Свет
Италијанскa новинарка уапсена во Иран, непознати се точните обвиненија

Иран го потврди апсењето на италијанската новинарка Сесилија Сала, објави државната новинска агенција ИРНА, повикувајќи се на иранското Министерство за култура, пренесува Си-Ен-Ен. Италијанското Министерство за надворешни работи минатиот петок соопшти дека Сала е уапсена во Техеран.
ИРНА во понеделникот објави дека Сала била приведена на 19. декември поради кршење на законите на Исламската Република Иран.
„Нејзиниот случај во моментов е под истрага. Апсењето е извршено во согласност со релевантните прописи, а италијанската амбасада во Техеран е информирана“, се вели во соопштението на ИРНА.
Новинарката во затворот ја посетила италијанската амбасадорка Паола Амадеи за да ги провери условите и околностите на нејзиниот притвор, се наведува во соопштението и се додава дека Сала претходно имала право на два телефонски јавувања со членовите на семејството.
„Се уште не знаеме за што е обвинета“, изјави завчера пред новинарите италијанскиот министер за надворешни работи Антонио Тајани.
Министерот исто така додаде дека на Сала не и било дозволено да ја посети адвокат во затворот до пред два дена.
Сала е новинарка на италијанскиот дневен весник „Ил Фољо“, кој пишува дека е задржана во затворот Евин во Техеран. Сесилија била во Иран со редовна виза за да известува за земјата што ја познава и сака, истакнувајќи ги проблемите како што се сузбивањето на слободата на говорот и заканите за новинарите.
„Новинарството не е криминал. Да ја вратиме Сесилија Сала дома“, напиша главниот уредник на „Ил Фољо“, Клаудио Цераса.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Инциденти по протестот во Белград: Петпати фрлија солзавец, но луѓето бришат солзи и не се откажуваат, летаат јајца и шишиња по полицијата

Голема толпа народ не се повлекува од улиците на Белград иако студентскиот протест, преку кој испратија порака за предвремени парламентарни избори, заврши. Полициски кордони има насекаде и се обидуваат да ја потиснат масата луѓе. Граѓаните на многу места фрлаат со шишиња, лименки, камења и јајца по полицијата, се жалат дека се чувствува солзавец во воздухот, но велат дека нема да се откажат.
„Бевме пред кордонот полиција, во првиот ред. Петпати фрлија солзавец, но луѓето бришат солзи и не се откажуваат. Доста е страв, нема понатаму. Ова е нивен крај, не наш. Остануваме до крај“, вели за српската телевизија „Н1“ студентка која на протестот е со мајка си и не сака да си замине.
„Спуштете ги штитовите“ извикуваат граѓаните и не сакат да отстапат. Ставаат маски на лицата и пренесуваат повик „да не се откажуваме, се додека сме мирни, ништо не можат“.
Студентскиот протест на кој беа пренесени пораките за предвремени избори заврши мирно, а инцидентите почнаа во моментот кога студентите ги соблекоа елеците.
Регион
(Видео) Студентите на протестот во Белград ќе развеат знаме „какво што не се очекува“

Студентскиот протест во Белград почна со огромен број луѓе кои се уште се слеваат кон плоштадот Славија. Студентите за вечерва најавија дека ќе развеат знаме „какво што досега не е видено“. Откога почна протестот тие на социјалните мрежи објавија кусо видео од последните подготовки за изнесување големо знаме на улица со најава дека „тоа ќе биде знаме кое не сте го очекувале“.
Biće to zastava koju niste ocekivali pic.twitter.com/qeFNGlGmHD
— Žaklina Tatalović (@zaklina_prva) June 28, 2025
Протестот е предвидено да заврши во 21 часот кога истекува рокот кој студентите го дадоа на власта за распуштање на Народното собрание распишување предвремени парламентарни избори како и растурање на протестот во Пионерскиот парк каде некои студенти на контрапротест три месеци кампуваат и бараат продолжување на универзитетската година. За се што ќе се случува по 21 часот, студентите кажаа дека не се надлежни, а претседателот на Србија, Александар Вучиќ, попладнево рече дека очекува насилство, токму во периодот од 21 до 22 часот.
Регион
Плоштадот Славија во Белград се преполни, реки луѓе доаѓаат од сите страни на видовденски протест

Под слоганот „Се гледаме на „Видовден“ попладнево плоштадот Славија во Белград, Србија се преполни луѓе. Српските медиуми јавуваат дека реки народ се уште доаѓаат кон плоштадот од сите страни на државата.
Студентите, поддржани од огромен број граѓани имаат две барања од властите. Првото барање е распуштање на Народното собрание и распишување предвремени парламентарни избори до 21 часот денес, а второто барање е да прекине протестот на некои од студентите кои бараат продолжување на универзитетската година и три месеци кампуваат во Пионерскиот парк во центарот на Белград.
Студентите кои го организираат протестот најавија дека тој ќе трае три часа, треба да заврши во 21 часот и се огласија за ненадлежни за се што ќе се случува по 21 часот.
Претседателот на Србија, Александар Вучиќ, денес изјави дека очекува насилство на протестот кое ќе почне меѓу 21 и 22 часот.