Новата влада на Србија беше избрана на седницата на Собранието на Србија.

Владата предводена од премиерот Ѓуро Мацут беше избрана со поединечно гласање на пратениците, од кои 153 гласаа „за“ и 46 „против“.

При објавувањето на резултатите од гласањето, пратениците на опозицијата не беа во собраниската сала, јавуваат срспките медиуми.

Членовите на Владата положија заклетва во присуство на претседателот на Србија, Александар Вучиќ.

По положувањето заклетва, претседателот и членовите на владата го потпишаа текстот на заклетвата и ѝ го предадоа на претседателката на Народното собрание, Ана Брнабиќ, со што заврши вонредната седница на која беше избрана новата влада.

Седницата почна во понеделникот со излагање на мандатарот Ѓуро Мацут, кој истакна дека Србија е уморна од поделби и блокади, дека мора да работи на усогласување на општеството, дека хармонијата може да се гради преку дијалог, толеранција, работа и градење на вредносен систем и рече дека негов прв приоритет ќе биде нормално нормално функционирање на училиштата и факултетите.

Опозиционерите главно го критикуваа предлогот на Владата на Ѓуро Мацут, со оценка дека ништо нема да се промени и дека оваа влада ќе продолжи да работи штетно како и претходната.

Тие искажаа посебни критики за предлогот за министер за образование да се избере Дејан Вук Станковиќ, професор на Факултетот за образование, поради заканите што ги упатувал кон студентите за време на телевизиски настапи, но и поради обвинувањата за сексуално вознемирување од страна на некои негови студентки, за што тој поднесе тужба.

Нови имиња во Владата, заедно со премиерот Мацут, се и професорот на Факултетот за образование на наставници Дејан Вук Станковиќ кој е нов министер за образование, Ненад Вујиќ е избран за министер за правда, а академик Бела Балинт е избрана за министер за наука, технолошки развој и иновации.

За нов министер за земјоделство, шумарство и водостопанство е избран Драган Гламочиќ, Сара Павков за заштита на животната средина, Александра Софронијевиќ за градежништво, транспорт и инфраструктура, додека Јагода Лазаревиќ ќе биде министер за внатрешна и надворешна трговија.

Меѓу новите имиња се министерката за државна администрација и локална самоуправа Снежана Пауновиќ, министерот за човекови и малцински права и социјален дијалог Демо Бериша, како и министерот за информации и телекомуникации Борис Братина.

Прв вицепремиер и министер за финансии повторно е Синиша Мали, а вицепремиери се министерот за внатрешни работи Ивица Дачиќ и министерката за економија Адријана Месаровиќ кои остануваат во нивните ресори.

Министерката за рударство и енергетика Дубравка Ѓедовиќ Хандановиќ, министерот за одбрана Братислав Гашиќ, министерот за надворешни работи Марко Ѓуриќ, министерот за здравство Златибор Лончар, министерот за култура Никола Селаковиќ остануваат на своите позиции од претходниот состав на Владата.

Во Владата останаа и министерот за спорт Зоран Гајиќ, министерот за грижа на селото Милан Кркобабиќ, министерот за туризам и млади Хусеин Мемиќ и министерот за јавни инвестиции Дарко Глишиќ.

Министрите кои ќе останат во владата, а нема да водат исти ресори, е поранешната министерка за семејна грижа и демографија, Милица Ѓурѓевиќ Стаменковски, која сега е избрана на функцијата министер за труд, вработување, бранители и социјала, додека нејзината сегашна функција ја зазеде Јелена Жариќ, која беше министерка на локалната администрација и локалната управа во претходната влада.

Словачкиот премиер Роберт Фицо, кој заедно со неговиот унгарски колега Виктор Орбан се смета за најголем „непријател“ на Украина во рамките на Европската Унија, во среда беше во официјална посета на Хрватска и имаше средби со премиерот Андреј Пленковиќ, претседателот на Парламентот Гордан Јандроковиќ и претседателот на Републиката Зоран Милановиќ.

„Го замолив премиерот да го охрабри обновувањето на протокот на гас низ Словачка“, рече Фицо, потсетувајќи дека Киев го прекина протокот на руски гас до Словачка преку Украина.

