Свет
Индија: Дом за сирачиња продавал бебиња на странци
Дом за деца без родители во индиската држава Западен Бенгал продавал деца на странци, утврди истрагата во која се уапсени раководните лица на таа институција.
Меѓу уапсените се и Чандана Чакраборти, жена која управува со локална невладина организација и Сонали Мондал, задолжен за усвојување при истата невладина организација, за која истрагата утврди дека продавале деца, но и дека ги мамеле странците кои сакале да купат деца од домот кој тие го воделе. Полицијата го затвори домот.
Утврдено е дека деца купувале брачни двојки од Индија, Сингапур, Шпанија, Франција и САД. Децата биле на возраст од 6 месеци до 14 години, а цената за нив се движела од 12.000 до 23.000 долари, пренесува агенцијата AFP.
Според извор во полицијата, кој сакал да остане анонимен, се очекуваат уште апсења во наредните денови откако полицијата ќе стапи во контакт со двојките кои платиле за да добијат дете.. Во изјава за AFP, истиот извор, рекол дека една двојка од Франција во 2015 година платила 1,5 милиони рупи (23.000 американски долари) за дете.
Чакраборти и Мондал признале дека измамиле една двојка од Америка кои им платиле 15.000 долари за бебе кое не им го дале. За истото бебе зеле 6.000 долари и од други клиенти од Индија. Откриено е дека едно бебе било продадено во Сингапур за 3.000 долари, а властите се сомневаат дека постојат уште многу слични случаи.
Уапсената Чандана Чакраборти рекла дека таа самата не ја организирала продажбата на деца, туку дека во тоа учествувале неколку локални политичари. Во текот на апсењето таа се заканила дека ќе ги открие имињата на тие политичари за кои тврди дека се обиделе да ја наместат со цел самите да се извлечат.
Во акцијата во која е разбиен синџир на трговија со деца уапсени се 21 лице кои се осомничени дека организирале продажба на новороденчиња.
Според податоци на индискиот огранок на организацијата Humans Rights Watch, 10 отсто од луѓето-жртви на трговија со луѓе завршуваат во странство. крај/мф/вс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
(Видео) Трамп заигра во Малезија: Се приклучи кон традиционалниот танц и ги изненади домаќините
По пристигнувањето во Малезија за самитот на АСЕАН, американскиот претседател Доналд Трамп се придружи на танцот за добредојде на локалните жители, објавија локалните медиуми.
Американскиот претседател беше пречекан од малезискиот премиер, Анвар Ибрахим, кој му приреди добредојде со традиционален малајски танц, објавува „Манго њуз“.
По краткиот разговор меѓу двајцата лидери, претседателот Трамп одлучи накратко да се придружи и да танцува со локалното население, што предизвика голем ентузијазам кај присутните.
Патем, американскиот претседател Доналд Трамп пристигна утрово во главниот град на Малезија, Куала Лумпур, и присуствуваше на потпишувањето на продолжениот договор за прекин на огнот меѓу Тајланд и Камбоџа, а исто така потпиша и трговски договори со двете земји. Ова е неговата прва станица на азиската турнеја.
Трамп првпат интервенираше во јули за да го заврши смртоносниот петдневен граничен конфликт меѓу двете земји, а мировниот договор беше потпишан утрово кратко по пристигнувањето на Трамп на самитот на земјите од Југоисточна Азија во Куала Лумпур, објави Ројтерс.
Овој состанок во главниот град на Малезија се темели на примирјето постигнато пред три месеци кога Трамп ги повика лидерите на двете земји во тоа време да ги прекинат непријателствата или, како што предупреди, ризикуваат привремено да бидат прекинати трговските преговори со Вашингтон.
Пред да го потпише договорот за прекин на огнот утрово, камбоџанскиот премиер Хун Манет му се заблагодари на Трамп за неговото одлучно водство и неуморните напори за спроведување на договорот.
И тајландскиот премиер му се заблагодари на американскиот претседател за напорите за посредување во примирје и вети дека отстранувањето на оружјето и ослободувањето на воените заробеници ќе започнат брзо, додавајќи дека декларацијата ќе обезбеди „основа за траен мир“ доколку целосно се спроведе.
