Европа
Италијанската премиерка најави повлекување на Италија од кинеската иницијатива
Премиерката на Италија, Џорџа Мелони за време на средбата со кинескиот премиер Ли Чианг на самитот на земјите од групата Г20, укажа на планот на Рим да се повлече од кинеската иницијатива „Појас и пат“ (БРИ), пренесоа италијанските медиуми.
Италија сака да ја намали негативната реакција на Пекинг и ќе настојува да го обнови договорот за стратешко партнерство со Кина, кој првично го потпиша во 2004 година, а чија цел е да ја поттикне економската соработка.
Италија е единствената земја-членка на Г7 што го потпиша БРИ, глобален трговски и инфраструктурен план заснован на древниот пат на свилата што ја поврзуваше Кинеската империја со Западот.
„Премиерката (Мелони) му ја пренесе на својот колега нејзината намера да се откаже од проектот“, објави весникот „Кориере дела сера“, велејќи дека премиерот Ли се обидел да ја убеди Мелони да ја преиспита одлуката.
Италијанските политичари ја доведуваат во прашање вредноста на договорот БРИ, потпишан од претходната влада во 2019 година, кој беше извор на несогласување со западните сојузници поради загриженоста за проширување на кинеското влијание. Италијанците им рекле на Кинезите дека нивната одлука не е наметната од САД, додава весникот, што е во склад со слични извештаи од други италијански весници.
Италија ќе претседава со групата Г7 следната година. Мелони и Ли разговараа за продлабочување на односите на самитот на Г-20 во Њу Делхи во саботата, се вели во соопштението од канцеларијата на Мелони.
„Италија и Кина споделуваат Глобално стратешко партнерство чија 20-годишнина ќе се одбележи следната година и што ќе биде знак за подобрување на пријателството и соработката во секоја област од заеднички интерес“, се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Премиерот на Украина: Помошта што веќе ја обезбедија САД нема да биде дел од договорот за минерали

Украина постигна договор дека претходната американска помош дадена на Киев нема да биде дел од договорот за минерали што има намера да го потпише со Вашингтон, изјави вчера украинскиот премиер Денис Шмихал.
„Постигнат е договор документот да не ја земе предвид помошта што беше дадена пред неговото потпишување“, рече Шмихал во објава на Телеграм.
Шмихал, кој минатата недела беше во САД за пролетните состаноци на Меѓународниот монетарен фонд и Светската банка, изјави дека е постигнат добар напредок во договорот по состанокот со американскиот секретар за финансии Скот Бесент.
„Најважно е што јасно ги дефиниравме нашите црвени линии, договорот мора да биде во согласност со европските обврски и не смее да биде во спротивност со Уставот и законодавството на Украина“, рече тој и додаде дека правни тимови работат на документот.
Американскиот советник за национална безбедност, Мајк Валц, вчера изјави дека ќе биде постигнат договор. Двете страни потпишаа меморандум на 18 април како прв чекор кон постигнување договор за развој на минералните ресурси во Украина, договор промовиран од американскиот претседател Доналд Трамп.
Иако двете страни беа подготвени да потпишат договор за соработка во областа на природните ресурси во февруари, тој беше одложен по судирот во Овалната соба меѓу Трамп и украинскиот лидер Володимир Зеленски.
Европа
Ковчегот на папата Франциско затворен, погребот в сабота наутро

Од средата наутро, кога телото на покојниот папа Франциско беше пренесено во базиликата „Свети Петар“, низ неа поминаа 150.000 луѓе од целиот свет. Ковчегот на папата беше затворен вечерва, а погребот ќе се одржи в сабота наутро.
Пред церемонијата на запечатување, во ковчегот на папата беа поставени 12 монети, по една за секоја година од неговиот понтификат, како и краток запис и извештај за неговото папство. Церемонијата ја водеше кардиналот Кевин Фарел, камерлегно на Светата Римска црква.
Реки верници доаѓаат во Рим за да присуствуваат на утрешниот погреб на папата Франциско, а се очекува и пристигнување на бројни делегации од целиот свет.
Во Рим се воведени строги безбедносни мерки, со илјадници волонтери и полицајци, систем против дронови, снајперисти на покривите и борбени авиони подготвени за полетување.
Европа
Жена во Шпанија ја продала новородената ќерка за 2.000 евра на двојка која не можела да има деца

Шпанската полиција уапси 37-годишна жена која ја продала својата новородена ќерка на пар кој се лекува од неплодност, јавува АФП.
Полицијата соопшти дека жената била уапсена минатиот месец во Мостолес, јужно предградие на Мадрид. Брачен пар осомничен за купување дете и двајца нивни роднини беа уапсени во јужниот град Кордоба.
Според прелиминарната истрага, жената се согласила да им ја предаде својата новородена ќерка на двојката за 2.000 евра. Сепак, по породувањето, таа се предомислила и побарала да ѝ го вратат детето.
Двојката, според АФП, одбила да го врати бебето освен ако жената не им го врати платениот износ, плус дополнителни 1.000 евра за покривање на трошоците што тврделе дека ги направиле во текот на месецот што го поминале со неа во Кордоба пред да се роди детето.
Полицијата започна истрага откако една жена поднесе жалба тврдејќи дека семејство во Кордоба го „киднапирало“ нејзиното новородено бебе. Детето е предадено во центар за заштита на деца во Кордоба. Полицијата, исто така, објави дека властите ѝ одзеле уште шест деца на жената во 2022 година поради занемарување.