Свет
И по 10 години не се знае судбината на летот MH370, се бара нова истрага

Малезија бара нова потрага по исчезнатиот лет MH370 на Малезија ерлајнс, објави денеска нејзиниот министер за транспорт, во пресрет на десетгодишнината од сè уште нерешеното исчезнување на тој авион.
Летот MH370, Боинг 777 со 227 патници и дванаесет членови на екипажот, исчезна од радарот за време на летот од Куала Лумпур до Пекинг на 8 март 2014 година.
Малезиските истражители првично не ја исклучија можноста авионот намерно да скршнал од курсот. Неговите останки се појавија на бреговите на Африка и на островите на Индискиот Океан, некои потврдени, а за некои се претпоставува.
Малезискиот министер за транспорт, Ентони Лок, рече дека американската компанија за истражување Ocean Infinity била поканета да разговара за нејзиниот последен предлог, по двата неуспешни претходни.
„Малезиската влада е посветена на потрагата и таа мора да продолжи“, рече Лок на церемонијата по повод трагедијата во неделата.
Куала Лумпур веќе го ангажираше Ocean Infinity во 2018 година за пребарување на јужниот дел на Индискиот Океан, нудејќи и на американската компанија 70 милиони долари доколку го најде авионот. Малезија, Кина и Австралија претходно ја прекинаа двегодишната потрага од 130 милиони долари во јануари 2017 година.
Лок најави дека Малезија ќе разговара за соработка со Австралија за продолжување на потрагата откако предлогот на американската компанија ќе добие зелено светло од малезиската влада. На летот имало повеќе од 150 кинески патници, а нивните роднини бараат отштета од Малезија ерлајнс, Боинг, производителот на неговиот мотор Ролс Ројс и осигурителната компанија Алијанц.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелски војници забележани во градот Газа

Палестински очевидци тврдат дека во градот Газа забележани се израелски војници.
Според нив израелските војници биле забележани во населбата Сабра, во близина на зграда во која порано се наоѓало училиште.
Израелските војници наводно се заблежани во градот Газа откако израелскиот премиер Бенјамин Нетанјаху одобри план за преземање на градот, во кој живеат околу еден милион луѓе.
Израелската армија не ги коментираше палестинските наводи, истакнувајќи оти не ги открива позициите на своите војници.
Претходно Израел соопшти дека планира да евакуира околу еден милион жители од градот пред офанзивата, која се очекува да почне најрано во септември.
Свет
Зеленски вели дека постои вистинска можност да заврши војната во Украина

Претседателот на Украина, Володимир Зеленски синоќа најави дека следните денови ќе бидат готови безбедносните гаранции за неговата земја.
Тој, по телефонскиот разговор со премиерот на Холандија, Дик Шуф, на платформата Икс објави дека „во моментот тимови на Украина, САД и европските партнери работат на решение“.
Според Зеленски постои „вистинска можност да се заврши оваа војна“, додавајќи дека Украина е „подготвена за конструктивни чекори што можат да доведат до вистинскиот мир“.
– Русија од своја страна не покажува намера за мир и продолжува да ги гранатира нашите градови. Сите сигнали што доаѓаат од Москва овие денови ги толкуваме на ист начин. Ни треба притисок за промена на нивниот став, како и состанок на највисоко ниво за да се разговара за сите прашања, посочи Зеленски.
Свет
Северна Кореја тестираше нови ракети

Северна Кореја вчера истрела два нови противвоздушни проектили за уништување на различни воздушни цели, меѓу кои дронови и крстосувачки ракети. Тестирањето на новото оружје го надгледуваше севернокорејскиот лидер Ким Џонг-ун.
Како што јави Корејската централна новинска агенција (КЦНА) новото оружје има „супериорна борбена способност“ и користи „единствена технологија“.
Тестирањето на ново оружје се одвива во време на зголемени тензии со Јужна Кореја. Официјален Сеул вчера соопшти дека на 19 август јужнокорејски војници отвориле предупредувачки оган кон припадници на севернокорејската армија, кои накратко навлегле во Демилитаризираната зона.
Исто така во регионот се одржува заедничка воена вежба помеѓу Јужна Кореја и САД, а за утре е предвидена средба на американскиот претседател Доналд Трамп со новоизбраниот јужнокорејски претседател Ли Џае-мунг.