целосно да се фокусира на конфликтот, се вели во заедничката изјава со партијата на Ганц.
Бројот на загинати во Израел се искачи на 1.200, а повеќе од 2.700 се ранети, соопшти израелската армија, во повеќечасовните напади на милитантите откако тие ја пробија граничната ограда што ја опкружува Газа во саботата. Бригадите Ал Касам, военото крило на Хамас, соопштија дека сè уште се борат внатре во Израел.
Израел распореди тенкови и оклопни возила северно од Газа, каде што се водат судири, но не ги коментираше тврдењата на Хамас. Во одмаздничките напади врз блокираната енклава, според палестинските власти, загинале 1.055 луѓе, а 5.184 биле ранети. Обединетите нации соопштија дека меѓу загинатите има девет вработени во нивната агенција за бегалци.
Израел најави брза казна за најсмртоносниот напад на палестинските милитанти во неговата 75-годишна историја, кој остави тела расфрлани на музички фестивал.
Војската соопшти дека десетици нејзини воени авиони погодиле повеќе од 200 цели во текот на ноќта во населбата Газа Сити, кои, како што рече, ги користи Хамас за да ги изврши своите напади.
Вашингтон соопшти дека разговара со Израел и Египет за безбедно минување на цивилите од Газа, која е исклучена од снабдувањето со електрична енергија, вода и храна. Обединетите нации соопштија дека повеќе од 180.000 жители на Газа останале без покрив над главата, а многумина се сместени на улиците или во училиштата.
Палестинското Министерство за надворешни работи соопшти дека во израелските напади се уништени повеќе од 22.600 станбени единици и 10 здравствени установи, а 48 училишта се оштетени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Канадскиот премиер: Царините на Трамп се трагедија

Канадскиот премиер Марк Карни најави ограничен сет на контрамерки против американските царини, нарекувајќи ги протекционистичките потези на американскиот претседател Доналд Трамп трагедија за светската трговија.
Карни рече дека канадската влада ќе го имитира американскиот пристап и ќе воведе царини од 25 отсто за сите возила увезени од САД кои не спаѓаат во трговскиот договор меѓу САД, Мексико и Канада.
Новата мерка ќе се применува за увезена стока во вредност од 35,6 милијарди канадски долари (околу 22,8 милијарди евра), изјави владиниот портпарол.
Карни на прес-конференцијата рече и дека новите тарифи нема да важат за автоделови и нема да влијаат на деловите од Мексико.
„Со оглед на очекуваната штета за сопствениот народ, американската администрација на крајот треба да го смени правецот на својата политика. Но, не сакам да давам лажна надеж“, рече Карни, додавајќи дека би можело да помине многу време пред САД да го променат својот пристап.
Карни рече дека претходно најавените канадски царини ќе останат на сила.
Свет
Трамп: Случајот против Марин Ле Пен е лов на вештерки

Американскиот претседател Доналд Трамп денеска и понуди поддршка на лидерката на француската екстремна десница, Марин Ле Пен, откако судот во Париз ја осуди неа и дваесетина луѓе од нејзината партија за проневера на средства од Европската унија.
Судијата ѝ забрани на Ле Пен пет години да се кандидира на избори, што ќе ја спречи да учествува во претседателската трка во 2027 година, освен ако пред тоа не може да поднесе жалба на пресудата. Судијата сега е под полициска заштита откако добил смртни закани, изјави завчера извор за Ројтерс.
Ле Пен, партиските сојузници и поддржувачи го обвинија судот за мешање во демократијата. Францускиот премиер Франсоа Бајру пред три дена пред пратениците изјави дека „безусловно го поддржува“ судството.
Во објава на Truth Social доцна синоќа, Трамп го нарече случајот против Ле Пен „лов на вештерки“ и го пофали лидерот на екстремната десница. „Таа претрпе загуби, но продолжи, а сега, непосредно пред нешто што би било голема победа, ја фатија со помал прекршок за кој веројатно не знаела. Мене ми звучи како книговодствена грешка“, напиша Трамп во објавата.
Активистите за човекови права правеа споредби меѓу Ле Пен и Трамп во текот на годините за нивните антиимигрантски ставови и антималцинската реторика.
Пресудата на францускиот суд претставува пречка за 56-годишната Ле Пен, која до пресудата беше фаворит во анкетите пред претседателските избори во 2027 година.
Свет
Трамп го отпушти шефот на агенцијата за безбедност

Шефот на американската Агенција за национална безбедност (НСА) Тимоти Хог е сменет, објави Вашингтон пост, повикувајќи се на двајца сегашни и еден поранешен американски функционер.
Тимоти Хог, кој исто така ја предводеше американската сајбер команда (USCYBERCOM), беше сменет заедно со неговата заменичка Венди Нобл, објави весникот.
Според „Вашингтон пост“, Нобл е префрлена на работно место во Пентагон. НСА е дел од Министерството за одбрана на САД.
Актуелните и поранешните функционери, наведени од весникот, изјавија дека не ја знаат причината за отпуштањето на Хог или трансферот на Нобл.
Заменик-шефот на USCYBERCOM, Вилијам Хартман, беше именуван за вршител на должноста директор на НСА, а Шејла Томас, која беше извршен управител на агенцијата, беше именувана за негов привремен заменик, објави Пост.
Ниту Пентагон ниту Белата куќа веднаш не одговорија на барањето за коментар.
Демократот Џим Хајмс, висок член на Комитетот за разузнавање на Претставничкиот дом, го осуди разрешувањето на Хог.
Откако ја презеде функцијата на 20 јануари, републиканскиот претседател Доналд Трамп отпушти голем број шефови на американски разузнавачки служби и наместо нив назначи луѓе лојални нему.