По договорот за примирје, Тајланд и Камбоџа поединечно потпишаа трговски договори со САД денес во Куала Лумпур, објавува Би-Би-Си.
За време на потпишувањето, Трамп рече дека договорите се од големо значење за двете земји.
Со денешното потпишување и објавување на трговскиот договор на САД со Камбоџа и договорот за минерали со Тајланд, американскиот претседател јасно стави до знаење дека неговата администрација ќе ги користи трговските договори како клучен начин за вршење дипломатски притисок врз земјите за постигнување мир, заклучува Би-Би-Си.
„Ние спроведуваме трансакции, многу од нив, со двете земји сè додека живеат во мир“, рече Трамп, додавајќи дека бизнисот мора да се користи за да се осигури дека двете земји нема да војуваат.
Свет
Трамп: Блискиот Исток е безбеден и ќе остане таков долго време
Претседателот на САД, Доналд Трамп, на средбата со емирот на Катар, Тамим бин Хамад ал-Тани, изјави дека сега „има безбеден Блиски Исток“ и дека ќе остане таков „долго време“.
За време на средбата во американскиот претседателски авион, кој се полнеше со гориво во Катар на пат кон Малезија, Трамп рече дека Ал Тани е „еден од големите владетели на светот, не само на Блискиот Исток“, објавува „Тајмс оф Израел“.
„Неговата земја го сака и го почитува. Не знам што е поважно, да бидеш сакан или да бидеш почитуван? Дали имате преференција? Бидејќи ги имате и двете, вие сте еден од ретките“, рече Трамп.
Трамп му рече на катарскиот премиер Мохамед бин Абдулрахман бин Јасим ал-Тани, кој присуствуваше на состанокот, дека е негов пријател „и пријател на светот“.
Американскиот претседател рече дека тој и двајцата катарски лидери направиле многу заедно, „особено во последната година“.
„Мир на Блискиот Исток, и тие беа многу голем фактор во тоа. Ви благодариме, и имате безбеден Блиски Исток во моментов, и ќе го задржите така долго време“, додаде Трамп.
Свет
Двајца уапсени по спектакуларната кражба во Лувр: полицијата се сомнева на помош од внатре
Француската полиција уапси две лица осомничени за кражба на непроценливи крунски драгоцености од музејот Лувр, извршена на 18 октомври. Истрагата за „организирана кражба“ ја водат Париската бригада за сузбивање на разбојништва (BRB) и Централната канцеларија за борба против трговијата со културни добра (OCBC), објави Ле Паризијен.
Осомничените, двајца мажи на возраст околу 30 години од департманот Сена-Сен-Дени, наводно биле дел од четворочлена група која провалила во галеријата „Аполон“, каде се изложени драгоцености на француската круна, меѓу кои и накитот на царицата Евгенија.
Според Телеграф, детективите утврдиле дека се работи за кражба со помош од внатре, бидејќи еден од чуварите бил во контакт со крадците пред нападот.
„Постои дигитален доказ кој покажува дека чувар на музејот соработувал со крадците и им дал информации за безбедносниот систем“, изјавил извор близок до истрагата.
Директорката на музејот, Лоренс де Кар потврдила дека ниедна камера не го надгледувала балконот преку кој провалниците влегле:
„За жал, од страната на галеријата Аполон единствената камера е насочена кон запад и не го покрива балконот погоден од провалата“, изјавила таа.
Париската обвинителка Лор Бекo потврдила дека се земени повеќе од 150 ДНК и папиларни траги. Дел од преостанатите експонати се пренесени во трезорот на Банката на Франција, а истрагата ја следи и израелската фирма „ЦГИ Груп“, позната по решавањето на кражбата во Дрезден.
„Очигледно сакаме што побрзо да ги уапсиме сторителите и да го вратиме накитот пред да биде растопен. Ги стражуваме сите можности“, изјавила Беко.
Фото: Пиксбај