Премиерот Пленковиќ истакна дека Хрватска го зголемува капацитетот на терминалот за течен природен гас во Омишљ од 3,1 на 6,1 милијарди кубни метри гас и дека значително инвестира во гасоводна инфраструктура низ целата земја, што ќе овозможи диверзификација на изворите на овој енергетски извор за Централна Европа. Словачкиот премиер му се заблагодари за можноста за соработка во таа област, но додаде дека Братислава „е ориентирана кон увоз на стандарден гас“.

Од друга страна, Фицо рече дека денес Словачка добива 55 проценти од својата нафта преку нафтоводот „Адрија“ и дека е подготвена да го зголеми тој процент, и најави дека ќе побара претставниците на неговата влада да разговараат за ова со хрватската страна.

„Друга тема беше нелегалната миграција. Цениме сè што прави Хрватска кога станува збор за заштита на шенгенската граница, бидејќи хрватската полиција ја чува надворешната граница на Унијата и Шенген, која е долга дури и илјада километри. Во оваа смисла, понудивме можност да испратиме словачки граничари во Хрватска за да помогнат“, рече Фицо.

Кога станува збор за европската помош за одбраната на Украина од руската агресија, словачкиот премиер јасно изјави дека неговата влада нема да го финансира вооружувањето на украинската армија.

„Словачката влада нема да ѝ даде оружје на Украина и ние нема да учествуваме во финансиските механизми за набавка на оружје“, рече Фицо.

Словачкиот премиер во Загреб повтори дека и покрај незадоволството на Брисел, ќе оди во Москва и ќе учествува на воената парада на 9 мај по повод 80-годишнината од победата над нацизмот.

„Никој не може да ми наредува каде да одам или каде не смеам да одам. Секоја земја има своја историја, а Словачка е полна со гробови на војници на Црвената армија кои ја ослободија нашата земја во 1944 и 1945 година. Тоа е дел од нашиот генетски код – знаеме кој нè ослободи и никој не може да ни го одземе тоа. Не може да се каже дека ослободувањето дошло од Запад ако дошло од Исток“, рече Фицо.

Неименуван доктор по палијативна медицина од Берлин е обвинет за намерно убиство на петнаесет пациенти, соопшти денес Канцеларијата на државниот обвинител во Берлин.

„Претпоставуваме дека осомничениот убил најмалку петнаесет пациенти помеѓу 2021 и 2024 година“, соопшти државното обвинителство. Истражителите не исклучуваат дека бројот на жртви би можел дополнително да се зголеми за време на истрагата.

Осомничениот доктор е во притвор од август минатата година, првично обвинет за убиство на четири пациенти. За време на истрагата и прегледот на досиејата на пациентите, истражувачите дојдоа до нови заклучоци. По ексхумацијата и обдукциите на други починати пациенти, достигната е моменталната бројка од 15 смртни случаи, според медиумите во регионот.

Истражителите го пронашле докторот откако медицинскиот персонал на починатите пациенти ги посочил чудните околности. Се покажа дека 40-годишниот лекар предизвикал пожари во три станови на убиените пациенти за да ги скрие доказите за убиството.

Истражителите првично го истражувале палењето како причина за смртта, но за време на истрагата, патронажен лекар им го привлекол нивното внимание, а по обдукцијата било утврдено дека пациентите починале од смртоносна комбинација на лекови.

Истражителите како мотив ја наведуваат желбата за убивање. Со оглед на тоа што осомничениот лекар работел и во други сојузни држави, се стравува дека бројот на убиени пациенти би можел да биде уште поголем.

Понов случај е убиството на 25-годишна жена во нејзиниот стан во Берлин во септември 2021 година. Истражителите веруваат дека тој ѝ дал смртоносна мешавина од различни дроги со намера да ја убие. Покрај тоа, тој е осомничен за убиство на 57-годишна жена во јуни минатата година, исто така во нејзиниот стан во Берлин, каде што, според истражителите, ѝ дал смртоносна комбинација од лекови, пишуваат медиумите во регионот.