Свет
Иран поставува камери на улиците: Се „ловат“ и казнуваат жени кои не носат хиџаб

Во нов обид за сузбивање на зголемениот број жени кои не го почитуваат задолжителниот кодекс на облекување, иранските власти поставуваат камери на јавни места и патишта за да ги идентификуваат и казнуваат жените кои не носат хиџаб, соопшти денеска полицијата.
Откако ќе бидат идентификувани, тие ќе добијат „СМС пораки со предупредување за последиците“, соопшти полицијата. Целта на оваа мерка е да се „спречи отпорот против законот за хиџаб“, се вели во соопштението за печатот, како што објави новинската агенција Мизан и другите државни медиуми, додавајќи дека таквиот отпор ја оцрнува духовноста на земјата и шири несигурност.
Сè повеќе Иранки престануваат да носат хиџаб по смртта на 22-годишна Курдка која умре во притвор на моралната полиција минатиот септември. Махса Амини беше приведена поради наводно кршење на правилата за носење хиџаб.
Безбедносните сили насилно го задушија бунтот, но сè уште има жени без хиџаб во трговските центри, рестораните, продавниците и на улиците низ Иран, кои ризикуваат да бидат уапсени. На социјалните мрежи кружат видеа од жени кои даваат отпор на иранската морална полиција.
Во соопштението, полицијата ги повика сопствениците на бизниси „строго да го следат почитувањето на општествените норми преку нивните упорни инспекции“. Според исламскиот шеријатски закон, наметнат по револуцијата во 1979 година, жените во Иран мора да ја покриваат косата и да носат долга, широка облека за да ги покријат своите фигури. Во спротивно, им се заканува јавна опомена, парична казна или апсење.
Опишувајќи го хиџабот како „еден од цивилизациските основи на иранската нација“ и „еден од практичните принципи на Исламската република“, во соопштението на Министерството за внатрешни работи од 30 март се посочува дека нема да има отстапки по ова прашање.
Министерството ги повика граѓаните да се спротивстават на жените кои не носат хиџаб. Ваквите упатства порано ги охрабруваа тврдокорните да ги напаѓаат жените. Минатата недела беше објавено видео од маж како фрла јогурт врз две жени без хиџаб во самопослуга.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Tрамп ги исклучи телефоните и компјутерите од одлуката за царините

Администрацијата на американскиот претседател Доналд Трамп одлучи реципрочните царини, вклучително и тарифите од 125 отсто за увоз од Кина, да не важат за паметните телефони и компјутерите.
Царината на САД доцна во петокот објави дека оваа стока ќе биде ослободена од одлуката на Трамп за воведување царини од 10 отсто за увоз од повеќето земји и одлуката за воведување многу повисоки царини за кинеските производи, пренесе „Би-би-си“.
Американските технолошки компании беа загрижени дека цената на технолошките производи може вртоглаво да порасне, бидејќи повеќето од нив се произведени во Кина.
Електронските уреди и компоненти, вклучително и полупроводници, соларни ќелии и мемориски картички, исто така ќе бидат ослободени од тарифите.
Според претходните проценки, цената на „ајфонот“ и другите електронски стоки би можеле да пораснат и до три пати доколку трошоците за царина се префрлат на клиентите.
„Последниот потег на Трамп отстрани огромен црн облак што се надвисна над технолошкиот сектор и притисокот со кој се соочуваат големите американски технолошки компании“, изјави финансискиот аналитичар Ден Ајвс, пренесе агенцијата АП.
„Епл“ продаде повеќе од половина од паметните телефони во Америка минатата година, според „Каунтерпоинт рисрч“, кој го следи технолошкиот пазар.
Податоците покажуваат и дека 80 отсто од „ајфон“ телефоните на „Епл“, наменети за американскиот пазар, биле произведени во Кина, а останатите 20 отсто во Индија.
Заедно со другите големи компании кои произведуваат паметни телефони, како што е „Самсунг“, „Епл“ во изминатите години се обиде да најде други добавувачи за да не зависи од Кина.
Така, Индија и Виетнам станаа важни производствени центри.
„Епл“ во последните денови се обиде да го забрза и зголеми производството во Индија.
Трамп во средата ненадејно ја промени својата одлука, најавувајќи 90-дневна пауза за тарифите кои беа најмногу зголемени, но дека тоа нема да важи за Кина, за која ги зголеми царините на 145 отсто.
Зголемувањето доаѓа по одлуката на Кина да возврати со царини од 84 отсто за американските стоки.
Трамп рече дека сите земји што не возвратиле на американските царини ќе добијат одложување и ќе се соочат само со општи американски тарифи од 10 проценти до јули.
Белата куќа тогаш рече дека потегот е преговарачка тактика за постигнување подобри трговски услови.
Тарифите ќе бидат одговор на неправдата во светскиот трговски поредок и ќе донесат работни места и фабрики во Америка, рече Трамп.
Свет
Црвено светло за Украина од Мерц: Не може НАТО и ЕУ додека е во војна

Можноста Украина да влезе во Европската унија и НАТО може да се разгледа само по завршувањето на борбите, вели Фридрих Мерц, лидер на Христијанско-демократската унија (ЦДУ) во Германија.
„Украина е многу голема европска земја, но таа е европска земја која е во војна. Земја што е во воена состојба не може да стане членка на НАТО или на Европската унија“, истакна Мерц во интервју за весникот „Ханделсблат“.
Во исто време, ветувањето на Киев за членство во двете асоцијации останува на сила.
Во февруари, Унгарија стави вето на почетокот на првата фаза од преговорите за пристапување на Украина во Европската унија.
Подоцна, дипломати од Шведска, Финска, Данска, Латвија, Литванија и Естонија го повикаа Брисел да даде конкретни предлози за процесот на пристапување на земјата.
Регион
Ердоган: Зачувувањето на уставниот поредок на Босна и Херцеговина е важно за Турција

Турскиот претседател Реџеп Таип Ердоган за време на средбата со членовите на Претседателството на БиХ во Анталија изјави дека Анкара придава посебно значење на зачувувањето на стабилноста на Балканот, како и на заштитата на територијалниот интегритет, суверенитет и уставниот поредок на БиХ.
На маргините на Дипломатскиот форум во Анталија, Ердоган се сретна со претседавачот на Претседателството на БиХ, Жељка Цвијановиќ и членовите на Претседателството Денис Беќировиќ и Жељко Комшиќ.
Според соопштението од Кабинетот на Ердоган, на средбата се разговарало за билатералните односи меѓу Турција и Босна и Херцеговина, како и за регионални и глобални прашања.
Ердоган истакна дека Турција придава значење на зачувувањето на стабилноста на Балканот, како и заштитата на територијалниот интегритет, суверенитет и уставниот поредок на Босна и Херцеговина, пренесува Анадолија.
Тој повтори дека Турција се труди никогаш да не се повторат болните искуства од минатото во Босна и Херцеговина.
Посочи дека во оваа смисла Турција очекува актуелната политичка криза да се надмине со што помали штети и да се постигне општо прифатен договор во кој ќе учествуваат сите актери.
Нагласи и дека поддршката на Турција за Босна и Херцеговина ќе продолжи.