Свет
Индиската полиција почна со пренесување на телата на загинатите планинари
Индиските власти во средата почнаа со пренесување на телата на седуммина планинари кои во мај загинаа во лавина во близина на втората највисока планина во Индија, до пониска точка на планината, каде што ќе бидат идентификувани, изјавија официјални лица.
Осум алпинисти – четворица од Велика Британија, двајца од САД и по еден од Австралија и Индија беа пријавени за исчезнати на 31 мај, откако не успеаја да се вратат во својот камп во близина на планината од 7.816 метри, Нанда Деви.
Телото на еден од нив не е пронајдено.
Паравоените индо-тибетски гранични полициски сили ја предводат мисијата за пренесување на телата од планината во градот Питорагар, на север од државата Утараканд.
Првите четири тела беа пренесени во средата, изјави Вивек Кумар Панди, портпарол на силите.
„Oстанатите три, исто така, ќе бидат префрлени во Питорагар наскоро“, рече Панди.
Полицијата, амбулантните возила и погребалните комбиња ги чекаа телата на аеродромот во Питорагар, рече шефот на полицијата, Рам Чандра Раџгуру.
Телата ќе бидат идентификувани по што ќе бидат пренесени во друг град за аутопсија, додаде тој.
Алпинистите се идентификувани како Мартин Моран, Џон Мекларен, Руперт Вивел и Ричард Пејн, сите од Велика Британија, Ентони Судекум и Роналд Бејмел од САД, Рут Мекенс од Австралија и Четан Панди од индиската планинарска фондација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Српската министерка за енергетика понуди оставка поради санкциите врз НИС
Владата на Србија денеска одржа вонредна седница поради американските санкции врз НИС.
Министерката за енергетика, Дубравка Џедовиќ Хандановиќ, понуди оставка.
„Се подготвивме за непредвидливи ситуации, за да можеме да реагираме. Сепак, мора да ги задржиме нашите резерви. Како министерка за енергетика, ве известувам дека е невозможно да се води овој ресор во ситуација кога НИС е под санкции. Подготвена сум да поднесам оставка, бидејќи не гледам начин на кој можеме да ја надминеме ситуацијата. Без рафинеријата во Панчево нема живот за нас. Таа е од витално значење за граѓаните и економијата. Можеме да чекаме три или четири дена, но не повеќе од тоа, бидејќи нема прилив на сурова нафта“, кажа Џедовиќ Хандановиќ.
Претседателот на Србија, Александар Вучиќ, оцени дека Србија „страдала како трева во судир на слонови“ во оваа криза, а министерот за финансии, Синиша Мали, нагласи дека земјата нема избор и дека ситуацијата ја загрозува економската стабилност и перспективите за инвестиции.
Седницата ја следеа претседателката на Собранието Ана Брнабиќ, министри и директори на јавни претпријатија.
САД испратија одговор на барањето што руските сопственици на Српската нафтена индустрија го испратија до американскиот OFAC на 11 ноември, со кое се бара продолжување на лиценцата за работа, врз основа на преговори со трета страна, а кое Србија официјално го поддржа.
Во барањето се наведува дека руската страна е подготвена да ја отстапи контролата и влијанието врз компанијата НИС на трета страна. Ова сега е одбиено.
САД воведоа целосни санкции врз НИС поради нејзиното мнозинско руско сопствеништво на 9 октомври.
Свет
(Видео) Силен олуен систем го погоди западниот регион на Буенос Аирес
Силен олуен систем го погоди западниот регион на Буенос Аирес, а градот Сан Николас се уште е под портокалово предупредување поради можни екстремни временски удари, соопштија метеоролозите.
Според Аргентинскиот државен хидрометеоролошки завод, нестабилноста во атмосферата се зајакнува поради судир на студен и топол воздух, а низок воздушен притисок дополнително го зголемува ризикот од интензивни олуи.
Во Генерал Вилегас се забележани драматични ѕидови од облаци кои брзо се движат преку рамницата, а се очекуваат силни грмотевици, нагло засилени поројни врнежи, можен крупен град и ветрови со брзина до 70 километри на час.
🤯⛈️ Impresionante tormenta en General Villegas, provincia de Buenos Aires. pic.twitter.com/VwPP1Abk58
— Tormentas de Zona Sur (@SurTormentas) November 16, 2025
Граѓаните се предупредени на претпазливост и да избегнуваат излегување надвор за време на екстремните временски услови.
Свет
Украина зимава ќе увезува гас од Грција
Украина ќе увезува гас од Грција за да ги покрие потребите за време на зимата, изјави денеска украинскиот претседател Володимир Зеленски.
„Денес веќе го подготвивме договорот со Грција за гас за Украина, што ќе претставува уште една рута за снабдување со гас за да обезбедиме увоз за зимата“, напиша Зеленски на Телеграм, пренесува Ројтерс.
Тој додаде дека Украина „има договори за финансирање на увозот на гас“, со кои ќе се покријат скоро две милијарди евра за увоз на гас, за да се „надоместат загубите во украинското производство, предизвикани од руските удари“.
Зеленски ги објави најновите информации за снабдувањето со гас пред својата посета на Грција, која е најавена за денеска, од каде потоа ќе отпатува во Франција и Шпанија.
Украинскиот претседател рече дека Киев обезбедил средства за увоз на гас од европски партнери и банки под гаранции на Европската комисија, како и од украинска банка, додека истовремено соработува со американски партнери за целосно финансирање.

