Свет
Италија ги отвори училиштата – премиерот призна дека ќе има проблеми

Пo шест месеци рестриктивни мерки, најдолгите во Европа, Италија денеска ги отвори повеќето училишта тестирајќи ги владините организациски вештини, трпеливоста на наставниците и самоконтролата на возбудените ученици.
Училиштата во 13 од 20 италијански региони претпазливо ќе ја продолжат наставата во училниците повикувајќи 5,6 милиони ученици на училиште. Другите седум региони одлучија да го одложат почетокот на учебната година за една недела.
„Меѓу нас наставниците и меѓу учениците постои големо чувство на возбуда. Среќни сме што се гледаме повторно, но исто така е предизвик да не се доближуваме едни до други“, рече Патризија Зукета, наставничка во основно училиште во Рим.
Владата ги затвори училиштата на почетокот на март за да го запре ширењето на коронавирусот. Обидите да се направат училниците побезбедни беа исполнети со контроверзии.
„Ќе има проблеми на почетокот“, призна вчера италијанскиот премиер Џузепе Конте за почетокот на учебната година.
Голем дел од 2,4 милиона единечни клупи, за кои се претпоставува дека ќе гарантираат физичка оддалеченост, не стигна навреме, предупредуваат синдикатите, а илјадници работни места за наставници сè уште не се пополнети. Постарите вработени, пак, од друга страна, се загрижени поради ризикот од инфекција.
Организацијата за економска соработка и развој (ОЕЦД) објави дека 59 проценти од италијанските наставници и професори се над 50 години, што е највисоко во западниот свет.
Во Италија досега починале 35,5 илјади луѓе од Ковид-19, најмногу во Европската Унија, а бројот на нови случаи расте во последните неколку недели.
„Ние ги следиме безбедносните протоколи, но постои страв, пред сè, неизвесност за тоа како ќе изгледа оваа година. Многу наставници се загрижени“, рече Алесандро Капата, заменик-директор на средното училиште „Авогадро“ во Рим.
Родителите исто така се загрижени. Училиштата велат дека децата со најмали симптоми на настинка или грип мора да останат дома. Учениците постари од шест години мора да носат маски надвор од училницата и да избегнуваат физички контакт.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
40 ранети во Израел, двајца критично

Вкупно 40 лица побарале медицинска помош по вечерашниот ирански ракетен напад врз Израел, соопштија локалните здравствени служби. Двајца од повредените се во критична состојба.
Најголем број пациенти се лекуваат во болницата Ичилов во Тел Авив – 18 лица.
Според лекарите, пријавените повреди вклучуваат рани од шрапнели, вдишување чад и состојба на шок.
Свет
Израелската војска: Иран истрела помалку од 100 балистички ракети, повеќето ги пресретнавме

Портпаролката на израелската војска, Ефи Дефрин, рече дека помалку од 100 балистички проектили биле истрелани од Иран кон Израел.
Дефрин рече дека „повеќето од ракетите биле пресретнати од воздушната одбрана или паднале пред да стигнат до израелска територија“.
„Регистрирани се ограничен број погодоци на згради, а дел од штетата е предизвикана од фрагменти од пресретнати проектили“, додаде тој.
Според израелските медицински служби, во нападот биле ранети 40 лица.
Свет
Нетанјаху: Ова е можност за иранскиот народ да се спротивстави на режимот

Израелскиот премиер Бенјамин Нетанјаху вечерва и порача на јавноста дека можат да ги напуштат засолништата, откако новиот бран ирански ракети прелета над израелска територија.
„Иранскиот режим никогаш не бил послаб. Ова е можност за иранскиот народ да се спротивстави на режимот“, рече Нетанјаху во вечерашното обраќање.
Тој директно им се обрати и на граѓаните на Иран: „Јас сум со вас, израелскиот народ е со вас“, рече тој.
Министерот за одбрана на Израел, Израел Кац изјави дека Иран „ја преминал црвената линија со лансирање ракети кон израелските цивилни области“ и најави: „Техеран ќе плати висока цена“.
Оваа иранска одмазда следеше по израелските воздушни напади на иранска територија, при што беа погодени нуклеарни постројки и беа убиени високи команданти и научници.