Свет
Иран: Не го нападнавме Израел, но одмаздата ќе дојде во блиска иднина

Иранската новинска агенција Фарс, повикувајќи се на безбедносни извори, ги негираше израелските извештаи дека Техеран лансирал дронови кон Израел, додавајќи дека иранската одмазда „ќе се случи во блиска иднина“.
Израелските медиуми објавија дека сите дронови лансирани од Иран како одмазда за израелските ноќни напади врз иранските нуклеарни постројки и елиминацијата на членовите на иранското воено раководство и научниците кои работат на нуклеарната програма биле соборени.
„Иран лансираше околу 100 дронови кон израелска територија како одмазда, што Израел се обидува да ги пресретне“, изјави претходно портпаролот на израелската војска, бригаден генерал Ефи Дефрин, изјава што иранските медиуми сега ја негираат.
Во меѓувреме, американскиот претседател Доналд Трамп изјави дека му дал на Иран ултиматум од 60 дена да постигне нуклеарен договор, но дека сега можеби имаат нова можност да го променат тоа.
„Пред два месеци му дадов на Иран ултиматум од 60 дена да склучи договор. Требаше да го направат тоа! Денес е 61-виот ден. Им кажав што да прават, но тие едноставно не го направија тоа. Сега можеби имаат втора шанса!“, објави Трамп на Truth Social.
Трамп сака да преговара за нов нуклеарен договор со Иран за да го ограничи збогатувањето на ураниум и се закани дека ќе го бомбардира ако не постигнат договор. Но, Иран постојано повторува дека нема да се откаже од својата програма за збогатување на ураниум и негираше дека се обидува да развие нуклеарно оружје.
Државниот секретар на САД, Марко Рубио, денеска кратко по нападите изјави дека САД не биле вклучени во израелските напади и го повика Техеран да не ги таргетира американските интереси или персонал во регионот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел ги повика жителите на Газа да бегат кон југ пред офанзивата

Израелската армија утрово издаде итен апел до палестинските цивили во Газа да се евакуираат кон југ на градот, со цел да се заштитат додека израелските сили ги засилуваат своите напади за освојување на преостанатите упоришта на милитантната група Хамас.
„Ги повикуваме цивилите да ги напуштат зоните на конфликт и да се движат кон безбедните региони на југ. Ова е неопходно за нивната заштита“, се наведува во соопштението на израелската армија.
Покрај тоа, армијата објави воспоставување на нови хуманитарни зони во Кан Јунис, кои ќе вклучуваат теренски болници, водна инфраструктура, шатори, храна, лекови и медицинска опрема. Овие зони ќе се координираат преку „COGAT“ со Обединетите нации и други меѓународни организации, со цел да се минимизираат последиците врз цивилното население.
„Нашата цел е да се обезбеди минимален човечки ризик за цивилите додека ги продолжуваме воените операции против Хамас“, изјавија од израелската армија.
Според извештаите, ситуацијата во Газа останува напната, со значителни опасности за цивилите, додека офанзивата се интензивира и се очекува да продолжи во наредните денови.
Свет
Трамп размислува за воени напади врз нарко-картелите во Венецуела, Мадуро најави вооружена борба

Американскиот претседател Доналд Трамп ја разгледува можноста за извршување воени напади насочени кон нарко-картели што дејствуваат во Венецуела.
Си-Ен-Ен, повикувајќи се на повеќе извори, објави дека тоа вклучува можни напади во самата земја.
Претседателот на Венецуела, Николас Мадуро, синоќа изјави дека Каракас е подготвен да премине од „политичка фаза“ во „фаза на вооружена борба“ во случај на напад од страна на САД, во услови на ескалација на тензиите меѓу двете земји, јави ДПА.
„Моментално сме во политичка фаза. Но, ако Венецуела биде нападната на кој било начин, ќе преминеме во фаза на вооружена борба“, рече Мадуро во коментарите емитувани на венецуелската државна телевизија.
Свет
Трамп: Америка нема само да се брани, туку ќе оди во војна

Американскиот претседател Доналд Трамп потпиша извршна наредба со која Министерството за одбрана на земјата се преименува во Министерство за војна, потег што го најавуваше долго време.
„Тоа е многу посоодветно име, особено имајќи предвид каде се наоѓа светот во моментов. Решивме да се ‘разбудиме’ и да го промениме името на Министерството за одбрана. Значи, се префрламе во Министерство за војна“, рече Трамп при потпишувањето на наредбата во Овалната соба на Белата куќа.
Шефот на Пентагон, Пит Хегсет, кој разговараше со новинарите заедно со Трамп, рече дека САД „не добиле голема војна“ откако Министерството за војна беше преименувано во Министерство за одбрана.
„Одиме во напад, не само во одбрана“, рече Хегсет.
Трамп објави дека се одлучил за друг град во САД каде што планира да распореди војници на Националната гарда за да помогнат во борбата против криминалот. Зборувајќи со новинарите во Овалната соба на Белата куќа, Трамп одби да го именува градот за кој станува збор.
Во последните недели, тој го покрена прашањето за испраќање трупи во неколку градови предводени од демократите, вклучувајќи ги Балтимор, Чикаго и Њу Орлеанс, како дел од поширока иницијатива за воспоставување ред и мир.