Во рускиот воздушен напад врз Киев вчера загинаа најмалку 23 лица, вклучувајќи и двегодишно дете, потврдија украинските власти.

Во нападот, кој беше дел од вториот најголем воздушен напад врз Украина од почетокот на војната, беа вклучени 598 беспилотни летала и 31 ракета.

Зградата на Делегацијата на ЕУ и просториите на Британскиот совет беа погодени во Киев. Украинските служби за итни случаи соопштија дека спасувачите работеле цела ноќ за расчистување на урнатините, отстранувајќи повеќе од 2.260 тони урнатини и обезбедувајќи психолошка поддршка на 147 лица.

Белата куќа соопшти дека американскиот претседател Доналд Трамп „не е задоволен од веста, но не е ниту изненаден“, со оглед на долготрајната војна.

Руските напади погодија повеќе локации низ главниот град, вклучувајќи го центарот на Киев и неговите предградија.

фото: принтскрин

Турскиот министер за надворешни работи, Хакан Фидан, изјави дека Турција не била присутна на неодамнешните состаноци за војната во Украина бидејќи не е страна во војната. Тој нагласи дека Турција има улога на неутрален посредник.

„Ние не сме страна во војната. Не требаше да бидеме на масата ниту во Алјаска ниту во Вашингтон. Бидејќи Трамп ги обединува завојуваните страни“, рече Фидан за време на интервјуто за TGRT Haber, одговарајќи на прашањата за отсуството на Анкара од неодамнешните состаноци меѓу американскиот претседател Доналд Трамп и украинскиот претседател Володимир Зеленски и европските лидери.

Фидан изрази надеж за перспективите за мир. „Се надеваме на мир меѓу Русија и Украина. Имаме доволно причини за таа надеж“, рече тој, истакнувајќи дека одредени позиции развиени за време на третата рунда разговори во Истанбул подоцна се материјализирале и во разговорите во Алјаска.

Тој нагласи дека Русите го измениле својот став. „Претходно, Русите бараа целосно преземање на териториите на четири региони. Сега се откажаа од овие барања и, освен за еден регион, постојните фронтовски линии ќе останат“, објасни тој.

Тој изјави дека Русија бара предавање на 25-30 проценти од регионот Донецк кој сè уште не е под нејзина контрола. Фидан верува дека губењето на регионот Донецк би ја комплицирало одбраната на Украина доколку борбите продолжат по некое време.

За потсетување, третата рунда преговори меѓу делегациите на Украина и Русија се одржа во Истанбул на 23 јули. Двете страни се согласија за нови размени, не само на заробени војници, туку и на цивили. Украинската делегација ја предводеше Рустем Умеров, а руската делегација Владимир Медински.

фото: принтскрин

Италијанците реагираа со негодување на веб-страницата Phica.eu, со нејзините стотици илјади корисници, откако се дозна дека сексистичката онлајн платформа со години собирала, уредувала и менувала фотографии од жени без нивно знаење или согласност, придружени со вулгарни коментари.

Некои од фотографиите на страницата биле уредувани и придружени со срамни, вулгарни и насилни коментари. Меѓу целите на сексистичките напади на страницата биле премиерката Џорџа Мелони, лидерката на опозицијата Ели Шлајн, инфлуенсерката Кјара Ферањи и европратеничката Алесандра Морети.

Целиот случај излезе на виделина кога локалната советничка од Латина, Валерија Кампања, ги открила своите фотографии на контроверзната страница и поднела тужба.

„Денес сум згрозена, лута и разочарана. Но, не можам да молчам“, напиша 24-годишната девојка на Фејсбук. Морети, чии слики, фотографии и снимки од телевизиски емисии во кои се појавила биле украдени и изменети и ставени на располагање на илјадници корисници, исто така поднесе тужба против веб-страницата.

Таа рече дека непристојните коментари влијаеле на нејзиното ментално здравје и ја загрозуваат безбедноста на другите жени. Phica.eu објави дека ја затворила својата веб-страница бидејќи, како што беше кажано, „не можеле навреме да го спречат целото токсично однесување“.

„Целата содржина ќе биде избришана“, рекоа администраторите на страницата. Сличен скандал се случи претходно со италијанската Фејсбук група „Mia Moglie“ (Мојата жена), која исто така неодамна беше затворена. Во таа група, повеќе од 30.000 мажи споделија фотографии од своите партнерки во воајеристичката заедница, исто така придружени со непристојни коментари.

фото: принтскрин