Свет
Иран има доволно збогатен ураниум за пет нуклеарни бомби, тврди израелски министер
Израелскиот министер за одбрана, Јоав Галант, предупреди во четвртокот дека Иран збогатил доволно ураниум за да изгради пет нуклеарни бомби, пренесува „Ал Арабија“.
„Досега, Иран акумулира материјал збогатен до 20 отсто и 60 отсто за пет нуклеарни бомби. Да не се лажете, Иран нема да биде задоволен со само една нуклеарна бомба“, изјави Галант по средбата со својот грчки колега Николаос Панајотопулос во Атина.
„Не правете грешка“, рече Галант, според извештајот.
Израел континуирано го обвинува Иран дека се обидува да развие нуклеарно оружје и постојано предупредува дека ќе преземе воена акција ако дипломатските напори не успеат да ја запрат иранската нуклеарна програма.
Иран негира дека сака да создаде нуклеарно оружје и тврди дека не се обидел да збогатува ураниум над 60 отсто чистота, меѓутоа во февруари нуклеарното надзорно тело на ОН објави дека во Иран се откриени честички на ураниум збогатен до 83,7 отсто, нешто под 90 отсто потребни за производство на нуклеарна бомба.
Израелскиот министер предупреди дека ако Иран одлучи да збогатува ураниум до 90 отсто, тоа ќе биде сериозна грешка и може да го запали регионот.
Галант исто така го обвини Техеран дека во последните шест месеци испраќа оружје во Сирија за терористички цели на неделна основа.
„Сирискиот режим треба да биде свесен дека ИДФ ќе одговори силно на какви било напади што ќе бидат почнати од нејзина територија. Нема да дозволиме Иран да воспостави воена моќ во Сирија или да изгради автопат за испорака на напредно оружје во Либан“, додаде тој.
Иран, верен сојузник на сирискиот претседател Башар ал-Асад, одигра значајна улога во сирискиот конфликт од неговото избивање во 2011 година.
Израелскиот премиер Бенјамин Нетанјаху, пак, предупреди вчера дека Иран може да уценува кој било американски град ако добие нуклеарно оружје.
„Фактот дека Иран може да му се заканува на секој град во САД со нуклеарна уцена е промена на историјата. Иран е како 50 Северни Кореи. Тој е идеолошка сила, која нè смета нас, Израел, како мала сатана и ве гледа вас како големата сатана“, рече Нетанјаху во разговорите со американската конгресната двопартиска делегација предводена од републиканскиот конгресмен Мајкл Тарнер, која е во посета на Израел.
Последниот развој на настаните доаѓа откако напорите за заживување на израелскиот нуклеарен договор од 2015 година се во застој од минатата година. Договорот му овозможуваше на Иран ослободување од меѓународните санкции во замена за строги, но привремени ограничувања на неговата нуклеарна програма.
Договорот се распадна откако САД се повлекоа од него за време на поранешниот претседател Доналд Трамп во 2018 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Русија има сила повторно да го нападне Киев, изјави Зеленски за АФП
Претседателот на Украина, Володимир Зеленски во интервју за Агенцијата Франс прес (АФП) изјави дека не верува оти Русија има сила повторно да го нападне Киев.
Тие немаат сила за голема офанзива против главниот град, како што имаа на почетокот на инвазијата, посочи Зеленски додавајќи оти главни цели на Кремљ се Харков и Донбас.
Тој ги обвини западните земји што му забраниле да ја нападне Русија со нивното оружје.
„Русите можат да не нападнат на наша територија, тоа е најголемата предност што ја има Русија, но ние не можеме да направиме ништо со западното оружје на нивните вооружени системи лоцирани на руска територија. Немаме право“, вели Зеленски.
Според него, Западот се плаши и од руски и од украински пораз и оваа ситуација ја нарече апсурдна.
„Ние сме во апсурдна ситуација кога Западот се плаши дека Русија ќе ја изгуби војната. А во исто време тие не сакаат Украина да ја изгуби. Затоа што конечната победа на Украина ќе доведе до пораз на Русија и конечна победата на Русија ќе доведе до пораз на Украина“, истакна Зеленски.
Регион
Пленковиќ, хрватскиот премиер кој доби трет мандат најави прва седница за понеделник
Откако хрватскиот Сабор вчера ја поддржа 16. Влада на Република Хрватска, а третата предводена од лидерот на Хрватската демократска заедница (ХДЗ) Андреј Пленковиќ, тој во изјава за медиумите рече дека првата седница на новата Влада ќе биде во понеделник и најави продолжување на посветената работа во интерес на хрватскиот народ.
„Благодарам на мнозинството во хрватскиот Сабор што ни ја укажа довербата да станеме Влада на Република Хрватска по трет пат и ние, како што правевме претходните осум години, посветено ќе работиме во интерес на хрватскиот народ, сите наши сограѓани, економијата, врската меѓу татковината и иселениците Хрвати и да спроведеме програма врз основа на која ја добивме довербата на хрватските гласачи“, рече Пленковиќ откако Собранието гласаше за неговата трета Влада
Тој им се заблагодари на сите партнери кои ја поддржаа Владата.
Пратениците во хрватскиот Сабор вчера гласаа за доверба на новата влада на премиерот Андреј Пленковиќ.
За доверба на Владата гласаа 79 пратеници, против беа 61 пратеник, а еден беше воздржан.
Свет
Убиени тројца странски туристи и еден Авганистанец
Вчера од вооружени лица во централен Авганистан се убиени тројца странски туристи и еден Авганистанец, а четворица странски државјани и тројца Авганистанци се ранети, соопшти талибанското Министерство за внатрешни работи.
Според светските агенции не е позната националноста на туристите, ниту кој го извршил нападот за кој што се уапсени четири лица.