Свет
Италија не и’ дозволува на Украина да го користи нивното оружје на руска територија

Италијанскиот министер за надворешни работи Антонио Тајани изјави дека Украина нема дозвола од Италија да користи оружје доставено од таа земја за цели на територијата на Руската Федерација, туку може да го користи само „за да го одбие рускиот напредок и да ја гарантира слободата на земјата“.
Тајани рече дека Италија отфрла војна и дека не може да обезбеди оружје за напад на Русија на територијата на таа земја, пренесува римскиот весник „Фато Котидијано“.
„Италијанското оружје може да се користи само на територијата на Украина за да се одбие рускиот напредок и да се гарантира слободата на земјата. Едно е да се користи ова оружје на окупираната територија, едно е да се брани Украина, друго е да се каже дека сме во војна со Русија“, рече тој.
Министерот за одбрана Гидо Крозето изјави дека италијанскиот устав ѝ забранува на Италија да и дозволи на Украина да таргетира руска територија.
„Примената на членот 11 од нашиот Устав наметнува предупредувања за употребата на оружјето што и го даваме на Украина: тоа нужно мора да се користи за одбрана на Украина, што значи напади врз Русите во Украина, но тие не можат да се користат на територијата на друга земја. Тоа е мое мислење, кое го делат и премиерот и министерот Тајани“, рече Крозето.
Претходно, западните медиуми, повикувајќи се на американски официјални претставници, објавија дека администрацијата на американскиот претседател Џо Бајден и дала дозвола на Украина да користи американско оружје за цели во Русија, но само во близина на областа Харков.
Германија денеска објави и дека ќе и дозволи на Украина да користи германско оружје за да напаѓа цели во границите на Русија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
ЕУ тврди дека „Тему“ не ја спречува продажбата на нелегални производи

Европската комисија соопшти дека популарната кинеска онлајн платформа „Тему“ ги крши прописите на Европската унија, бидејќи не презема доволно мерки за да ја спречи продажбата на нелегални и небезбедни производи на своите корисници. Доколку овие обвинувања се потврдат, „Тему“ би можел да се соочи со висока парична казна која може да достигне до 6 проценти од вкупниот нивен годишен глобален приход.
„Постојат големи ризици потрошувачите во ЕУ да наидат на нелегални производи преку платформата“, стои во официјалното соопштение, пренесува „Ројтерс“. Наводно, било откриено дека купувачите на „Тему“ лесно можат да дојдат до производи што не ги исполнуваат стандардите – особено детски играчки и мали електронски уреди кои може да бидат опасни.
Според Комисијата, „Тему“ има слаба внатрешна проценка на ризик, бидејќи се потпира на општи индустриски податоци наместо да анализира конкретни закани поврзани со сопствената платформа. Ако овие прелиминарни наоди се потврдат, „Тему“ ќе се смета за прекршител на Законот за дигитални услуги – клучниот пакет правила на ЕУ за онлајн платформи.
Таквата одлука, покрај паричната казна, може да вклучува и задолжителни мерки кои „Тему“ ќе мора да ги преземе за да ги реши проблемите.
Од „Тему“ велат дека во целост ќе соработуваат со Комисијата, и дека ќе одговорат на официјалните наоди во наредните недели, но не прецизираа точен рок.
Наодите за небезбедни производи се само еден дел од пошироката истрага против „Тему“. Платформата е исто така под сомнение дека ги прекршува правилата на ЕУ во однос на користење дизајн што поттикнува зависност од купување, нетранспарентни системи за препорака на производи, како и ограничување на пристапот до податоци за независни истражувачи.
Свет
Трамп го скрати рокот: Му давам на Путин уште 10 до 12 дена

Американскиот претседател Доналд Трамп изјави дека го скратува претходниот рок од 50 дена што му го дал на рускиот претседател Владимир Путин за постигнување мировен договор со Украина – на само 10 до 12 дена.
„Да, ќе поставам нов рок од околу 10 или 12 дена од денес“, рече Трамп пред новинарите додека говореше заедно со британскиот премиер Кир Стармер во неговото голф-одморалиште во Тернбери, Шкотска.
„Нема причина да чекаме“, додаде претседателот. „Сакам да бидам дарежлив, но едноставно не гледаме никаков напредок.“
Трамп повторно му се закани на Путин со воведување на секундарни царини, велејќи: „Ќе бидат тоа санкции, можеби и царини, секундарни царини.“ Тој додаде дека не сака да ѝ наштети на Русија, но очекува некаков потег. „Со здрав разум би рекле дека некој би сакал да постигне договор“, изјави Трамп мислејќи на рускиот претседател. „Ќе видиме.“
Претходно во понеделникот, Трамп изјави дека ја скратува временската рамка бидејќи „мисли дека веќе го знае одговорот“.
„Мислевме дека неколкупати сме блиску до решение, а потоа претседателот Путин повторно започнува со ракетирање некој град како Киев и убива многу луѓе, во старечки дом или нешто слично“, рече тој.
На 14 јули, за време на средбата во Овалната соба со генералниот секретар на НАТО, Марк Руте, Трамп вети воведување строги царини на трговските партнери на Русија доколку Путин не постигне договор со Украина во рок од 50 дена.
Трамп најави дека ќе воведе 100% секундарни царини, што значи дека секоја земја што ќе продолжи да тргува со Русија ќе мора да плаќа високи давачки за да може да продава производи на американскиот пазар.
Иако Русија веќе се соочува со широки санкции од Западот, сè уште активно тргува со земји како Индија и Кина.
Свет
Трамп: Ќе воспоставиме центри за храна во Газа

Американскиот претседател Доналд Трамп денес изјави дека во Газа владее вистинскa глад и дека САД ќе воспостават центри за храна во регионот.
„Ќе воспоставиме центри со храна, без огради, за да се олесни пристапот“, изјави Трамп пред новинарите по средбата со британскиот премиер Кир Стармер во Тернбери, каде што Трамп поседува имот со голф игралиште.
Тој додаде дека САД ќе соработуваат со други земји за да испратат повеќе хуманитарна помош за народот во Газа. Според Трамп, САД досега потрошиле 60 милиони долари за хуманитарна помош за Газа.
Стармер ја нарече хуманитарната ситуација во Газа „апсолутно неподнослива“ и порача дека помошта мора итно да се достави.
„Мора да ги поттикнеме другите земји да помогнат во испораката на помошта и да, тоа вклучува и вршење притисок врз Израел, бидејќи станува збор за хуманитарна катастрофа“, рече британскиот премиер.
Трамп исто така изјави дека во последно време е многу тешко да се преговара со палестинскиот Хамас, но дека со израелскиот премиер Бенјамин Нетанјаху разговара за „разни планови“ за ослободување на израелските заложници, кои се во заробеништво повеќе од 20 месеци.
Тој нагласи дека ослободувањето на заложниците што Хамас ги држи во Газа е од клучна важност, посочувајќи дека милитантната група го променила ставот и одбива да ги ослободи. Хамас сè уште држи 54 заложници, од кои, според проценките, повеќето се веќе мртви. Меѓу нив има и двајца американски државјани.