Свет
Иран: Заливските сили на САД сега не претставуваат закана, туку цел
Иран ги предупреди американските сили по трет пат во 72 часа да престанат со понатамошното влегување во Персискиот Залив, предвидувајќи катастрофални резултати ако не се повлечат, пренесува „Брејтбарт“.
Еден ирански свештеник предупреди дека групата за напад на „УСС Абранам Линколн“ што сега се собира во регионот може да биде уништена со леснотија.
„Нивната милијарди долари вредна флота може да биде уништена со еден проектил”, се вели во известувањето на ајатолахот Јусеф Табатабаи Неџад по петочната молитва во Исфахан, пренесе ИСНА .
Ова беше проследено со второ предупредување во саботата кога командант во иранската елитна Исламска револуционерна гарда изјави дека САД нема да се осмелат да почнат воена акција против Иран и предупреди на жестока реакција ако тоа се случи.
Јадолах Џавани, заменик-шефот за политички прашања на ИРГЦ, зборуваше откако американскиот државен секретар, Мајк Помпео, се закани со брз и решителен одговор на секој напад на Иран.
Во неделата беше издаденo третo предупредување од Иран, кога висок командант на ИРГЦ изјави дека американското воено присуство во Заливот некогаш претставувало сериозна закана, но сега претставува цел.
„Носач на авиони кој има носи 40 до 50 авиони и 6.000 војници беше сериозна закана за нас во минатото, но сега тој е цел и заканите се претворија во можности”, рече Амирали Хаџизаде, шеф на воздухопловното крило на гардата.
Засилено застрашувачките закани доаѓаат по најавата на Белата куќа минатата недела дека ќе испрати група за напади на „УСС Абрахам Линколн“ и бомбардери Б-52 во Персискиот Залив за да му се спротивстават на Техеран. Носачот во четвртокот помина низ Суецкиот Канал.
„Ангажирањето на групата за напади на УСС Абрахам Линколн и оперативната бомбашка единица се смета за промислен чекор како одговор на зголеменат иранска подготвеност да спроведе напади против американските сили и нашите интереси. Белата куќа не бара војна со иранскиот режим, но ќе ги браниме персоналот на САД, нашите сојузници и нашите интереси во регионот”, изјави портпаролот на Пентагон, Чарлс Самерс.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Стинг и „Колдплеј“ бараат ослободување на иранскиот рапер осуден на смрт
Активистите за човекови права, заедно со 100 музичари, вклучувајќи ги Стинг и „Колдплеј“, бараат ослободување на иранскиот рапер Тумај Салехи, осуден на смрт поради поддршка на масовните протести во Иран есента 2022 година. „Смртната пресуда на Салехи е кулминација на три години судско вознемирување вклучувајќи апсење, затворање и тортура“, се вели во петицијата на лондонската организација Index on Censorship.
Во многу од неговите песни пејачот го привлече вниманието на состојбата со човековите права во Иран. Во октомври 2023 година на Салехи му беше доделена наградата за слобода на изразување од страна на Index on Censorship.
„Мора да се дозволи уметноста да критикува, провоцира, преиспитува и предизвикува авторитет“, велат потписниците.
„Ниту еден уметник не треба да биде подложен на каков било вид судско малтретирање поради остварување на своето право на слобода на изразување, а камоли да биде осуден на смрт“.
Смртната казна за Салехи беше објавена на крајот на април. Оваа вест предизвика незадоволство во Иран и други земји во светот. Властите донесоа одлука во врска со поддршката на Салехи за масовните протести во Иран во есента 2022 година. Во минатото раперот со своите текстови ги критикува социјалните и политичките проблеми во земјата.
Свет
Папата ги повика владите на демографски политики: „Не недостигаат кучињата и мачките, туку децата“
„Владите мора да спроведат сериозни и ефективни политики за благосостојбата на семејствата за да се спротивстават на падот на наталитетот и стареењето на населението“, рече денеска папата Франциско и ги повика младите да имаат верба во иднината.
Говорејќи на конференцијата за сè потешката демографска криза, папата рече дека бројот на првите раѓања е показател за надежта на луѓето и дека Европа сè повеќе се претвора во „стар, уморен и резигниран“ континент.
„Потребни се ефективни политики, храбри, конкретни и долгорочни одлуки. Потребна е поголема посветеност на сите влади за помладите генерации да ги остварат своите легитимни соништа“, рече папата.
Стапката на наталитет во Европа минатата деценија падна на 1,5 раѓање на жена. Ова е повисоко од најниските нивоа, како оние во источна Азија, но многу помалку од 2,1 потребни за одржување на населението.
„Постои факт што ми го кажа еден демограф. Моментно, инвестициите со најмногу приходи се оние во фабриките за оружје и контрацепција. Едниот го уништува животот, другиот го спречува. Каква иднина имаме? Тоа е лошо“, вели папата.
Бројот на раѓања во Италија падна на рекордно ниско ниво во 2023 година и се намалува веќе 15-та година по ред.
„Домовите се полни со предмети, но без деца, стануваат многу тажни места. Не недостигаат мали кучиња, мачки. Нема недостиг од тоа. Има недостиг од деца“, рече папата.
Тој предложи политики што нема да ги принудуваат мајките да избираат помеѓу кариерата и грижата за децата и кои на младите парови ќе им обезбедат стабилни работни места и можност за купување недвижен имот.
„Знам дека за многумина од вас иднината изгледа неизвесна и дека поради падот на наталитетот, војните, пандемиите и климатските промени, не е лесно да се одржи надежта жива. Но, не откажувајте се, имајте верба “, им рече тој на младите.
Свет
Египет ги повика Хамас и Израел да покажат флексибилност и да постигнат договор за прекин на огнот во Газа што е можно побргу
Египет апелира до Хамас и Израел да покажат флексибилност за што побргу да се постигне прекин на огнот во борбите во Газа, соопшти утрово египетското Министерство за надворешни работи. Египет смета дека преговорите во Каиро не доведоа до прекин на огнот. Тие во моментот се во деликатна фаза, а делегациите на Хамас и Израел го напуштија главниот град на Египет, се наведува во соопштението.
Во телефонски разговор со американскиот државен секретар Ентони Блинкен египетскиот министер за надворешни работи Самех Шукри ја нагласи „важноста да се повикаат страните да покажат флексибилност и да ги направат сите неопходни напори за постигнување договор за прекин на огнот и на тој начин да се стави крај на хуманитарната трагедија во Газа, соопшти Министерството.
Каиро стравува од опасноста израелската операција во Рафа да ги загрози стабилноста и безбедноста на регионот, се додава во соопштението на египетската дипломатија.
Блинкен потврди дека Соединетите Американски Држави се против голема воена операција во Рафа и какво било принудно раселување на Палестинците од Газа, изјави неговиот портпарол, Метју Милер.
Израелската армија во вторникот распореди тенкови во Рафа и ја презеде контролата на граничниот премин со Египет блокирајќи го главниот премин за конвои со хуманитарна помош кон опколената палестинска територија.