Свет
Иран: Не испративме балистички ракети во Русија, европските санкции се незаконски

Иран ги осуди новите санкции на ЕУ и Велика Британија против Техеран и негираше испорака на балистички ракети на Русија, напиша портпаролот на иранското Министерство за надворешни работи, Есмаил Багеи, во објава на „Икс“.
Европската унија вчера се согласи да воведе санкции против седум поединци и седум организации, вклучително и авиокомпанијата „Иран Ер“, поради нивната поврзаност со иранскиот пренос на ракети во Русија.
На листата се Саха Ерлајнс и Махан Ер, како и заменик-министерот за одбрана на Иран Сејед Хамзе Галандари.
Минатиот месец, САД, повикувајќи се на разузнавачки информации за кои рекоа дека биле споделени со сојузниците, рекоа дека Русија добила балистички ракети од Иран за војната во Украина.
Портпаролот на иранското Министерство за надворешни работи денеска негираше дека неговата земја и доставувала балистички ракети на Русија.
„Некои европски земји и Обединетото Кралство, за жал, без докази тврдат дека Иран воено интервенирал во овој конфликт, што е целосно неточно“, рече Багеи, мислејќи на руско-украинската војна.
Багеи ги осуди новите санкции, велејќи дека наметнувањето нови санкции од страна на Европската унија и Обединетото Кралство врз ирански поединци и ентитети е спротивно на меѓународното право.
Според оваа мерка на ЕУ, во санкциите се вклучени и истакнати функционери на Корпусот на Исламската револуционерна гарда.
Санкциите вклучуваат замрзнување на имотот и забрани за патување во Европската унија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелските семејства на заложниците испратија писмо до Трамп: „48 од нив треба да се вратат дома“

Семејствата на заложниците држени во Појасот Газа испратија писмо до американскиот претседател Доналд Трамп пред неговата средба со израелскиот премиер Бенјамин Нетанјаху.
„Ве молам, господине претседателе, не запирајте. Ни требате. Наши сакани татковци, браќа, сестри и деца, 48 од нив треба да се вратат дома“, се вели во писмото на Форумот на семејства на киднапирани и исчезнати лица. Израелската влада верува дека 20 од 48-те заложници се уште се живи. Според извештаите на медиумите, Трамп има намера да му презентира на Нетанјаху план од 21 точка за прекин на огнот.
Овој план наводно вклучува итно ослободување на преостанатите заложници на Хамас во замена за стотици палестински затвореници, како и повлекување на израелската армија од крајбрежниот појас. Палестинската милитантна група Хамас нема да игра никаква улога во идната администрација на Појасот Газа, а на Израел исто така не му е дозволено да ја анектира територијата. Наместо тоа, крајбрежната зона ќе биде управувана од преодна влада.
Семејствата му се заблагодарија на Трамп
Ултрадесничарските коалициски партнери и претставниците на доселениците го зголемија притисокот врз израелскиот премиер пред состанокот. Тие го повикуваат Нетанјаху да анектира делови од окупираниот Западен Брег и да не ја прекинува војната во Појасот Газа без целосен воен пораз на Хамас, објави „Тајмс оф Израел“.
Семејствата на заложниците, од друга страна, бараат од Трамп „цврсто да се спротивстави на сите обиди за саботирање на предложениот договор“. „Вашиот двоен фокус на прекинување на војната и враќање на сите 48 заложници дома е во спротивност со продолжената војна што Израел ја води во моментов. Сакаме да ви се заблагодариме што храбро стоите зад вашите убедувања“, се вели во соопштението.
Фото: принтскрин
Свет
Финскиот претседател му одговори на Лавров: Не сме во војна со Русија

Претседателот на Финска, Александар Стуб, во интервју за американскиот телевизиски канал CNN изјави дека неговата земја и нејзините сојузници во НАТО не се во војна со Русија, реагирајќи на изјавите на шефот на руската дипломатија, Сергеј Лавров.
„Не сме во војна со Русија“, нагласи финскиот претседател во разговор со новинарката Ерин Барнет, коментирајќи ги зборовите на Лавров дека Западот ѝ објавил војна на Москва.
На состанокот на министрите од Г20, рускиот министер за надворешни работи изјави дека НАТО и Европската Унија „ѝ објавија војна на Русија преку Украина“ и дека се директно вклучени во конфликтот.
Финска стана членка на НАТО минатата година, а нејзината граница со Русија е долга повеќе од 1.300 километри, што ја прави оваа нордиска земја еден од најважните безбедносни столбови на Алијансата во северна Европа.
Стуб рече дека Финска останува посветена на заедничката безбедност во рамките на НАТО, но и дека нејзината политика не е насочена кон директна конфронтација со Москва.
Фото: принтскрин
Европа
Данските власти поставија воен радар на аеродромот во Копенхаген за откривање дронови

Откако неидентификувани дронови беа забележани над данските аеродроми и воени бази речиси секоја вечер минатата недела, данските власти презедоа низа мерки за да се осигурат дека претстојниот состанок на лидерите на Европската унија во Копенхаген ќе помине без безбедносни закани.
Откако минатата сабота, на 3 октомври, беше забранета целата активност на дронови над Данска, фрегатата на германската морнарица ФГС Хамбург се закотви во пристаништето во Копенхаген во неделата. Германскиот брод ќе придонесе за надзор на данскиот воздушен простор за време на самитот на Европската унија, објавија данските медиуми.
Најновата мерка на данските власти е инсталирање на современ радар за откривање и следење на дронови „Вајбел Ксента“ на аеродромот Каструп во Копенхаген.
Данската полиција и Генералштабот на вооружените сили не сакаа да дадат подетални информации за радарот што може да се види зад оградата кај Каструп. Познато е само дека станува збор за уред од данската компанија „Вајбел Саентифик“ што може да детектира сите летала на растојание до 30 километри.
фото: принтскрин