Свет
Истанбул погоден од 300 последователни потреси, сеизмолозите очекуваат уште еден силен земјотрес

Серија земјотреси го погодија Истанбул и денеска, а турската агенција за катастрофи АФАД извести за речиси 300 последователни потреси, од кои еден бил со јачина од 4,6 степени.
Од вчерашниот силен земјотрес, кој беше со јачина од 6,2 степени според Рихтеровата скала, АФАД забележа уште стотици земјотреси по должината на тектонските раседи во Мраморното Море.
Министерот за здравство Кемал Мемишоглу изјави дека 236 лица се повредени, од кои 173 во Истанбул. Петнаесет од нив морало да бидат хоспитализирани, а некои се повредени панично скокајќи од зградите.
Канцеларијата на гувернерот на Истанбул соопшти дека нема извештаи за урнати згради. Министерот за урбан развој Мурат Курум објави дека 12 згради се евакуирани како мерка на претпазливост.
Сеизмолозите и геолозите цитирани во турските медиуми, генерално, се согласуваат дека сè уште се очекува голем земјотрес. Иако не е познато кога би можело да се случи, експертите предвидуваат дека би можел да достигне магнитуда 7,4, а некои дури проценуваат и потенцијална магнитуда од 7,7.
Турција се наоѓа во еден од сеизмички најактивните региони во светот.
Локалните медиуми објавуваат дека жителите ја поминале ноќта во паркови и на отворени простори поставувајќи шатори наместо да се вратат во своите домови. АФАД ги повика луѓето да избегнуваат потенцијално небезбедни згради предупредувајќи дека последователните потреси би можеле да траат некое време.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Иранците обесија човек поради сомневање за шпионажа за Израел

Иран погуби шпион кој наводно му пренесувал информации на Израел, објави денес државната новинска агенција Мизан.
„Есмаил Фекри, агент на Мосад осуден за сериозни злосторства „корупција на Земјата“ и „мохаребе“ (војна против Бога), беше обесен по судењето“, објави Мизан на својата веб-страница, според агенцијата Франс Прес.
Властите во Техеран соопштија дека човекот, уапсен во 2023 година, е осуден според исламскиот закон за „водење војна против Бога“ и „корупција на Земјата“, пренесува и дпа.
Ова беше трета егзекуција поврзана со обвиненија за шпионажа во последните месеци.
Иран го смета Израел за свој заколнат непријател, а двете земји разменуваат воздушни напади откако Израел започна големи напади врз иранските нуклеарни цели минатиот петок.
Свет
Фон дер Лајен: Му кажав на Нетанјаху дека преговорите со Иран се најдобрата опција

Претседателката на Европската комисија, Урсула фон дер Лајен, изјави дека вчера во телефонски разговор му рекла на израелскиот премиер Бенјамин Нетанјаху дека дипломатијата е најдоброто долгорочно решение за конфликтот со Иран.
Но, фон дер Лајен не побара итен прекин на огнот, велејќи дека Иран дефинитивно не треба да има нуклеарно оружје.
„Секако, мислам дека преговорите се, на долг рок, најдоброто решение“, додаде таа.
Таа повтори дека Израел има право да се брани, но нагласи дека дипломатското решение е најдобрата опција на долг рок за решавање на нуклеарната програма на Иран.
„Иран е главен извор на регионална нестабилност и ние отсекогаш сме биле многу јасни – Иран никогаш не смее да има нуклеарно оружје“, рече фон дер Лајен.
„Неодамнешните настани покажаа растечка поврзаност помеѓу конфликтите во Европа од една страна и Блискиот Исток од друга страна. Истиот тип ирански беспилотни летала и балистички ракети погодуваат градови и во Украина и во Израел“, додаде таа.
Лидерите на Г7 се собраа во Канада на тридневен самит што се одржува во сенка на опасната воена ескалација меѓу Израел и Иран што би можела да ескалира во поширок регионален конфликт.
Покрај тензиите на Блискиот Исток, денес лидерите ќе разговараат и за војната во Украина, глобалните трговски спорови, миграцијата и обезбедувањето пристап до ретки минерали.
„Треба да извршиме поголем притисок врз Русија за да гарантира вистинско примирје, да ја донесеме Русија на преговарачка маса и да ја завршиме оваа војна, а санкциите се клучни за таа цел“, изјави фон дер Лајен на прес-конференција пред состанокот на Велика Британија, Канада, Франција, Германија, Италија, Јапонија и САД.
„Минатата недела изнесовме предлог за пакет од 18 санкции. Ќе ги повикам сите партнери на Г7 да ни се придружат во овој напор“, рече фон дер Лајен.
Свет
Кина им се обрати на Иран и Израел, бара итна реакција

Кина ги повика Иран и Израел да преземат „итни“ чекори за намалување на тензиите, пренесува АФП.
„Ги повикуваме сите страни да преземат итни мерки за смирување на ситуацијата, да спречат понатамошна дестабилизација на регионот и да создадат услови за враќање кон решавање на проблемите преку дијалог и преговори“, изјави портпаролот на кинеското Министерство за надворешни работи, Гуо Џиакун.