Свет
Ирскиот премиер за војната во Газа: Ќе се сеќаваме како на време на мрачен срам

Светот не направи доволно за да се постигне прекин на огнот во Газа, изјави ирскиот премиер Сајмон Харис. Тој повика на итна ревизија на Договорот за асоцијација меѓу Европската унија и Израел, велејќи дека се прекршуваат одредбите од трговскиот договор поврзани со човековите права.
Ирскиот премиер предупреди дека во иднина светот на конфликтот ќе гледа како на „време на мрачен срам“. Харис рече дека „секој ден“ се прашува дали ирската влада можела да направи повеќе.
„Сметам дека сцените што се одвиваат на Блискиот Исток се речиси незамисливи кога станува збор за размерите на катастрофата“, рече Харис во вторникот во Даблин.
„Јас ја нареков војна против децата, верувам дека е. Акциите на Израел се крајно непропорционални. Исто така, многу сум свесен за работи како трговијата што се одвива на ниво на Европската унија. Да бидам јасен, не верувам дека светот и Европската унија направија доволно за да се постигне примирје“, рече тој.
„Кога ќе погледнеме наназад на овој период, тоа ќе биде време на мрачен срам за светот, бидејќи има моменти кои можеа да се искористат на европско ниво, но досега не се искористени“, рече Харис, додавајќи дека Европската унија може да направи повеќе веднаш.
Тој рече дека тој и премиерите на Шпанија и Словенија бараат ревизија на Договорот за асоцијација меѓу Европската унија и Израел.
„Се надевам дека и другите колеги ќе ни се придружат доколку овие разговори не напредуваат во наредните часови и денови. Тоа е многу практична мерка што можеме да ја преземеме. Каква порака испраќаме до светот кога имаме одредби за човековите права во трговските договори кои немаат ефект, ги нема, за да биде документот подолг, мора да имаат значење“, посочи тој.
На прашањето дали трговскиот договор треба целосно да биде суспендиран, Харис одговори дека постапката е таква што прво треба да се разгледа. Сепак, тој додаде: „Малку е веројатно дека ќе го разгледате договорот и ќе откриете дека е во согласност со човековите права“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Ердоган: Турција ги поздравува напорите на САД за мир во регионот

Турција ги поздравува напорите на Соединетите Американски Држави за постигнување мир во регионот, но Израел мора да ги запре нападите за овие напори да бидат успешни, изјави денес турскиот претседател Реџеп Таип Ердоган во телефонски разговор со американскиот претседател Доналд Трамп, соопшти неговиот кабинет.
Во соопштението се наведува дека Трамп и Ердоган разговарале за билатералните односи, за време на повикот што го побарала американската страна, и се додава дека турскиот претседател ја нагласил важноста од преземање чекори за зајакнување на соработката меѓу двете земји, особено во одбранбената индустрија, пренесува Ројтерс. Ердоган, исто така, рекол дека нивната средба во Белата куќа минатиот месец ги зајакнала врските меѓу двете земји.
Во соопштението се наведува дека за време на разговорот за ситуацијата во Газа, Ердоган му рекол на Трамп дека Турција работи напорно за постигнување регионален мир и дека ги поздравува иницијативите насочени кон таа цел.
„Ердоган нагласи дека Турција ги зголемила своите дипломатски контакти заради мирот, дека ќе продолжи да ја поддржува визијата за глобален мир и дека запирањето на нападите од страна на Израел е важно за успехот на иницијативите насочени кон постигнување мир во регионот“, се вели во соопштението.
Турција, која ги нарече нападите на Израел врз Газа геноцид и ги суспендираше сите трговски односи со Израел, изрази поддршка за најновиот план на Трамп за ставање крај на војната во Газа.
Фото: принтскрин
Свет
Путин: Доста се шегувавме за дроновите, ветувам, нема повторно да ги испраќаме во Данска

Во Сочи, рускиот претседател Владимир Путин коментираше за сомнителните дронови што летаа над воздушниот простор на НАТО.
Кога презентерот на форумот во Сочи го праша дали ги испратил дроновите во Данска, Путин одговори:
„Добро, повеќе нема да го правам тоа. Нема да испраќам дронови во Данска, ниту во Франција, ниту во Лисабон“, рече рускиот лидер.
Тој ја спореди паниката предизвикана од дроновите во Европа со НЛО и рече дека „тоа е апсурдно“.
„Знаете, мислам дека доста се шегувавме за дронови. Ветувам, нема повторно да ги испраќаме во Данска, не сакаме да го уништиме вашиот прекрасен пејзаж, или…“ рече Путин.
Тој тврди дека дроновите биле испратени од Французите за да го одвлечат вниманието на јавноста од домашните политички проблеми.
„А НАТО го користи ова за ширење паника и создавање тензии, што само го зголемува ризикот од конфликт“, заклучи Путин.
Фото: принтскрин
Свет
Меркел со критики: Макрон не беше најдобриот избор

Поранешната германска канцеларка Ангела Меркел изјави дека за време на одбележувањето на 35-годишнината од повторното обединување на Германија, требало да биде поканет „некој од Источна Европа“ наместо францускиот претседател Емануел Макрон.
Како што објавија западните медиуми, Меркел нагласи дека немала забелешки на говорот на сегашниот канцелар Фридрих Мерц и претседателката на Бундесратот Анке Релингер на церемонијата. Сепак, таа додаде дека би претпочитала некој поблизок до искуството од Источна Германија или Источна Европа да биде избран за говорник.
„Колку и да го почитувам претседателот Макрон, можеби некој од Источна Европа или Источна Германија можеше да биде избран за гостин-говорник“, рече поранешната канцеларка.
Според медиумите, зад ваквите зборови стои и политичка порака – бидејќи Меркел беше во Будимпешта неколку дена пред прославата, каде што се сретна со унгарскиот премиер Виктор Орбан. Токму тој се споменува како лицето на кое Меркел се осврнала кога зборувала за „некој од Источна Европа“.
Фото: принтскрин