Европа
Кадиров жив го закопал својот лекар, мислел дека го труе, пишува „Билд“

Чеченскиот лидер Рамзан Кадиров наводно жив го закопал вицепремиерот на својата земја, објави рускиот канал на „Телеграм“, ВЧК-ОГПУ, повикувајќи се на извори запознаени со случајот.
Елкан Сулејманов наводно му бил личен лекар на Кадиров кого лидерот на Чеченија го обвини за влошување на здравствената состојба, пишува германски „Билд“.
„Билд“ потсетува дека имало многу шпекулации за здравјето на Рамзан Кадиров, особено од почетокот на војната во Украина.
Кадиров, кој му е верен сојузник на рускиот претседател Владимир Путин, наводно верувал дека бил отруен. Каналот на „Телеграм“, ВЧК-ОГПУ, пишува дека неговите следбеници го убедиле во тоа.
Неговиот личен лекар Сулејманов, кој беше и вицепремиер на Чеченија, наводно му давал одредени инјекции, а Кадиров верувал дека поради нив му се слошило.
Како резултат на тоа, Сулејманов беше разрешен преку ноќ во октомври 2022 година како вицепремиер. Официјалната изјава тогаш беше дека тој доброволно поднел оставка. Се шпекулира дека оттогаш не е виден, а каналот на „Телеграм“ наведува дека бил брутално убиен.
За мистериозното исчезнување на Сулејманов, на „Твитер“ напиша и украинскиот функционер Антон Герашченко.
Тој потсетува дека руските медиуми објавија дека Кадиров, загрижен поради наглото влошување на здравствената состојба, го обвини својот личен лекар Сулејманов дека се обидел да го отруе. Тој додава дека лекарот исчезнал без трага во октомври 2022 година, отстранет од сите позиции, брутално убиен, жив закопан.
Засега нема официјална потврда дека Сулејманов е мртов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Мелони застана во одбрана на Ле Пен: „Им се одземаат правата на милиони граѓани“

Италијанската премиерка Џорџа Мелони денеска ја критикува одлуката на францускиот суд со која ѝ се забранува на лидерката на екстремната десница, Марин Ле Пен, да се кандидира на претседателските избори во 2027 година.
„Не ги знам деталите за обвиненијата против Марин Ле Пен, ниту причините за ваквата сурова одлука, но мислам дека никој што се грижи за демократијата не може да се радува на пресуда што ќе влијае на лидерот на голема партија и ќе ги лиши правата на милиони граѓани“, рече Мелони во интервју за италијанскиот весник „Ил Месаџеро“.
Мелони, која важи за најмоќниот десничарски лидер во Европа, со оваа изјава застана во одбрана на француската политичарка, која во понеделникот од парискиот суд беше прогласена за виновна за проневера на средства на Европската Унија.
Ле Пен е осудена на четири години затвор, од кои две ќе поминат под електронски мониторинг во домашен притвор, а две години се условни. Покрај тоа, таа е казнета со 100.000 евра и забрана за учество на избори во следните пет години.
Европа
Земјотрес ја погоди Италија

Земјотрес со јачина од 3,8 степени според Рихтеровата скала е регистриран денес, вторник, 1 април 2025 година, во 3.30 часот во Италија.
Хипоцентарот на земјотресот, според податоците на Европско-медитеранскиот сеизмолошки центар, се наоѓа на длабочина од приближно 6 километри под површината на земјата.
Засега нема извештаи за материјална штета или повредени, а надлежните служби ја следат состојбата.
Европа
Од утре нови правила за Европејците за влез во Обединетото Кралство

На европските граѓани кои патуваат во Обединетото Кралство од утре ќе им треба дигитална пропусница за да влезат во земјата, што според британската влада ќе ја зајакне безбедноста на границите.
Електронското овластување за патување (ЕТА) може да се купи онлајн за 10 фунти (12 евра) во наредните денови, а од 9 април цената ќе се зголеми на 16 фунти (19 евра).
Дозволата ќе биде задолжителна за сите Европејци кои сакаат да ја посетат Велика Британија од 2 април, откако истата пропусница беше воведена во јануари за граѓаните на САД, Канада и други земји на кои не им е потребна виза.
Слична дозвола за влез во земјата имаат и САД.
„Со дигитализирање на системот за имиграција, го отвораме патот за бесконтактни гранични премини во ОК“, рече министерката за миграција Сема Малхотра претходно овој месец, кога беше отворена веб-страницата за првите апликации.
Таа додаде дека проширувањето на ЕТА во земјите ширум светот „ја зајакнува посветеноста за подобрување на безбедноста преку технологија и иновации“.
Документот дозволува посети до шест месеци и важи две години. Тоа е задолжително за сите патници, вклучително и малолетни и новороденчиња.
Пропусницата може да се добие од апликација за паметни телефони или од владината веб-страница, а на Европејците им е достапна од почетокот на март.
Почнувајќи од среда, граѓаните на околу триесет европски земји, вклучително и целата ЕУ со исклучок на Ирска, ќе треба да имаат електронска дозвола за влез во Обединетото Кралство, кое ја напушти ЕУ во 2020 година. Апликантот мора да приложи фотографија од пасош и од лицето. Процесот трае околу десет минути, информираат од британското Министерство за внатрешни работи.
Во повеќето случаи, одлуката за апликацијата се носи во рок од неколку минути, но можно е да се чека и до три работни дена, велат од Владата.
Доколку апликацијата се обработи успешно, ЕТА е дигитално поврзана со пасошот на апликантот.
Патниците кои претстојуваат на аеродроми без да ја поминат границата со ОК се ослободени од оваа програма. Ова беше направено по притисокот од Хитроу, најпрометниот аеродром во Европа, кој стравуваше од губење на бројот на патници.