Илјадници луѓе повторно излегоа на улиците на Израел во саботата во одбрана на демократијата и против контроверзните судски реформи и покрај тоа што десничарската влада на премиерот Бенјамин Нетанјаху ги одложи реформите. Главниот собир се одржа во Тел Авив и тоа 16-та последователна сабота. Демонстрантите вееја израелски знамиња и носеа транспаренти на кои пишуваше дека ќе ја бранат демократијата.

„Со продолжување на плановите за напад врз судството, владата уште подлабоко го дели израелското општество, нанесувајќи им штета на економијата и безбедноста на Израел“, велат организаторите.

Според организаторите, протестите се одржаа на околу 100 локации низ Израел. Откако беше објавена реформата на почетокот на јануари, десетици илјади Израелци се собираат секоја недела за да го критикуваат нацрт-законот и владата што Нетанјаху ја формираше во декември, а во која е вклучена и екстремната десница.

Прославата на 75-годишнината од државата Израел следната недела ќе се одржи во сенка на нови протести. Противниците на реформата најавија „најголеми демонстрации во историјата на Израел“ на денот кога започнуваат прославите во вторник навечер.

Преку реформата, Владата меѓу другото сака да ги намали овластувањата на Врховниот суд за кој вели дека е политизиран, за во иднина парламентот со просто мнозинство гласови да ги поништи одлуките на Врховниот суд.

Критичарите на реформата веруваат дека таа може да го отвори патот за нелиберален и авторитарен пресврт. Под притисок на граѓанските организации и опозицијата и во рамките на коалициската влада и војската, Нетанјаху го одложи контроверзниот закон на крајот на март за „да го олесни дијалогот“:

Опозицијата, пак, не верува дека власта ќе постигне компромис, а досега речиси и да нема напредок. Критичарите предупредуваат дека планираната реформа на Нетанјаху се заканува со загрозување на поделбата на судската и извршната власт и дека владата би можела да ја протурка реформата низ скратена постапка кога ќе започне парламентарната седница на 30 април.