Европа
Илјадници Украинци и Полјаци на ЛГБТ парадата во Варшава: „Русија ни ја одзеде поворката“

Илјадници Полјаци и Украинци денеска маршираат за мир, барајќи да се стави крај на дискриминацијата на ЛГБТ луѓето на заедничката парада на гордоста во Варшава, за која организаторите велат дека се обидува да ги брани слободата и еднаквоста додека војната фрла сенка врз Источна Европа.
Годишната парада на гордоста во украинскиот главен град Киев е откажана поради руската инвазија, поради што ЛГБТ заедницата во Варшава се обедини со Украинците за да организира настан во полската престолнина.
„Русија го одзеде правото за кое се бориме со години, Русија ни ја одзеде поворката, нашиот марш на еднаквост што го одржуваме секоја година од 2012 година во Киев. Затоа маршираме во Варшава“, рече Лени Емсон, извршен директор на „Киев прајд“ кој дојде во Полска на маршот.
Конзервативните ставови кон сексуалната ориентација се широко распространети во двете земји. Полските владејачки националисти го направија она што тие го нарекуваат „ЛГБТ идеологија“ клучно прашање во изборните кампањи, додека екстремно десничарските групи во Украина редовно ги напаѓаа ЛГБТ активистите пред војната.
Но, бидејќи многу ЛГБТ луѓе во Украина се пријавуваат во војската за да ја бранат земјата, активистите рекоа дека се надеваат дека војната може да помогне да се урнат предрасудите.
„Луѓето кои се подготвени да умрат во одбрана на оваа земја, мислам дека имаат право да бидат еднакви, да имаат право, на пример, на граѓански брак“, рече Темур Левчук, ЛГБТ активист во Киев. Тој не можеше да присуствува на маршот во Варшава поради законот со кој се спречуваат украинските мажи на возраст меѓу 18 и 60 години да ја напуштат земјата.
„Сите сме луѓе, без разлика кого сакаме“
Олена Микал, 29-годишна маркетинг менаџер во ИТ компанија со седиште во Киев, која побегнала од Украина во март, рече дека собирот во Варшава бил чин на солидарност со ЛГБТ заедницата во нивната матична земја.
„Тука сум затоа што не можам да одам на парада во Украина. Сите сме луѓе, без разлика кого сакаме“, изјави Микал за „Ројтерс“ непосредно пред почетокот на настанот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Фото+видео) Опасна бура во Словенија: паѓаше град со големина на јајце, издадено портокалово предупредување

Словенија е погодена од силни бури придружени со силни налети на ветер, поројни дождови и град.
Сообраќајот во земјата е забавен, а Агенцијата за заштита на животната средина издаде портокалово предупредување за целата територија.
Од агенцијата посочуваат дека поради дождот може да дојде до задржување на вода и зголемување на реките.
На објавите на социјалните мрежи се гледа дека паѓал град со големина на јајце.
Според објавите и коментарите, најлошото било околу Шемпетер во долината Савиња.
Како што јавува ТВ Словенија, во текот на вечерта бурата постепено ќе ослабне , најдоцна на истокот од земјата.
Бура пристигнува и во Хрватска
Силна бурна ќелија, која пристигна преку брегот од Италија, се движи кон внатрешноста на Хрватска, придружена со врнежи од дожд, силни налети на ветер и локален град.
Водна пијавица е снимена над морето во близина на Умаг. Се очекува активноста на бурата дополнително да се интензивира во наредните часови.
Управата за заштита на животната средина издаде портокалова тревога за регионите Риека, Карловац и Загреб поради локално можни грмотевици со привремено силни до бурони ветрови, а можна е и појава на град.
Европа
Колона долга околу 700 километри забележана на автопат во Франција

Колона долга речиси 700 километри е забележана денеска на автопат во Франција, додека вкупната должина на сите колони на патиштата во земјата изнесуваше 1.051,6 километри во време на зголемен сообраќаен интензитет поради летните одмори и смената на туристи, што колоквијално се нарекува „Црна сабота“.
Како што извести BFM TV, сообраќајот на патиштата во Франција дополнително бил забавен поради две сообраќајни несреќи на автопатот кон Медитеранот и Атлантскиот Океан.
Според податоците на Bizon Futé, француската агенција за следење на состојбата на патиштата, до 7 часот утрово колоните биле подолги од 200 километри, а до 10 часот веќе надминале 570 километри.
Како што беше соопштено, гужвите се во согласност со прогнозите на агенцијата, која предупреди на „исклучително тешки сообраќајни услови“ за оваа сабота, а врвот на метежот се очекува околу пладне.
Сообраќајот во правец кон Алпите исто така е интензивен и загушен, со задржувања од час и 45 минути во тунелот Мон Блан во правец кон Италија
Европа
Финска, Норвешка и Шведска под жештина невидена од 1961 година

Земјите од Северна Европа, познати по својата студена клима, се соочуваат со интензивни топлотни бранови, со температури над 30 степени Целзиусови во подолг временски период.
Во норвешкиот дел од Арктичкиот круг, метеоролошките станици регистрирале температури над 30 степени Целзиусови дури 13 дена во јули, додека Финска имала три последователни недели со температури од 30 степени, пишува денес британскиот „Гардијан“.
Според научниците, тоа е најдолгиот период според историските податоци од 1961 година, а трае 50 проценти подолго од претходниот рекорд.
„Топлотниот бран е сè уште во полн ек, со максимални температури денес околу 32-33 степени. Дури и арктичките региони забележаа три недели со температури над 25 степени и може да ги соборат своите августовски температурни рекорди утре“, изјави Мика Рантанен, климатолог во Финскиот метеоролошки институт, во објава на социјалните мрежи.
Норвешкиот метеоролошки институт соопшти дека температури над 30 степени се регистрирани 12 дена во јули во најмалку една станица во трите најсеверни покраини на Норвешка.
Во Шведска, метеоролозите, исто така, регистрираа продолжени топлотни бранови во неколку северни градови, при што метеоролошката станица во Хапаранда регистрираше температури од 25 степени или повеќе 14 дена по ред.
Овие топлотни бранови, кои ја погодија северна Европа кон средината на јули, беа предизвикани од топлите води покрај северниот брег на Норвешка, кои ги покачија температурите во нордиските земји за осум до 10 степени над сезонските норми.
Поради интензивен топлотен бран, лизгалиште на мраз во северна Финска ги отвори вратите за луѓе кои бараат засолниште од жештината, откако локалните болници беа преполни, а сточарите предупредија дека нивните ирваси се на работ на смртта од жештината.