Свет
Италија постави услов за воена помош за Киев: „Мораме да бидеме реални“
Италијанскиот министер за одбрана, Гидо Крозето, повика на поголеми дипломатски напори за ставање крај на војната меѓу Русија и Украина и покрај предупредувањата од Киев дека Москва нема намера да го прави тоа.
Крозето на вчерашното парламентарно сослушување рече дека Италија ќе бара стратегија во два правци за воена поддршка на Киев, која ќе биде поврзана со договор со преговори. Во превод, Италија би можела да ја условува воената помош со почеток на преговорите меѓу Русија и Украина.
„Мораме да бидеме реални и не можеме да ја игнорираме воената ситуација на теренот“, рече Крозето.
„Се чини дека дојде време за ефективни дипломатски дејства“, додаде тој.
Италија долго време се сметаше за мост меѓу Русија и Западна Европа, со оглед на силните односи на италијанската комунистичка партија со Советскиот Сојуз за време на Студената војна, пишува „Фајненшл тајмс“.
Кога Москва ја почна својата инвазија на Украина во 2022 година, многумина стравуваа дека Рим може да се покаже како слаба алка, особено по неочекуваниот пад на владата на поранешниот премиер Марио Драги. Но, Џорџија Мелони, десничарската премиерка што го наследи Драги, остро ја осуди руската агресија и го поддржа Володимир Зеленски, претседателот на Украина.
Крозето инсистира на тоа дека неговиот повик за дипломатија не го одразува слабеењето на поддршката на Рим за Киев или неговата решеност да постигне праведен мир и предупреди дека напуштањето на Украина ќе има големи последици за европската безбедност.
Сепак, тој изрази загриженост за „реалната способност на Украина да им се спротивстави на руските сили“. „За жал, летната контраофанзива на Украина не ги даде посакуваните резултати“, рече тој предупредувајќи дека 2024 година ќе биде критична година за иднината на Украина.
„Имаме два пата: оној на помагање без ‘ако и но’ и оној на обидот да изградиме дипломатски пат што нè носи до крајот на конфликтот“, рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Рјабков: Русија нема доверба во НАТО
Геополитичките проекти со НАТО сега се невозможни, Москва нема доверба во Алијансата и кај нас предизвикува политичка и емотивна одбивност, изјави денеска рускиот заменик министер за надворешни работи Сергеј Рјабков.
„Геополитички дизајн од секаков вид со НАТО е невозможен. НАТО не е пандан способен за преговори, тоа е групација во која не само што немаме ни најмала доверба, туку ни предизвикува политички и, дури би рекол, емотивна одбивност“, рече Рјабков во интервју за ТАСС.
Тој посочи дека Русија ќе работи со оние „кои се подготвени да преговараат на еднаква основа“.
„Големиот евроазиски простор, концептите на евроазиската безбедност, се она што доаѓа во центарот на вниманието на архитектонските проекти во однос на политиката и геополитиката. Според нас, тоа е она на што пред се треба да се фокусираме“, посочи Рјабков.
Свет
Ирански командант: Три европски земји ќе одговараат за помошта кон Израел
Командантот на силите Кудс, Есмаил Кани изјави дека трите европски земји кои ги распоредија своите воени авиони за да го одбранат Израел од одмаздничката операција организирана од Иран ќе одговараат.
– Франција, Германија и Велика Британија не треба да мислат дека распоредувањето на авионите таа ноќ е крај на проблемот. Да, таа ноќ заврши, но ќе одговорат во догледно време – изјави бригадниот генерал Есмаил Кани.
Според него, Соединетите Американски Држави и целата западна воена алијанса на НАТО придонеле со сите свои воени капацитети за одбрана на Израел од иранската операција „Вистинско ветување“, пренесува иранската агенција „Тасним“.
– Седум или осум поморски групи се распоредени во Црното Море за да се спречи (иранската) операција – рече тој, додавајќи дека во таа операција се вклучени и повеќе од 200 авиони.
Кани оцени дека Иран ја покажа својата сила, непоколебливост и моќ на целиот свет при нападот на територијата на Израел.
– Победата на операцијата „Вистинско ветување“ не е ограничена само на бројот на ракети и беспилотни летала кои стигнаа до окупираните територии – рече Кани и ги повика земјите од регионот да учат од, како што наведе, „неспособноста на САД да го заштитат израелскиот режим за време на иранската операција“ и да не се потпираат на Вашингтон.
На 13 април Техеран истрела повеќе од 300 беспилотни летала и проектили кон Израел, како одговор на нападот врз иранскиот конзулат во сирискиот главен град Дамаск на 1 април, кога беа убиени седум членови на Иранската револуционерна гарда.
Иран тврди дека нападот „Вистинско ветување“ предизвикал голема штета на израелските воени бази.
Регион
Изгласана новата влада на Хрватска: Пленковиќ по трет пат стана премиер
Пратениците во хрватскиот Сабор вечерва гласаа за доверба на новата влада на премиерот Андреј Пленковиќ. За доверба на Владата гласаа 79 пратеници, против беа 61 пратеник, а еден беше воздржан.
Претседателот и членовите на Владата потоа дадоа заклетва пред пратениците, со што Андреј Пленковиќ го започна третиот последователен мандат како премиер.
Во Собранието денеска беше претставена четиригодишната програма на новата Влада, која се заснова на „успешна, витална, праведна, одржлива и суверена Хрватска“.
Во новиот мандат, владата на Пленковиќ најавува просечна нето плата од 1.600 евра, минимална бруто плата од 1.250 евра, како и отворање на 125.000 нови работни места.
До крајот на мандатот на новата влада, пензиите треба да се зголемат за најмалку 30 отсто, со што просечната пензија би изнесувала најмалку 750 евра.
Новата влада наместо досегашните 16 ќе има 18 министерства и седум потпретседатели.