Најновото истражување на ПИСА покажа дека најсреќните деца живеат во Финска, Германија и Шведска. Тие најмалку учат, а постигнуваат најдобри резултати, изјави аналитичарот Алфонсо Ецезара на конференцијата „Нови технологии во образованието“, која што во Белград ја организира Британскиот совет.

Според податоците на ПИСА, децата од овие земји околу 35 часа неделно поминуваат во учење, што им остава доволно простор за воншколски активности кои влијаат на развојот на детето. На тој начин не им се создава аверзија кон училиштето, учењето и обврските, вели Ецезара.

Истражувањата покажуваат дека резултатите на тестирањата на ПИСА кои ги постигнале учесниците во Србија не зависат од висината на платата во семејството на детето, а слична е ситуацијата во сите земји од регионот.  Истражувањето покажува дека децата кои доаѓаат од сиромашни делови на светот, традиционално се наоѓаат на врвот по своите успеси во школството. Кон тоа придонесува разликата меѓу државните и приватните училишта – во корист на првите. Па така, најуспешни се државните училишта во Турција, Јапонија и Италија, додека приватните училишта во овие земји се наоѓаат далеку под нив.

Податоците покажуваат дека девојчињата се подобри во тимска работа, додека момчињата се покажале подобри во математиката. Според експертите повеќе од четири часа дневно на интернет се смета за зависност. Најдобрите ученици, според истражувањето на ПИСА, користат интернет само час и половина во текот на денот.